قازاقستان مەن وزبەكستان بىرلەسىپ لاتىن گرافيكاسىمەن گازەت شىعارماق
بۇل تۋرالى حالىقارالىق تۇركى اكادەمياسى مەن ءو ر جازۋشىلار وداعىنىڭ كەزدەسۋىندە قازاقستان رەسپۋبليكاسىنىڭ وزبەكستانداعى توتەنشە جانە وكىلەتتى ەلشىسى ەرىك وتەمبايەۆ ءمالىم ەتتى.
«بۇگىن ءبىز بىرلەسكەن كىتاپ- جۋرنالداردى ازىرلەۋ ىسىنە جاقسى نەگىز بولاتىن ىنتىماقتاستىقتىڭ وزەكتى ماسەلەلەرىن تالقىلادىق. لاتىن گرافيكاسىمەن باسىلاتىن بىرلەسكەن گازەتتى شىعارۋ جونىندە كەلىسىمگە قول جەتكىزىلدى. بۇل ماسەلەدە وزبەكستاننىڭ تاجىريبەسى، جاقسى ءادىسنامالىق نەگىزدەرى بار. لاتىن گرافيكاسىمەن جاڭا شىعارمالاردى شىعارۋعا بولادى. بۇل وقىرماندارعا وزبەكستان جانە قازاقستان ءومىرى تۋرالى كوبىرەك ءبىلۋ مۇمكىندىگىن بەرەدى. بۇدان تىس، ەكى ەلدىڭ جازۋشىلار وداعىنىڭ ورتاق تاريحىن سيپاتتايتىن ءارى شىعارماشىلىقپەن اينالىساتىن بۇكىل زيالى قاۋىمعا ارنالعان جول كارتاسىن جاساۋ ماسەلەسىن قارادىق. ءبىز ەكى حالىقتىڭ بولاشاعىن كورسەتۋىمىز قاجەت. ونداي جول كارتاسى جاڭا تۋىندىلاردىڭ ومىرگە كەلۋىنە تۇرتكى بولىپ، تامام حالىققا قولجەتىمدى بولادى. ۇستىمىزدەگى جىلدىڭ تامىز ايىندا، ۇلى اقىن اباي قۇنانبايەۆتىڭ تۋعان كۇنىنە وراي العاشقى گازەتتى شىعارۋدى جوسپارلاپ وتىرمىز. سونىمەن قاتار، ءور پرەزيدەنتىنىڭ قاۋلىسىمەن جىل سايىن «اباي وقۋلارى» وتكىزىلمەك»، - دەيدى ەرىك وتەمبايەۆ.