امەريكالىق تەلەكانال قازاقستاندىق ءسان مەن مادەنيەتكە قاتىستى فيلم ءتۇسىرىپ جاتىر
«ءسان - تەك كيىم عانا ەمەس، ول - بيزنەس، ول - تۋريزم. مەنىڭ تەلەارنام امەريكا، كانادا، جاپونيا، انگليا، گەرمانيا، اۋستريا ەلدەرىندە ترانسلياتسيالانادى. مەنىڭ تەلەارنا پرەزيدەنتى رەتىندەگى باستى مىندەتىم - ەل مادەنيەتى مەن مودانى بۇكىل الەمگە پاش ەتۋ»، - دەيدى روككو لەو گاليوتي.
سۇحبات بارىسىندا امەريكالىق قازاقستاننىڭ مادەنيەتى باي ەل ەكەنىن اتاپ ءوتتى.
«قازاق حالقىنىڭ ۇلتتىق تاعامدارى، كيىمى، ءدىنى مەن مەنتاليتەتى - وسىنىڭ ءبارى مەن ءۇشىن سىزدەردىڭ، جالپى قازاق ەلىنىڭ تاريحى مەن مادەنيەتى. مەنىڭ قازاقستانمەن العاشقى تانىسۋىم شىمكەنت قالاسىندا ASPARA Fashion Week- ءتى وتكىزىپ جاتقان ايدارحان قاليەۆپەن تىعىز بايلانىستى. ءبىز مادەني- تاريحي تۇركىستان قالاسىنا تۇسىرىلىمگە باردىق. مەنىڭ وپەراتورىم قالانى، مەشىتتەردى ءتۇسىردى. ولاردى تەك سىرتىنان عانا تۇسىردىك، ويتكەنى ىشتەگى عيبادات ەتىپ جاتقان ادامدارعا كەدەرگى جاساعىمىز كەلمەدى. ەڭ سوڭىندا وسى Fashion Week- ءتىڭ ۆيدەوسىن مونتاجداعان كەزدە وعان ەلىڭىزدىڭ تاماشا فوتوسۋرەتتەرىن دە سالامىز. وسى ارقىلى الەمگە ءسان كورمەسىمەن بىرگە قازاقستاندى دا تانىستىرامىز. مەن كورەرمەندەرىمىز قازاق ەلى جايلى دا بىلگەنىن قالايمىن»، - دەدى ول.
ەسكە سالا كەتەيىك، شىمكەنتتە ءوتىپ جاتقان بۇل ءسان اپتالىعىنا الەمنىڭ كوپتەگەن ەلىنەن 24 ديزاينەر قاتىسىپ جاتىر. مۇندا ءسان سالاسىنان ارنايى شاقىرىلعان شەتەلدىك قوناقتار اراسىندا روككو لەو گاليوتيدەن تىس، Berlin Fashion Week پرەزيدەنتى كاتارجينا ستەفانوۆا، يتاليانىڭ Vogue جانە Elle جۋرنالدارىنىڭ وكىلدەرى اننا ميرابەللا پوستولاچ جانە ادرياننا دي لەللو، گوللانديالىق مودەل جانە ءسان بلوگەرى سەنسەميلەتتا لەتيتسيا سامتەر، ق ح ر كيىم جانە توقىما قاۋىمداستىعىنىڭ پرەزيدەنتى دجان تونگ دجي، Asian Designer Week- ءتىڭ پرەزيدەنتى دەلفي روبي راۆات، وزبەكستاندىق حالىقارالىق ءسان كونكۋرسىنىڭ ديرەكتورى گۇلنار مۇحامەدوۆا، Asian Fashion Week Europe ديرەكتورى امستەردام ايدىن اسيك، ۋكراينا اتىرلەرى گيلدياسىنىڭ پرەزيدەنتى ۆلاد زۆارىچ سىندى تانىمال ادامدار بار.
اۆتور: گالينا سكريپنيك