كورەرمەندەرمەن قاۋىشۋ - ارتىستەر ءۇشىن ۇلكەن باقىت - اسانالى ءاشىموۆ

ورال. قازاقپارات - كورەرمەندەرمەن قاۋىشۋ - ارتىستەر ءۇشىن ۇلكەن باقىت. بۇل تۋرالى قازاقستاننىڭ ەڭبەك ەرى، كسرو حالىق ءارتىسى، مەملەكەتتىك سىيلىقتاردىڭ يەگەرى ءاسانالى ءاشىموۆ ايتتى، دەپ حابارلايدى قازاقپارات ءتىلشىسى.

 م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ باتىس قازاقستان وبلىسىنداعى گاسترولىنە وراي ورالعا ارنايى كەلگەن وسى ونەر ۇجىمىنىڭ كوركەمدىك جەتەكشىسى اسانالى ءاشىموۆتىڭ اتاپ وتكەنىندەي، اق جايىق ءوڭىرى - تالاي ۇلىلاردىڭ كىندىك قانى تامعان كيەلى ولكە.

«ءبىزدىڭ تەاتر وسىنداي قاسيەتتى توپىراقتا ءبىر اپتا گاسترولمەن بولدى. بۇل، ارينە، از. ءبىر اي بولسا دا، ارتىق ەتپەس ەدى. مەن ءاردايىم جۋرناليستەر قويعان ساۋالعا حالىق ارتىسىمەن، ءار ۋاقىتتا حالىقپەن بىرگەمىن دەپ ايتامىن. ويتكەنى قاي ونەردىڭ دە باستى تورەشىسى - حالىق. حالىق ايتسا، قالت ايتپايدى. ءبارىن دە باعالايتىن حالىق. ارتىستەردىڭ ەكى ءومىرى بار. ءبىرى - كۇندەلىكتى ءومىر. ەكىنشىسى - ساحنا. ادامداردىڭ جاسىنا جاس قوسىپ، عۇمىرىن دا ۇزارتاتىن وسى تەاتر. مەن، مىنە، 81 جاسقا كەلدىم. كورەرمەندەرىممەن قوشتاسقىم كەلمەيدى، ءالى تالاي كەزدەسەمىز. وسى ساپارىمىزدا ءبىزدى وبلىس اكىمى التاي كولگىنوۆ قابىلداپ، تەاتر ۇجىمىنا ريزاشىلىعىن ءبىلدىردى. ونەردى ءاردايىم قولداۋىمىز كەرەك. مۇحتار اۋەزوۆ ايتقانىنداي، حالىقتى وسىرەتىن دە، وشىرەتىن دە - ونەر»، دەدى ا. ءاشىموۆ.

ح. بوكەيەۆا اتىنداعى باتىس قازاقستان وبلىستىق قازاق دراما تەاترىندا م. اۋەزوۆ اتىنداعى تەاتر سەنبى كۇنى قويعان «تاڭسۇلۋ» دراماسى (اۆتورى عاريفوللا ەسىم، رەجيسسەرى الما كاكىشيەۆا) الدىندا سونداي- اق ب ق و اكىمىنىڭ ورىنباسارى عابيدوللا وسپانقۇلوۆ ءسوز الىپ، تەاتر ديرەكتورى اسحات ماەميروۆكە ءوڭىر باسشىسىنىڭ اتىنان العىسحات تابىس ەتتى.

 تەاتر ديرەكتورى، قازاقستاننىڭ ەڭبەك سىڭىرگەن قايراتكەرى ا. ماەميروۆ «رۋحاني جاڭعىرۋ» باعدارلاماسى اياسىندا تەاتر گاسترولى وڭىرلەردە بۇدان بىلاي دا جالعاساتىنىن جەتكىزدى. سونىمەن قاتار تەاتر فرانسيادا وتەتىن دۇنيەجۇزىلىك «اۆەنيۋ» تەاتر فەستيۆالىنە قازاقستاننان العاش رەت قاتىسايىن دەپ وتىر. وعان تەاتر اقىن- دراماتۋرگ، مەملەكەتتىك سىيلىقتىڭ يەگەرى يران- عايىپتىڭ (يرانبەك ورازبايەۆ) «قورقىت» دراماسىن ازىرلەۋدە.

 ايتا كەتەيىك، م. اۋەزوۆتىڭ ورالداعى گاسترولى 13 - مامىر كۇنى جازۋشى- دراماتۋرگ راحىمجان وتاربايەۆتىڭ «بەيبارىس سۇلتان» تاريحي دراماسىمەن (رەجيسسەرى يۋريي حانينگا- بەكنازار) تۇيىندەلەدى. ودان كەيىن ارقالىق قالاسىنا اتتانادى.

اۆتور: ەلجان ەرالى