ياساۋي مۇرالارى تۇركيانىڭ بۋرسا قالاسىندا كوپشىلىك نازارىنا ۇسىنىلدى

بۋرسا. قازاقپارات - تۇركيا رەسپۋبليكاسىنىڭ بۋرسا قالاسىندا «ازىرەت سۇلتان» مەملەكەتتىك تاريحي- مادەني قورىق- مۋزەيىنىڭ «ياساۋي مۇرالارى جانە تۇركىستان» كورمەسى اشىلدى، دەپ حابارلايدى قازاقپارات.

 شاراعا بۋرسا قالاسىنىڭ باسشىلىعى مەن قىزمەتكەرلەرى، زيالى قاۋىم وكىلدەرى مەن تاريحشى عالىمدار، بۇقارالىق اقپارات قۇرالدارى قاتىستى.

كورمەنىڭ لەنتاسىن بۋرسا قالاسىنىڭ گۋبەرناتورى مۇستافا ءدۇندار مەن «ازىرەت سۇلتان» مەملەكەتتىك تاريحي- مادەني قورىق- مۋزەيىنىڭ ديرەكتورى نۇربولات احمەتجانوۆ سالتاناتتى تۇردە قيىپ، جيىنعا قاتىسۋشىلاردى تاريحي كۇنمەن قۇتتىقتادى.

الىستا جۇرسە دە رۋحىنا تاعزىم ەتىپ، قاسيەتىنە باس يگەن تۇركيالىق باۋىرلار تۇركىستاننىڭ كيەلى توپىراعىنان كەلگەن ءاربىر قۇندى دۇنيەگە زور ىقىلاس، ەرەكشە ىلتيپاتپەن نازار سالىپ، قۋانىشتارىن دا جەتكىزدى.

كورمەگە قوجا احمەت ءياساۋيدىڭ جانە قۇل ءازيمنىڭ حيكمەتتەرى، شامامەن 1845 -جىلدارى جازىلعان، 326 بەتتەن تۇراتىن قوجا احمەت ءياساۋيدىڭ «ديۋاني حيكمەت» كىتابىنىڭ ءتۇپنۇسقاسى، س. باقىرعانيدىڭ «ديۋان» جازباسى، ياساۋي حيكمەتتەرىنە ۇقساس پارسى تىلىندە جازىلعان اۋليە بيدەلدىڭ «ديۋاني بيدەل» حيكمەتتەرى، شامامەن  18 - عاسىر اياعىندا تۇركى تىلىندە جازىلعان «ديۋاني حيكمەتتەن» كەيىنگى ياساۋيگە قاتىستى قۇندى كىتاپ - بۋستان ءۇل- مۋحيببين قولجازباسى مەن كوپتەگەن قۇندى جادىگەرلەر جەتكىزىلگەن.

سونداي- اق، قوجا احمەت ياساۋي جانە تۇركىستان جايىنداعى سۋرەتتەرمەن قاتار وڭتۇستىك قازاقستان وبلىسىنىڭ تاريحي، كيەلى ورىندارىن بەينەلەيتىن 100-دەن اسا تۋىندىلار قويىلعان.

تۇركسوي ۇيىمىنىڭ ۇيىمداستىرۋىمەن «كاستامونۋ - تۇركى الەمىنىڭ مادەني استاناسى» جىلى جانە «ازىرەت سۇلتان» مەملەكەتتىك تاريحي- مادەني قورىق- مۋزەيىنە 40 جىل تولۋىنا وراي ۇيىمداستىرىلعان كورمە ەلباسىنىڭ «بولاشاققا باعدار: رۋحاني جاڭعىرۋ» ماقالاسىنداعى: «جاھانداعى زاماناۋي قازاقستاندىق مادەنيەت» جوباسىن ىسكە اسىرۋ، تۇركىتىلدەس ەلدەردىڭ باس يگەن قوجا احمەت ياساۋي مۇرالارى مەن تاريحىن تانىتاتىن قۇندى جادىگەرلەرىن ايشىلىق الىس جەرلەردەگى جۇرتقا ناسيحاتتاۋ، كيەلى، رۋحاني جەرلەردى دارىپتەۋ، شەتەل حالقىنا ەلىمىزدى، مادەنيەتىمىزدى تانىتۋ بولىپ تابىلادى.

بۇعان دەيىن تۇركيانىڭ كاستامونۋ، انكارا قالالارىندا اشىلعان كورمەنى مىڭداعان حالىق تاماشالاپ، كيەلى ءوڭىر كەلبەتى مەن جادىگەرلەرىنە قىزىعۋشىلىق تانىتتى.

بۋرسا قالاسىندا جادىگەرلەر دە 15 - مامىرعا دەيىن تۇلعالار تاريحىنان سىر شەرتپەك.