قازاقستان قىتايعا قانداي ونىمدەرىن ەكسپورتتايدى؟

استانا. قازاقپارات - ق ر اۋىل شارۋاشىلىعى ءمينيسترى ءومىرزاق شوكەيەۆ پەن ق ح ر باس كەدەن باسقارماسىنىڭ ءتوراعاسى ني يەفەن قىتايعا راپس كۇنجاراسىن ەكسپورتتاۋدىڭ فيتوسانيتاريالىق تالاپتارى تۋرالى حاتتاماعا قول قويدى، دەپ حابارلايدى قازاقپارات ءتىلشىسى.

«قىتايدىڭ شانشي پروۆينتسياسى شيان قالاسىندا 2018-جىلعى مامىر ايىنىڭ 10 مەن 13- ارالىعىندا ش ى ۇ- عا مۇشە ەلدەردىڭ اراسىندا ترانسشەكارالىق ەپيزوتيالىق اۋرۋلارمەن كۇرەس جانە مونيتورينگ جۇرگىزۋ بويىنشا كونفەرەنتسيا وتۋدە.

كونفەرەنتسيا اياسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆ پەن قىتاي حالىق رەسپۋبليكاسى باس كەدەن باسقارماسىنىڭ ءتوراعاسى ني يەفەن قىتايعا راپس كۇنجاراسىن ەكسپورتتاۋدىڭ فيتوسانيتاريالىق تالاپتارى تۋرالى حاتتاماعا قول قويدى»، - دەلىنگەن مينيسترلىك تاراتقان مالىمەتتە.

سونداي-اق ۆەدومستۆو اقپاراتىنا سايكەس، قىتايلىق تاراپ قازاقستاننىڭ 5 وبلىسى (ش ق و، الماتى، جامبىل، قىزىلوردا جانە وڭتۇستىك قازاقستان وبلىستارى) ۆاكتسيناتسيالاۋ ارقىلى اۋسىلدان بوساتىلعان تازا ايماق مارتەبەسىن العانىن اتاپ وتكەن. سونىڭ ناتيجەسىندە قازاقستاننان ۆەتەرينارلىق سەرتيفيكاتتار بويىنشا قىتايعا مال ونىمدەرىن جانە ءتىرى جانۋارلاردى جەتكىزۋ مۇمكىندىگى تۋدى. نودۋليارلى دەرماتيتكە قاتىستى شەكتەۋلەر ەلىمىزدىڭ بارلىق اۋماعىنان الىندى، بۇل جاقىن ارادا ق ر- دان ق ح ر- گە ەكسپورتتالاتىن سيىر ەتىنە قويىلاتىن ۆەتەرينارلىق تالاپتار تۋرالى حاتتاماعا قول قويۋعا مۇمكىندىك بەرەدى.

ەكسپورتتاۋشى كاسىپورىندار تىزىمىنە ەنگىزىلەتىن قىتايلىق ساراپشىلاردىڭ ارپا جانە جۇگەرى وندىرەتىن قازاقستاندىق كاسىپورىندارعا تەكسەرۋ جۇرگىزۋى جونىندە كەلىسىمدەر جاسالدى.

جۇمىس ساپارى بارىسىندا ءومىرزاق شوكەيەۆ قىتاي حالىق رەسپۋبليكاسىنىڭ پارتيالىق جانە ۇكىمەتتىك ۇيىم باسشىلارىمەن كەزدەستى. تاراپتار ءوزارا ساۋدا-ساتتىقتىڭ «ءبىر بەلدەۋ - ءبىر جول» جوباسى اياسىندا وڭ كورسەتكىشكە يە بولعانىن اتاپ ءوتتى.

قازاقستاندىق اۋىل شارۋاشىلىعى ونىمدەرى ەكسپورتىن ارتتىرۋ ماقساتىندا اۋىل شارۋاشىلىعى مينيسترلىگى مەن قىتايلىق تاراپ اراسىندا وسى ۋاقىتقا دەيىن بالىق ونىمدەرىن، اسىل تۇقىمدى جىلقى، مۇزداتىلعان قوي، بال، ءبيداي، كەبەك، سويا جانە سويىلعان جىلقىلاردى تاسىمالداۋ بويىنشا حاتتامالارعا قول قويىلعان بولاتىن.

اعىمداعى جىلى قىتايلىق تاراپپەن سيىر ەتىنە، سويىلعان ۇساق مالدار، ءبىر وركەشتى تۇيەلەرگە ۆەتەرينارلىق تالاپتاردى جانە ارپا، جۇگەرى، زىعىر، بۇرشاق، سافلور جانە قاۋىن تۇقىمدارىنا (اسقاباق تۇقىمى، قاربىز، قاۋىن) فيتوسانيتاريالىق تالاپتاردى كەلىسۋ جوسپارلانعان.

بۇدان باسقا، اقتوبە، شىعىس قازاقستان، پاۆلودار وبلىستارىنان استىقتى جونەلتۋگە رۇقسات الۋ جونىندە كەلىسسوزدەر جۇرگىزىلۋدە. قازىرگى ۋاقىتتا اقمولا وبلىسى، سولتۇستىك قازاقستان جانە قوستاناي وبلىستارىنان 67 استىق قابىلداۋ پۋنكتتەرىنەن جونەلتۋگە رۇقسات ەتىلگەن.

اۆتور: مارلان جيەمباي