كانن فەستيۆالىندە قازاق ۇلتتىق پاۆيلونى اشىلدى

None
None
 استانا. قازاقپارات - 71-حالىقارالىق كانن فەستيۆالىندە قازاقستاننىڭ ۇلتتىق پاۆيلونى شىمىلدىعىن ءتۇردى.

مۇندا ەلىمىزدىڭ ۇزدىك كينوتۋىندىلارى «رۋحاني جاڭعىرۋ» باعدارلاماسى اياسىندا تانىستىرىلۋدا، دەپ حابارلايدى قازاقپارات 24.kz سايتىنا سىلتەمە جاساپ.

اتالمىش ءىس- شارالاردىڭ بارلىعى قازاق ونەر ۋنيۆەرسيتەتى مەن استانانىڭ 20 جىلدىعىنا ارنالىپ وتىر. قازاقستان دەلەگاتسياسىنىڭ قۇرامىندا مادەنيەت جانە سپورت مينيسترلىگى مەن زيالى قاۋىم وكىلدەرى، قازاق كينو ونەرىنىڭ كورنەكتى قايراتكەرلەرى مەن قازاق ۇلتتىق ونەر ۋنيۆەرسيتەتىنىڭ ستۋدەنتتەرى بار. كانن كينوفەستيۆالىندە قازاقستان ەكىنشى جىل قاتارىنان ۇلتتىق پاۆيلونىن قۇردى. بۇل جولعى بايقاۋعا جاس دارىندارىمىزدىڭ تۋىندىلارىن اكەلگەن. ولاردىڭ اراسىندا «ەرەكشە كوزقاراس» باعدارلاماسىنا قاتىساتىن رەجيسسەر ءادىلحان ەرجانوۆتىڭ «لاسكوۆوە بەزرازليچيە ميرا» كارتيناسى مەن سينەفونداسون («Cinefondation» ) باعدارلاماسىنا قاتىساتىن جانات الشانوۆانىڭ «ماۋسىم سوڭى» فيلمى بار.

ەسكە سالساق، «ەرەكشە كوزقاراس» باعدارلاماسى بويىنشا قازاق كينوسى بىرنەشە رەت باس جۇلدەنى يەلەنگەن ەدى. 1998 -جىلى دارەجان ومىربايەۆتىڭ «كيللەر» فيلمى مەن 2008 -جىلى سەرگەي دۆورتسيەۆويدىڭ «تيۋلپان» كينوسى ۇزدىك شىققان. سونداي- اق تاۋەلسىز كينو قاۋىمداستىعىنىڭ باعدارلاماسىندا ولگا كوروتكونىڭ «تاك سەبە زيما» اتتى تىرناقالدى كينوتۋىندىسىمەن قاتار «Short film corner» باعدارلاماسىندا كورسەتىلەتىن بىرنەشە قىسقامەتراجدى كينو دا بار.

«ۇلتتىق پاۆيلوننىڭ اشىلۋىنا كەلگەن كورشى ەلدەردىڭ وكىلدەرى مەن دوس- جاراندار قازاقستاندىق كينونىڭ قارىشتاپ دامىپ كەلە جاتقانىن ايتتى. ءبىز وسى فرانسيادا ءوتىپ جاتقان فەستيۆالمەن قاتار ازيالىق كينولار فەستيۆالى جانە نيۋ- يورككە شاقىرتۋ الدىق. ءبىراق، ارينە، قازاقستاندىق كينووندىرىسىن قالاي ناسيحاتتاۋعا بولاتىنىن بايقايمىز، ال جارناما رەتىندە اقان ساتايەۆ پەن وزگە دە رەجيسسەرلەردىڭ كينولارىنان ترەيلەر، ياعني ۇزىندىلەرىن الىپ كەلدىك، سونىڭ ىشىندە بيىلعى جىلى «ەۋرازيا» كينوفەستيۆالىنە قاتىساتىن امىرە قاشاۋبايەۆ تۋرالى كينو دا بار» ، - دەيدى «ەۋرازيا» حالىقارالىق كينوفەستيۆالىنىڭ پرەزيدەنتى ايمان مۇساقوجايەۆا.

 «مەن كەيىپكەرىمنىڭ قاراپايىمدىلىعى مەن شىنايلىعىن، ونىڭ اڭقاۋلىعىن كورسەتكىم كەلدى. ويتكەنى كينونى كورسەڭىز، ونىڭ ماڭىنداعى وزگە كەيىپكەرلەردىڭ بارلىعى ەكستراۆەرتتەر، وتە جارقىن، اسەرلى بەينەلەر. ال امىرەنىڭ وبرازى - شىنايى، تازا، ءوز الەمىندە ءومىر سۇرەتىن، ەرەكشە تالانت يەسى. بيىل كانن فەستيۆالىندە ءبىزدىڭ ەلدەن 60 قا جۋىق كينوتۋىندى قاتىسادى. بۇل ءبىزدىڭ كينو سالاسىندا ۇزدىكتەردىڭ ءبىرى ەكەنىمىزدىڭ دالەلى. الەمنىڭ تۇكپىر- تۇكپىرىنەن جينالعان پروديۋسەرلەر ءبىزدىڭ پاۆيلونعا كەلىپ قازاقستاندىق ماماندارمەن تانىسىپ، ارىپتەستىك بايلانىس ورناتۋعا نيەت ءبىلدىرىپ ءجۇر. بۇل وتاندىق كينونىڭ جەتىستىگى ءارى بولاشاعىنىڭ زور ەكەنىن كورسەتەدى» ، - دەگەن ويىمەن ءبولىستى» ، - «امىرە» فيلمىندە باستى ءرولدى سومداۋشى اكتەر سانجار ماديەۆ.

امەريكالىق كينوپروديۋسەر ۆالتەر كروحمال: «ماعان قازاقستان ۇكىمەتىنىڭ كينەماتوگرافيا سالاسىنا اقىلعا قونىمدى ينۆەستيتسيا سالاتىنى قاتتى اسەر ەتتى. كينو بار جەردە تاريح پەن تاريحي تۇلعالار ۇمتىلمايدى. بۇگىن قازاق ماقتان تۇتاتىن ەلىنىڭ باي مادەنيەتىن كوردىك. بۇل - قازاقستاندىق كينونىڭ بىرەگەيلىگىن پاش ەتىپ تۇرعان فاكتور. مەن قازاقستانمەن ەتەنە تانىسقىم كەلەدى. سوندىقتان سىزدەردىڭ تۋىندىلارىڭىز ءۇشىن نيۋ- يوركتەگى الاڭىمىزدىڭ ەسىگى ايقارا اشىق» ، - دەديى.

يتاليالىق كينوپروديۋسەرى فلاۆيو دونينيدىڭ ايتۋىنشا، قازاقستان - مۇمكىندىگى مول، ادەمى، عاجايىپ ەل.

«ءبىز قازاقستان تۋرالى كينو تۇسىرگىمىز كەلەدى. سول ءۇشىن قازاقستاندىق كينويندۋستريادان وزىمىزگە تەڭ پروديۋسەر ىزدەپ جاتىرمىز. ءبىز سونداي تالانتتى ادامدى ءوزىمىزدىڭ يتاليالىق پاۆيلوندا كۇتەمىز. كانن فەستيۆالىندەگى قازاقستان ۇلتتىق پاۆيلونىنىڭ العاشقى ناتيجەلەرى دە بەلگىلى بولدى. بىلتىر ءدال وسىندا رەجيسسەر ەرلان نۇرمۇحامبەتوۆتىڭ «كونوكرادى» كينوكارتيناسى تىڭ سەرپىلىس اكەلگەن بولاتىن» ، - دەيدى.

سوڭعى جاڭالىقتار