گيتلەردىڭ كورىپكەلى

None
None
نۇر- سۇلتان. قازاقپارات - 1944 -جىلى لوندوندا ليون فەيحتۆانگەردىڭ «اعايىندى لاۋتەنزاك» رومانى جارىققا شىقتى. وندا نەمىس جازۋشىسى گيتلەردىڭ كەڭەسشىسىنە اينالعان تەلەپات ءارى كورىپكەل وسكار لاۋتەنزاك ءومىرىن بەينەلەيدى.

رومان جارىققا شىققاندا كوبى فەيحتۆانگەردىڭ كەيىپكەرىن جازۋشى قيالىنىڭ جەمىسى ەمەس، ومىردە بولعان ادام ەكەنىن بىلمەگەن ەدى. 1930 -جىلدارى بەرليندە ناتسيستىك بيلىككە جاقىندىعى بار، شىققان تەگى اۋستريالىق يەۆرەي ەريك يان حانۋسسەن اتتى كورىپكەل راسىمەن ءومىر سۇرگەن ەكەن. ءوزىنىڭ كىتاپتاعى پروتوتيپىنە قاراعاندا حانۋسسەن ءوز قاۋىپسىزدىگىنە الاڭداماعان. سەبەبى، ول - SA شابۋىل وتريادىنىڭ مۇشەسى. حانۋسسەن اينالاسىندا نەمىس بيلىگىنىڭ مارعاسقالارى جۇرگەن. ول ءوزىن يەۆرەي ساناماعان، كەرىسىنشە تازاقاندى ارييلىك ەكەنىن ايتىپ جۇرگەن. ونىڭ شىن ەسىمى - حەرشەل شتاينشنايدەر. 1889 -جىلى سيرك ارتىستەرىنىڭ وتباسىندا دۇنيەگە كەلگەن. بالالىق شاعى شاعىن تەاترلىق توپتارمەن وتكەن. ارتىستەرگە ەرىپ، ءتۇرلى ونەردى مەڭگەرەدى. وسە كەلە قاتارلاستارىنا كىشكەنە شارلارمەن، جىپتەرمەن قۋلىققا تولى فوكۋستار كورسەتىپ ماشىقتانادى. ەڭ باستىسى، يلليۋزيونيست- سيقىرشىلار، گيپنوزشىلارمەن ارالاسىپ، ولاردان ادام كوزىنە قاراپ ونىڭ ىشكى الەمىن كورۋدى ۇيرەنەدى. ارتىستەر ترۋپپاسىمەن بىرگە حەرشەل بۇكىل ەۋروپانى، تاياۋ شىعىستى، مىسىر مەن امەريكانى ارالاپ، وزىنە ماگيا عىلىمدارىنىڭ دوكتورى دەگەن اتاقتى ەنشىلەپ الادى. ول ونەر كورسەتە ءجۇرىپ بايي تۇسەدى دە، بەرلينگە كوشىپ كەلەدى. ءوز سەانستارىندا حەرشەل زالدان ءبىر ادام شاقىرىپ الىپ وزىنە كومەكشى ءارى كۋاگەر ەتىپ الاتىن بولعان. سودان زالداعى كەز كەلگەن ادامنىڭ قالتاسىنداعى زاتتارىن تاۋىپ الىپ، حاتتارىنداعى جازۋلاردى وقىپ، ءتىپتى بەيتانىس ادامداردىڭ تۋعان كۇندەرىن ءتىزىپ ايتىپ بەرەتىن بولعان.

بەرلينگە كەلىسىمەن ول اتىن ەريك يان حانۋسسەن دەپ وزگەرتىپ، جەكە بيوگرافيالىق قۇجاتىنا حانۋسسەننىڭ كونە دات باروندارىنا تيەسىلى ەسىم ەكەنىن، ال شتاينشنايدەرلەر بولسا، ونى اسىراپ العان اتا- انالارى ەكەنىن جازدىرادى. حانۋسسەن گيتلەرمەن 1926 -جىلى تانىسادى. ول كەزدە ەكەۋى دە 37 جاستا، ەكەۋىنىڭ دە بويى بىردەي، شاشتارى ۇقساس، جوعارى بىلىمدەرى جوق بولاتىن. كورىپكەل مەن ۇلتتىق- سوتسياليستىك نەمىس جۇمىسشى پارتياسىنىڭ باسشىسى بىردەن ءتىل تابىسىپ كەتەدى. كوپ جىلدار بويى وراتورلىق، ارتىستىك شەبەرلىگى شىڭدالعان حانۋسسەن گيتلەرگە حالىق الدىندا ءوزىن ۇستاۋدى، قولدى دۇرىس سەرمەۋدى، يشارات سىرلارىن، ناندىرىپ شەشەن سويلەۋدى، وزىنە جۇرتتى قاراتۋدى ۇيرەتەدى.


حانۋسسەن رەيحسكانتسلەرمەن ارالاسا ءجۇرىپ، ءوز قاۋىپسىزدىگىنىڭ قامتاماسىز ەتىلگەنىنە كۇماندانباعان ەدى. ءبىراق ولاي بولمادى. 1933 -جىلى 26 - اقپاندا حانۋسسەن ءبىراز ناتسيستەرگە سەانس جاساپ، كورىپكەلدىك قاسيەتىن كورسەتەدى. ءبارى تاڭعاجايىپ ءبىر نارسە كۇتەدى. جارىق وشەدى، قابىرعادا ادام كولەڭكەسى عانا كورىنىپ، ول مەديتاتسيا جاساي باستايدى:

- بەرليندە ءورت شاپاعى، ول ءسات سايىن ۇدەپ بارادى، اسپان تۇتاس قىزىلعا بويالعان. بەرليندەگى ەڭ تانىمال عيمارات تۇگەل وتقا ورانعان. ونى بىرەۋلەر ورتەپ كەتكەن. ءبىراق كىم؟ كەلەسى كۇنى گازەتتەر داۋلى حابار تاراتادى: "كوممۋنيستەر رەيحستاگتى ورتەگەن! قىزىلدارعا سوعىس اشىلسىن!" SA بيلىگىندەگىلەر حانۋسسەن تىم كوپ ەركىنسىپ كەتتى دەپ شەشىم قابىلداپ، گەرينگكە حابار جەتكىزەدى. ول جايلى اقپاراتتار انىقتالا كەلىپ، بيلىكتەگىلەر ونىڭ شىققان تەگى يەۆرەي، شىن ەسىمى حەرشەل شتاينشنايدەر ەكەنىن انىقتايدى. حانۋسسەن ءومىرى قۇردىمعا كەتەدى، ونى ەشكىم اقتاپ المايدى. ءتىپتى گيتلەر دە. 1933 -جىلى 7 - ساۋىردە كورىپكەل قازا تاۋىپ، ونى SA جەندەتتەرى اتىپ ولتىرگەنى تەك وتىز ءبىر جىلدان كەيىن انىقتالادى.

Massaget.kz


سوڭعى جاڭالىقتار