ەلىمىزدەگى بيزنەستى الا دوربا ارقالاعان ايەلدەر باستادى

 اقتوبە. قازاقپارات - «اتامەكەن» ۇ ك پ ءتوراعاسىنىڭ ورىنباسارى ەلدار جۇماعازيەۆ اقتوبەدەگى فورۋمدا بيزنەستەگى ايەلدەردىڭ ءرولى تۋرالى ايتىپ بەردى.

سونىمەن قاتار، ەلىمىزدە «5 مىڭ اۋىلعا 5 مىڭ قامقورشى» جوباسى ىسكە اسىرىلاتىنىن جاريالادى، دەپ حابارلايدى قازاقپارات ءتىلشىسى.

اقتوبەدە العاشقى الەۋمەتتىك كاسىپكەرلىك فورۋمى ءوتىپ جاتىر اتىراۋ وبلىسىنداعى اۋىلدا كاسىپكەرلەرگە قىزمەت كورسەتەتىن ورتالىق اشىلادى

ال «اتامەكەن» ۇ ك پ ءتوراعاسىنىڭ ورىنباسارى ەلدار جۇماعازيەۆ 90- جىلدارى وتباسىن اسىرۋ ءۇشىن الا دوربا ارقالاعان ايەلدەردى بيزنەستىڭ باستاۋى دەپ اتاپ ءوتتى.

«بيزنەستە ايەلدەر كوپ دەپ ايتامىز. جاس ۇرپاق بىلمەۋى مۇمكىن، ءبىراق تاۋەلسىزدىكتىڭ العاشقى جىلدارى قىتايلىق الا سومكەنى ارقالاعان ايەلدەر قىتاي، تۇركياعا بارىپ، تاۋار تاسىدى. بۇل - قازاقستان بيزنەسىنىڭ باستاۋى. ءبىر ارىپتەسىمىز، «سول جىلدارى سومكەمەن زات تاسىعان ايەلدەرگە ەسكەرتكىش قويسا دا ارتىق ەتپەيدى» دەپ ايتقان بولاتىن. مۇنى ۇمىتپاعان ءجون» ، - «اتامەكەن» ۇ ك پ ءتوراعاسىنىڭ ورىنباسارى ەلدار جۇماعازيەۆ.

كاسىپكەرلەر پالاتاسى «بيزنەس باستاۋ» جوباسى اياسىندا اۋىلدا جۇمىسسىز جۇرگەن ادامداردى 1 اي بويى وقىتادى. وتكەن جىلى ەلىمىز بويىنشا 15 مىڭ ادام كاسىپكەرلىك الىپپەسىن ۇيرەنىپ، 8,5 مىڭى بيزنەس جوباسى قورعادى. ال 3,5 مىڭ ادام جوباسىن ىسكە اسىرۋعا نەسيە الدى. وقىپ، ءوز جوباسىن جاساعان 5 مىڭ ادامدارعا بيىل قارجى بولىنەدى.

«بيىل 30 مىڭ ادام «بيزنەس باستاۋ» جوباسى ارقىلى وقىتىلادى. جوسپار بويىنشا 20 مىڭنان استام ادام بيزنەس جوسپارىن قۇرىپ، قورعايدى. كاسىپكەرلىك الىپپەسىن ۇيرەنىپ جۇرگەندەردىڭ 70-80 پايىزى جۇمىسسىزدار، ءوز- ءوزىن جۇمىسپەن قامتىپ وتىرعا ادام. ماسەلەن، ماڭعىستاۋ وبلىسىنىڭ 70 جاستاعى تۇرعىنى وقىپ، بيزنەس جوسپارىن قورعادى. قاعاز بەن قالام الىپ، جوسپار قۇرىپ، 5 ميلليون تەڭگە نەسيە الدى. قازىر ءوزىنىڭ بەس كەلىنىنە جۇمىس بەرىپ وتىر، جالاقى تولەيدى» ، - دەدى «اتامەكەن» ۇكپ ءتوراعاسىنىڭ ورىنباسارى ەلدار جۇماعازيەۆ.

ال اقتوبەنىڭ تەمىر اۋدانى، شۇبارقۇدىقتا 50 ادام وقىدى. ونىڭ 15 ىنە نەسيە بەرىلىپ، كاسىپكەرلەر جۇمىسقا كىرىستى.

«ەڭ ءبىرىنشى نەسيە ماسەلەسىن شەشۋ كەرەك. دەگەنمەن بيزنەس جوبانىڭ ومىرشەڭدىگىن ەستەن شىعارماۋعا ءتيىسپىز. سونىمەن قاتار، جاقسىلىق ۇشكەمپىروۆتىڭ تۋعان اۋىلىنا جاساپ جاتقان كومەگىن نەگىزگە الىپ، 5 مىڭ اۋىلدى ەسەپتەپ شىقتىق. «5 مىڭ اۋىلعا - 5 مىڭ قامقورشى» جوباسى باستالدى. مەنىڭ ويىمشا، كاسىپكەرلەر تۋعان اۋىلىنا كومەكتەسۋگە دايىن» ، - دەدى ە. جۇماعازيەۆ.

 «رۋحاني جاڭعىرۋ» باعدارلاماسىنداعى «تۋعان جەر» جوباسى اياسىندا بۇل ءىس قولعا الىندى. ءسىز ۇسىنعان يدەيانى قولدايمىز. 5 مىڭ اۋىل كوپ ەمەس. بيزنەس يەلەرى بىزدە بىرنەشە ەسە كوپ ەكەنىن ەسكەرسەك، ءبارى ءساتتى ىسكە اسىرىلادى. وزگە وڭىرلەردەگى ارىپتەستەرىم دە قولدايتىنىنا سەنىمدىمىن. اقتوبەدە سايت اشىلىپ، تۋعان جەرگە كومەك بەرىلىپ جاتىر. اۋدان ورتالىعى عانا ەمەس، اۋىلدى دا كوتەرۋ كەرەك» ، - دەدى اقتوبە وبلىسىنىڭ اكىمى بەردىبەك ساپاربايەۆ فورۋمدا سويلەگەن سوزىندە.

 ەسكە سالا كەتەيىك، جوعارىدا اتالعان فورۋم جۇمىسىنا ق ر ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا قاتىسىپ، پرەزيدەنتتىڭ بەس الەۋمەتتىك باستاماسىن ءتۇسىندىرىپ بەرگەن بولاتىن.