الماتىلىق ەر ادامدار «ۇلگىلى اكە» اتانۋ ءۇشىن سىنعا ءتۇستى
بايقاۋعا كوپبالالى اكەلەرمەن قاتار جاس ءارى بەلسەندى، سپورتشى، ارداگەر اكەلەر قاتىسىپ، ونەرلەرىن ورتاعا سالدى. سايىسقا قاتىسۋ ءۇشىن قالانىڭ ءار اۋدانىنان كەلگەن جانۇيالاردىڭ ۇلتتىق قۇندىلىقتار تۋراسىنداعى ءبىلىمى مەن بىلىگى سىنعا ءتۇستى.
«قالالىق اكەلەر سلەتى» وسىمەن بيىل 5- رەت وتكىزىلۋدە. سايىستىڭ باستى ماقساتى - بالا تاربيەسىندەگى اكەنىڭ ءرولىن كۇشەيتىپ، ۇلت بولاشاعى ءۇشىن اتا- انانىڭ جاۋاپكەرشىلىگىن ارتتىرۋ. اكەنىڭ اتقارار ءرولى وتباسىن اسىراپ، نان تابۋ مەن عانا شەكتەلگەن زاماندا ونىڭ تاربيەدەگى نەگىزگى ورنىن ايقىنداۋ. اكە ماحابباتى مەن قامقورلىعى ۇرپاعىنىڭ سانالى بولىپ وسۋىنە سەپتىگىن تيگىزەدى» - دەيدى №1 وقۋشىلار ءۇيىنىڭ ديرەكتورى ءداۋىرحان قوجاحمەتوۆ.
بايقاۋ بىرنەشە كەزەڭنەن تۇردى. «تاعىلىم» كەزەڭىندە قاتىسۋشىلار ءتول تاريحىمىزعا، سالت- داستۇرىمىزگە، ۇلتتىق مادەنيەتىمىزگە قاتىستى سۇراقتارعا جىلدام جاۋاپ بەرۋ سىنىنان ءوتتى.
«جۇبايىم، ەكى بالام، كەلىنىم مەن نەمەرەم، بۇكىل وتباسىم مەنى قولداپ كەلىپ وتىر. ءبىز تۇركىسىب اۋدانىنىڭ نامىسىن قورعايمىز ءارى جەڭىستەن دامەلىمىز. بابالارىمىزدىڭ ءومىر سالتى جايىنداعى بىلگەن- تۇيگەنىم مەنى جەردە قالدىرمايدى. ال 4 جاستاعى نەمەرەم بولسا كورەرمەندەر قۇرمەتىنە قازاق ۇلتىنىڭ ءبيىن بيلەيدى» - دەيدى بايقاۋ قاتىسۋشىسى قارلىعاش سەيىتوۆ.
كەلەسى اينالىمدا قازىلار القاسى اتا- انالاردىڭ زەرەكتىگىن باعالاسا، سايىس سوڭىندا ءار اكە بالاسىمەن بىرگە ءان سالۋ، بي ورىنداۋ، ءتۇرلى اسپاپتاردا ويناۋ قابىلەتىن پاش ەتتى.
«مەنىڭ 5 بالام بار. بۇل سايىسقا 10 جاستاعى كىشى قىزىمدى ەرتىپ كەلدىم. بۇرىن جۇمىسباستى بولعانىم سونشالىق ۇلكەن بالالارىمنىڭ قالاي وسكەنىن دە بايقاماي قالىپپىن. ال قازىر كوپ ۋاقىتىمدى كەنجەممەن وتكىزۋگە ارناپ، ونىڭ تاربيەسىن قاداعالاپ ءجۇرمىن. قىزىمدى مۋزىكالىق مەكتەپكە اپارامىن، وندا فورتەپيانودا ويناۋعا ماشىقتانۋدا. جانە كوركەم گيمناستيكاعا قاتىسىپ ءجۇرمىز» - دەيدى كوپبالالى اكە مۇحيت دوسىمبەتوۆ.
بايقاۋ جەڭىمپازدارى رەسپۋبليكالىق بايقاۋعا جولداما الادى.
اۆتورى: ارايلىم جولداسبايەۆا