شەتەلدىكتەر قازاقستاننىڭ ادەمى قىزدارىن ىزدەيدى
«كازكونتەنت» ا ق باسقارما ءتوراعاسى ەۆگەني كوچەتوۆتىڭ ايتۋىنشا، بىلتىر ۇلتتىق برەند بويىنشا بايقاۋ جاريالانعان.
«بۇرىن مەملەكەتتەر مۋزىكا، فيلم، ونەر بويىنشا تانىلاتىن. قازىر Google Trends ارقىلى كىم نە ىزدەپ جاتقانىن كورۋگە بولادى. مۇندا ادامدار قازاقستانمەن قوسا نە ىزدەيتىنى بەلگىلى بولادى. قازىر ادامدار بوراتتى ىزدەمەيدى. قازىر ادامدار قازاقستان ارۋىن ىزدەيدى. قازاقستاننىڭ ادەمى قىزدارىن كورگىسى كەلەدى. وليمپيادا كەزىندە قازاقستاننىڭ مەدالدىك ەسەبىن كوبىرەك ىزدەگەن. نيكولاس كەيدجدىڭ قازاقستانعا ساپارى قىزىقتىرعان ءبارىن. كوبىنەسە قازاقستانمەن بىرگە گولوۆكين مەن ديماشتىڭ ەسىمدەرى ىزدەستىرىلگەن. 5 جىل بۇرىن بوراتپەن بىرگە سابينا التىنبەكوۆا تانىمال ەدى. ءبارىبىر ادامدار قازاقستاننىڭ ادەمى قىزدارىن ىزدەيدى» ، - دەدى ەۆگەني كوچەتوۆ.
كوبىنەسە قازاقستاننىڭ يميدجىنىڭ قالىپتاسۋىنا ينتەرنەت باسىلىمدارى ىقپال ەتەتىن كورىنەدى.
«جاڭالىقتاردا ادام ءولتىرۋ، قىلمىس كوپ بولعاندىقتان، ولاردىڭ ءبارى يندەكستەلىپ، نەگاتيۆتى فون قالىپتاسادى. ادامداردى تەك قىلمىستىق حرونيكامەن عانا ەمەس، مادەنيەت پەن سپورتتاعى جەتىستىكتەرمەن دە قىزىقتىرعان ءجون» ، - دەدى ەۆگەني كوچەتوۆ.
مامانداردىڭ ايتۋىنشا، الەمدە تۋريستىك تانىمالدىلىقتى ارتتىرۋدا قالىپتاسقان برەندتەر كوپ ىقپالىن تيگىزەدى.
Kazakhstan Groth Forum ءتوراعاسى ەلدار ءابدىرازاقوۆ قازاقستاندى كوبىنە رەسەيگە تاۋەلدى ەل رەتىندە تانيتىندىعىن ايتتى.
سونىمەن قاتار، ۇلتتىق اس مازىرىندەگى جىلقى ەتى تۋريستەردىڭ باسىم كوپشىلىگى ءۇشىن جابايىلىق سانالادى.
«ءبىراق بارلىق كەمشىلىكتەردى ارتىقشىلىق ەتىپ كورسەتۋگە بولادى. ماسەلەن جىلقى ەتى وتە تازا جانۋار، ول كەز- كەلگەن نارسەنى جەمەيدى، تازا سۋ ىشەدى. YPO ەۋروپالىق ايماقتىق كونفەرەنتسيا بارىسىندا ءبىز شەتەلدىك دوستارىمىزدى قازاق اۋىلدارىنا شاقىرىپ، ۇلتتىق تاعامنان ءدام تاتقىزدىق. ولارعا ۇلتتىق ءداستۇر مەن ويىندار تۋرالى اقپارات بەردىك. ياعني، ناسيحاتتاۋ، دارىپتەۋ جاعى دا ماڭىزدى» ، - دەدى ەلدار ءابدىرازاقوۆ.
ساراپشىلار جارنامالىق روليكتەردەن گورى ءار ەلدىڭ تانىمال بلوگەرلەرىن شاقىرعان تيىمدىرەك ەكەنىن ايتتى. جاقىندا الماتىدا قىتاي بلوگەرلەرى بولدى. ولاردىڭ جازبالارى مەن روليكتەرىن كورۋشىلەردىڭ سانى جىل ساناپ ارتىپ كەلەدى.