بۋراباي كۋرورتىندا باعانىڭ اسا قىمبات بولماۋى قاداعالانادى

 استانا. قازاقپارات - اقمولا وبلىسىنىڭ اكىمى مالىك مىرزالين و ك ق- دا وتكەن باسپا ءسوز ءماسليحاتىندا بۋرابايداعى تۋريزمدى دامىتۋ تۋرالى جوسپارلارىمەن ءبولىستى، دەپ حابارلايدى قازاقپارات ءتىلشىسى.

«جاقىن ارادا مەملەكەت باسشىسىنىڭ تاپسىرماسىمەن ۇكىمەت 61 ميلليارد تەڭگە ءبولدى. ول جەردە ينجەنەرلىك ينفراقۇرىلىم سالىناتىن بولادى. 233 گەكتارلىق ۇلكەن شاباقتا - ينجەنەرلىك ينفراقۇرىلىم سالىنادى دەپ شەشتىك. سودان كەيىن عانا وندا وتەلدەر مەن تۋريستىك بيزنەستىڭ وزگە دە نىساندارى بوي كوتەرەدى. بۋراباي كەنتىنىڭ ىشىندە قازىردىڭ وزىندە 14 گەكتارلىق اۋماقتى قايتا سالۋدى كوزدەپ وتىرمىز. الدىمىزعا الەمدىك دەڭگەيدەگى كۋرورتتى سالۋ مىندەتى قويىلدى. 14 گەكتارلىق اۋماقتا قۇرىلىس باستالىپ، ول جەردە كولگە تىكە شىعاتىن اللەيالار سالىنىپ جاتىر. شاعىن وتەلدەر مەن مەيرامحانالار، رەستوراندار تۇرعىزىلادى. سونىمەن بىرگە، ءبىز البەتتە ساپالى سەرۆيس جاعىن دا، باعانىڭ اسا قىمبات بولماۋىن قاداعالالاپ وتىرمىز» ، - دەدى مالىك مىرزالين.

ءوڭىر باسشىسى سونىمەن قاتار، يۋنەسكو گەوپاركىنىڭ ماسەلەسى دە وتە وزەكتى ەكەنىن اتاپ ءوتتى. وسى جىلدىڭ 1 - قاراشاسىنان باستاپ ول بويىنشا ءوتىنىم بەرىلمەك. گەوپاركتىڭ مارتەبەسى الەمدەگى بارلىق انىقتامالاردا كورسەتىلەتىن بولادى. سەبەبى، الەمدەگى كوپتەگەن ادامدار گەوپارككە ەرەكشە ىنتىق. كەلەسى جىلدىڭ سوڭىنا دەيىن اتالمىش جوبا اياقتالاتىن بولادى.