قازاقستاندا ەڭ جوعارى جالاقى الاتىن وڭىرلەردىڭ ءتىزىمى جاريالاندى

استانا. قازاقپارات - ءبىراق، ءبىر قىزىعى كوشتى استانا دا، الماتى دا ەمەس، ماڭعىستاۋ وبلىسى باستاپ تۇر.

باتىستاعى بۇقارانىڭ ايلىعى قانشا؟ وزگە قالالارداعى جاعداي قانداي؟ بۇل تۋرالى ك ت ك حابارلايدى.

جالاقى جىل سايىن وسكەنمەن، ينفلياتسيا توم مەن دجەري مۋلتفيلمىندەگى تىشقانداي ۇستاتپاي قاشىپ كەلەدى. سوندىقتان كوبىنىڭ ايلىعى شايلىعىنا دا جەتپەيدى. ءيت جىلىنىڭ العاشقى توقسانىن قورىتقان ساراپشىلار، ەلدەگى ورتاشا جالاقى كولەمى بىلتىرمەن سالىستىرعاندا 8,7 پايىزعا كوبەيدى دەگەن توقتامعا كەلدى. وسىلايشا قازاقستاندىقتاردىڭ ورتاشا جالاقىسى 152 مىڭ تەڭگەنى قۇراعان. ال، ەندى مەگاپوليستەگى تۇرعىننىڭ كوزىمەن ەسەپتەپ كورەيىك. ءبىر بولمەلى پاتەر جالداۋعا ورتاشا ەسەپپەن 80 مىڭ كەتەدى. وعان كوممۋنالدىق قىزمەتتى قوسىڭىز. كولىگى بارلار جانارمايىنا جوق دەگەندە 20 مىڭداي جۇمسايدى.

ازىق-تۇلىككە كەمى ءبىر ايدا 50 مىڭ تەڭگە شىعىندالادى. وسىنىڭ وزىنە عانا 150 مىڭ تەڭگە كەتەدى. ال قالعان بالاباقشا، بالانىڭ كەرەك- جاراعى، توي- تومالاققا بەرەتىن اقشاعا كەلگەندە تۇرعىندار ارينە تارىعادى. سوسىن امال جوق، قارىز ىزدەپ سابىلادى، نەسيەنىڭ ۇيىعىنا باتادى. ايلىق پەن ينفلياتسيا اراسىندا تەپە- تەڭدىك بولماعاندىقتان جالاقىنى كوتەرگەننەن سەپ جوق دەيدى ەكونوميستەر.

مەرۋەرت ماحمۇتوۆا، ەكونوميست:

جالپى ىشكى ءونىم 2001 -جىلدان 2017 -جىلعا دەيىن 15 ەسە ءوستى. ءبىراق، تابىس، جالاقى ءدال وسى كەزدە 17 جىلدىڭ ىشىندە 8 ەسە عانا ءوستى. جالپى ىشكى ءونىمدى العاندا تابىس مولشەرى 30 پايىزدىڭ عانا كولەمى. مىسالى، كورشى ەلدەر قىتايدى الساق، رەسەيدى الساق، ولاردا 47 پايىز. ءتىپتى، دامىعان ەلدى ايتپايىق، مەكسيكانى الساق ولاردا 38 پايىز. تۇركيادا 33 پايىز. سوندا بىزدە ەڭ تومەنگى دەڭگەيدە بولىپ تۇر.

ەڭ جوعارى جالاقى الاتىنداردىڭ كوشىن مۇنايلى ولكە ماڭعىستاۋ وبلىسى باستاپ تۇر. مۇنداعى حالىقتىڭ ورتاشا ايلىعى 282 مىڭ تەڭگەگە تەڭ. قازاقستاندا بەكىتىلگەن ورتاشا جالاقى كولەمىنەن 1,5 ەسەگە كوپ. اتىراۋ وبلىسى ەكىنشى ورىندا. ءبىر جىلدا جالاقى 9,2 پايىزعا ءوسىپ، 279 مىڭ تەڭگەگە جەتتى. ال، استانا ۇشتىككە كىرەدى. ەلورداداعى اعايىن 223 مىڭ تەڭگەنى قاناعات تۇتادى ەكەن. ەكونوميكالىق تۇرعىدا ەلدىڭ نەگىزگى دونورى سانالاتىن الماتى قالاسىنداعى جالاقى 187 مىڭ تەڭگە كولەمىندە. ەڭ جوعارى جالاقىنى قارجى، ساقتاندىرۋ سالاسىنىڭ ماماندارى الادى ەكەن. ءوندىرىس سالاسىنداعىلاردىڭ دا اۋزىنىڭ سالىمى بار.