جالقاۋلىقتى جەڭۋدىڭ ەڭ جاقسى ءادىسى

 استانا. قازاقپارات - ءبىز ۇنەمى ىستەرىمىزدى بۇگىن ىستەۋگە ەرىنىپ، ەرتەڭگە قالدىرىپ جاتامىز.

بۇل قالىپتى جاعداي. ءبىراق جالقاۋلىق جار بەرمەي، بارلىق جوسپارلارىمىزدى ورىنداۋعا كەدەرگى كەلتىرىپ جاتسا نە ىستەيمىز؟

ءبىز بۇگىن جالقاۋلىقتى جەڭەتىن ەڭ جاقسى ادىستەردى ۇسىنامىز:

1. ۇساق-تۇيەككە ءمان بەرمە

ادامداردىڭ كوبى ۋاقىتتارىن كوفە، شاي دەمدەۋمەن، پوشتاسىن تەكسەرۋمەن، الەۋمەتتىك جەلىلەردەگى جاڭالىقتاردى وقۋمەن، سۇيىكتى سايتىنداعى جاڭا كيىم توپتامالارىن تاماشالاۋمەن جانە سول سياقتى ماڭىزدى ەمەس ىستەرمەن بەكەرگە وتكىزەدى. مۇنداي ىستەرمەن اينالىسقان كەزدە جۇمىسقا بولىنگەن التىن ۋاقىتتىڭ قالاي زىر ەتىپ وتە شىققانىن بايقاماي دا قالاسىڭ. سوندىقتان، مۇنداي ۇساق-تۇيەك ىستەرگە الدانباي، بار زەيىنىڭدى جۇمىسقا شوعىرلاندىر.

2. جۇمىس جوسپارى

ءىسىڭ جىلدام ءارى تابىستى ءجۇرسىن دەسەڭ، وندا ويعا العان ماقساتتارىڭنىڭ ءبارىن تىزىمدەپ جازىپ قوي. الداعى ۋاقىتقا جۇمىس جوسپارىن جاسا. ۇزاقمەرزىمدى جانە قىسقامەرزىمدى جوسپارلار قۇر. ەسىڭدە بولسىن: ۇلكەن ىستەردى بىرنەشە كەزەڭگە ءبولىپ قويۋ كەرەك. وسىلايشا ويلانۋعا جانە دەمالۋعا ۋاقىت تابا الاسىڭ.

3. موتيۆاتسيا

ەڭبەگىڭنىڭ ءمانى تۋرالى ەسكە تۇسىرەتىن ءبىر نارسە ىستە. مىسالى، ماقساتىڭ اۆتوكولىك ساتىپ الۋ بولسىن. ونىڭ قانداي بولۋ كەرەك ەكەنىن انىقتاپ، سۋرەتىن كومپيۋتەردىڭ نەمەسە تەلەفوننىڭ جۇمىس ۇستەلىنە ورنالاستىرىپ قوي. ءوز جۇمىسىڭدى نە ءۇشىن اتقارىپ جۇرگەنىڭدى ەسكەرتىپ تۇراتىن ەسكەرتۋلەردى باسىپ شىعار. سونداي-اق، ۇلى ادامداردىڭ ماقساتتار، ارماندار تۋرالى قاناتتى سوزدەرى جازىلعان جانە موتيۆاتسيالىق كىتاپتاردى ساتىپ ال. بويىڭ بوساڭسىي باستاعاندا، دەرەۋ سول كىتاپتاردى وقى. قاناتتى سوزدەردىڭ ءبارى سەنى مىندەتتى تۇردە شابىتتاندىرادى.

4. تاڭدى دۇرىس قارسى ال

تاۋلىكتىڭ 8 ساعاتىن ۇيقىعا جۇمسا. ال ويانعان ساتتە توسەكتەن بىردەن تۇرىپ كەتپەي، بىرنەشە مينۋت كەرىلىپ-سوزىلىپ، جاڭا كۇن تۋرالى ويلان. تاڭعى جاتتىعۋ جاساۋعا ەرىنبە. بەس مينۋتتىق جەڭىل جاتتىعۋلاردىڭ ءوزى كۇنى بويى سەرگەك جۇرۋگە كومەكتەسەدى. ىستىق- سۋىق سۋدى كەزەكتەستىرىپ سەبەزگىگە (كونتراستنىي دۋش) ءتۇسۋ - اعزانى وياتىپ، وعان كۇش- قۋات بەرۋدىڭ ەڭ جاقسى ءادىسى. تاڭعى اس - كۇننىڭ جاقسى باستالۋىنىڭ كەپىلى. ول جەڭىل بولۋ كەرەك. تاڭعى اسقا سۇزبە، استىق داقىلدارى، جەمىستەر، بوتقا جانە شىرىن جەتكىلىكتى بولادى.

5. ۋاقىتتى دۇرىس پايدالانۋ

ۋاقىتتى جوسپارلاۋ ونەرى - بوس ۋاقىتىڭدى ءبىر شىنى-اياق كوفە ىشۋگە دە ۇنەمدەي الادى. ءبىز قازىر «ۋاقىت جەتپەي قالدى» دەگەن تۇسىنىككە ورىن جوق زاماندا ءومىر ءسۇرىپ جاتىرمىز. كەيدە بەرىلگەن جۇمىس كولەمىن ءبىر ساعاتتا نەمەسە ءبىر كۇندە ورىنداۋ مۇمكىن ەمەس سياقتى كورىنىپ كەتەدى. سول كەزدە بىزگە كومەككە تايم- مەنەدجمەنت كەلەدى. ءوز مىندەتتەرىمىزدى ورىنداۋ ارقىلى ءبىز ماقساتتارىمىزعا، ارمانىمىزعا كۇن سايىن جاقىنداي بەرەمىز. سول ءۇشىن دە بارىنشا تىرىسۋعا بولادى. كەيبىر كۇندەردى ساياباقتا سەرۋەندەۋ ءۇشىن، كينو تاماشالاپ نەمەسە كۇنى بويى ەشنارسە ىستەمەي، تەك قانا ەسكى سۋرەتتەردى كورىپ جاتۋ ءۇشىن ارناعان دا ءجون. ءبىراق بۇعان بويى الدىرىپ كەتپە. جالقاۋلىق - جاقسى ادەت ەمەس.

6. مەن - جارادىم!

وزىڭە ءبىر شارت قوي: مىسالى، ەگەر جوسپارداعى ءىستى اتقارا السام، وزىمە ادەمى كويلەك الامىن. سىيلىق كولەمى اتقارىلعان ىسكە بايلانىستى. سوندىقتان، ءبارى ءوز قولىڭدا!

7. ءۇزىلىس

جۇمىس اراسىندا ءۇزىلىس جاساپ تۇر. 20-30 مينۋت جۇمىس ىستەگەننەن كەيىن 5 مينۋت تىنىشتىقتا وتىر نەمەسە تازا اۋامەن تىنىستاپ كەل. وسىنداي ۇزىلىستەن كەيىن ىستەگەن ءىسىڭدى تىنىققان ميمەن دۇرىس باعالاي الاسىڭ.

8. كەيىنگە سوزا بەرمە

جالقاۋلىقتى باس كوتەرمەي تۇرىپ جەڭىپ تاستا. ەڭ باستىسى - مۇنىڭ جالقاۋلىق نەمەسە باسقا ءبىر سىرقاتتىڭ بەلگىلەرى ەكەنىن دۇرىس انىقتاپ، قاتەلەسپەۋ كەرەك. السىزدىك، كوڭىلسىزدىك، ۇيقىشىلدىق؟ ەگەر سىرقاتتىڭ وسى اتالعان بەلگىلەرى انىق بايقالماسا، وندا بۇل جالقاۋلىق. جالقاۋلىق سانامىز بەن دەنەمىزدى جاۋلاپ الماي تۇرعاندا تەز ارادا ءىستى قولعا الامىز!