+7 (701) 759 90 19
16 °С : نۇر-سۇلتان
23 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

سۇلتانماحمۇت تورايعىروۆتىڭ قاناتتى سوزدەرى

11 مامىر 00:03
:ءبولىسۋ
سۇلتانماحمۇت تورايعىروۆتىڭ قاناتتى سوزدەرى

استانا. قازاقپارات - سۇلتانماحمۇت تورايعىروۆ - ەرتە ويانعان، ەلدىڭ مۇڭ- مۇقتاجىن ەرتە ءتۇسىنىپ جىرلاعان ازامات اقىن.

بالا كۇننەن جازعان ولەڭدەرىنىڭ وزىنەن- اق ول الەۋمەتتىك تەڭسىزدىكتى، حالىقتىڭ قوعامدىق ومىرىندەگى مەشەۋلىكتى ءجىتى كوزقاراسپەن تانيدى. «قاراڭعى قازاق كوگىنە، ورمەلەپ شىعىپ كۇن بولام» دەپ، اقىن قارا باسىنداعى مىندەتتى عانا ايتىپ قويعان جوق، ءوز حالقىنىڭ دەرتىنە ەم تابۋ، مۇقتاجدىقتى، ونەرسىزدىكتى جويۋ، ءسويتىپ حالىقتى، مادەنيەتتى، ەرىكتى ەتۋدى ويلايدى. مۇنى اقىننىڭ قاناتتى سوزدەرىنەن دە اڭعارۋعا بولادى.

ەل تۇزەلسىن دەسەڭ - اۋەلى ءوزىڭدى تۇزە.

ءبىرىنشى ەل بولۋعا نامىس كەرەك، مال- جاندى نامىس ءۇشىن سالىس كەرەك.

قورلانىپ ءومىر سۇرگەن تىرشىلىكتەن، ولگەنىم ارتىق دەگەن نامىس كەرەك.

كۇنادان قورىققان ادام - كىسى اقىسىن جەمەيدى.

ونەرلى ەل - بار مۇقتاجىن جەردەن ەمەدى، بار قيىندى - تەك قانا عىلىم جەڭەدى.

ەل ءۇشىن ەڭبەك ەتسەڭ - حالقىڭا سۇيكىمدى بولاسىڭ.

ەر ولسە دە - ەلگە ەتكەن ەڭبەگى ولمەيدى.

ناداننىڭ قاقىن كىم بولسا دا جەيدى.

دۇنيە - قىزىقتىرعان قىزىل كيىك،

بار ادام قۋعان سونى كوڭىلى ءسۇيىپ.

كوپشىلىگى دالاقتاپ جەتە الماي ءجۇر،

ازشىلىعى كەنەلگەن قولعا ءتيىپ.

ميللەتكە بەك زور ءۇمىت - شاكىرت حالقى.

ەل بولۋدىڭ ءبىرىنشى تىرەگى - ءبىلىم.

بەرگەن - بۇزادى. مال مەن باقتان عىلىم ارتىق. تاماقتىڭ قۇلى بولعان قىزىل اۋىز.

تار كەۋدە، شىمشىق باسقا اقىل قونباس.

جان قايدا ادىلەتتى ىزدەيتۇعىن،

ادامشىلىق اتاقتى كوزدەيتۇعىن.

تىرلىك پەن ولگەن كۇندى بىردەي ويلاپ،

ەكى جايدان كۇدەردى ۇزبەيتۇعىن.

ارامعا ازعىرعاندى سەزبەيتۇعىن،

ارام ويدىڭ قياسىن كەزبەيتۇعىن.

كورىنىپ شايتان كەلىپ ازعىرسا دا،

ادالدىق، ار- يماننان بەزبەيتۇعىن.

كەدەي، باي، قاجى، تورە - ءبارى ءبىر باس.

بايلىقتىي پەيىلى تار: ادام بالاسىن الالايدى.

كەدەيلىك، سەن - جەكسۇرىن ءتۇسىڭ سۋىق!

ءدىن دەگەن - وتىرىككە نانۋ دەگەن.

ار ساتىپ - ىرىس جيناما.

دۇنيەدە قىزىق بار ما ولمەگەندەي.

دۇنيەنىڭ زاڭى - بيلىكتىڭ قولىندا.

ادامعا اسا قىمبات بالالىق شاق،

ويعا كىرىپ شىقپايتىن سور مەنەن باق.

بالا جانىنا - ويىن ازىق.

بايلىق - ۇرلىقتىڭ جەمىسى.

ىشتەن تىنىپ جۇرگەننەن - سونگەن ارتىق.

ادامنىڭ ەڭ ۇلى قاسيەتى - باقىتتى بولۋعا تالپىنۋ.

بۇل كۇندە شىبىن - ءتىرى، پەرىشتە - ولگەن.

قازىرگى ءومىر باقىت ىزدەگەن جاندى زالىمدىق جولىنا تۇسىرەدى.

باقىتقا جەتۋدىڭ ەڭ "جەڭىل" جولى - ەل ۇستىنەن كۇن كورۋ.

مەن - قازاق: قازاقپىن دەپ ماقتانامىن،

ۇرانعا "الاش" دەگەن اتتى الامىن.

سۇيگەنىم - قازاق ءومىرى، ءوزىم - قازاق،

مەن نەگە قازاقتىقتان ساقتانامىن.

بالاعا - ءبارى باۋىر. دوستىڭ سىرى - دوسىنا پاش.

كىسىنىڭ باسى دوپ ەمەس - اركىم ءبىر الىپ قاعاتىن.

ادام - نادان بولسا، جەر - ساراڭ بولادى.

مەن سونەرمىن - ءىسىم سونبەس!

باقىتتى بولعىسى كەلگەن ادامعا - پارىز مىندەت.

اركىمنىڭ - ءار ىسكە قابىلەتى بولادى.

نايزانىڭ كۇشىمەن جانعان باق - نايزانىڭ ۇشىندا سونەدى.

ادامدىققا سيا ما كىسى ءولتىرىپ، باتىر دەگەن ات تاۋىپ، مەدال الماق.

دۇنيە - جەۋ- جەگىزۋ مايدانى ەكەن. دۇنيەدەن جەيتۇعىن اۋىز قۇرىماي - ادىلدىك ورنامايدى. ءادىل بولىپ بايقادىم نە ءوندىردىم، بۇل باسىم زالىم بولىپ ءبىر بايقاسىن.

قارتايعاندا ىرقىڭا دۇنيە تۇگىل، دەنەڭ دە كونبەيدى. قارتايماۋ - قولدان كەلمەيتىن ءىس. كارىلىك: بۇل كۇندە ۇيقى، تاماق، قايعى جولداس.

پايدانى ەندى ويلايمىن ءوز باسىما،

حوش ايتىپ يدەيا دەگەن جولداسىما.

ەندى مەن جەر سۇيەمىن، بايلىق جيام،

كوپ ويدىڭ كوڭىلىم سەندى بولماسىنا.

دۇنيەدەن وتكەننەن سوڭ جەر بەتى جۇماققا اينالسا دا - ودان بىزگە نە پايدا.

قىز سىنى: اق ساۋلە، كۇمىس ءجۇزدى، قۇندىز قاباق،

سەن - گۇلسىڭ شاشقان جۇپار جارىپ ساباق.

بولعاندا كوزىڭ - جاقۇت، ەتىڭ - تورعىن،

قاسىڭ - اي، شاشىڭ - جىبەك، مامىق - تاماق.

كوزىڭ - نۇر، اۋزىڭ - الما، ءسوزىڭ - التىن،

سامورود قوسپاسى جوق، ناعىز بالعىن.

شومىلعان سۇڭقار بويىڭ ناق گاۋھارداي،

بۇرقىراپ نۇر توگىلسىن - ماعان تالپىن.

نە شارا سوقىر بولسا كوڭىل كوزى. ءوزى - ماس، كوڭىلى - تاس.

ولەڭ- جىر - كوڭىلدى تۇزەتەتىن ماشينا.

دۇنيە دەگەن ۋ ەكەن - الداپ سوعار قۋ ەكەن.

ءسوزىڭ - ءوزىڭ. دوس ىزدەدىم، قارماندىم، تاۋىپ ەدىم - الداندىم.

جۇرەگىم، تۋلاپ شاباسىڭ، جوقتى قايدان تاباسىڭ.

ءبىر- اق جازىق قازاقتا - ۇلى- قىزى مازاقتا.

قىزىق - جانىڭدى قىزدىرار، قايعى - قانىڭدى بۇزدىرار.

ەر بار ما ەلى ءۇشىن جان قياتىن، باسشى بار ما ەتەگىنە ەل سياتىن.

جاننىڭ ءبارى ءوز ءىسىن ماقۇلدايدى، ادام قايدا سەزەتىن ار- ۇياتىن.

قايدان تابام حالىقتىڭ شىن بالاسىن.

اناۋ قىردا تاتار تۇر - باسقالارمەن قاتار تۇر،

مىناۋ ويدا قازاق تۇر - قاستارىندا ازاپ تۇر.

اشۋدى قوي - سەرىك بول اقىل دوسقا. تۇزەلسىن كوڭىلى اۋلىككەن ادام قايدان.

بارلىق ادام بالاسى وزىندەي كورسە وزگەنى - وزبىرلىقتىڭ ءوشىپ قاراسى، وزىمشىلدىكتىڭ ولگەنى.

ادەمدەگى عالامات - يگىلىككە عانا ارنالسا،

ونەرى ارتىق ازامات - ەڭبەكتە عانا ارلانسا.

وقۋ- ءبىلىم كوركەيمەك - ەلگە ەگىپ پايداسىن

، ەل جەتىلىپ كوركەيمەك - ونەر قانات جايعاسىن.

كوركەيتۋگە الاشتى قۇربان ءبىزدىڭ جانىمىز!

كىنا ىزدەگەن - كىنامشىل. كوپىرمە ءسوز - كوسىلمە.

ەركە قىز - جىبەك ارقان، حاس سۇلۋ - جاراتىلىسقا ماقتان.

ءومىر - قىسقا، بەينەتى - كوپ.

قانىپەزەر - ادام ولتىرەدى، كۇنشىلدەر - جۇرەكتى ولتىرەدى.

مىڭ جىل عۇمىر كەشسەڭ دە - ارمان دەگەن تاۋسىلمايدى.

تاۋ باسىندا تۇرعاندى - جارعا يتەرمە.

ابىروي- ىنتىماق - بىرلىك بار جەردە عانا جۇرەدى.

ولەر جەردەن كەتتىك ءبىز! وسى كۇنگە جەتتىك ءبىز! جاسايدى الاش - ولمەيمىز!

سەزىمنىڭ سىرتقا شىقپاس ءتۇسى بار ما،

ونى جاسىرار ادامنىڭ كۇشى بار ما.

بىرەۋ - كۇي، بىرەۋ - ءپىشىن،

بىرەۋ - سوزبەن، كورسەتپەيتىن جۇرەكتىڭ ءىشى بار ما.

Massaget.kz


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات