قازاقستاندا فيلم تۇسىرۋشىلەر سالىقتان بوساتىلادى - مينيسترلىك
بۇل تۋرالى مادەنيەت جانە سپورت مينيسترلىگى زاڭ قىزمەتى دەپارتامەنتىنىڭ ديرەكتورى كۇمىس سەيىتوۆا «كينەماتوگرافيا تۋرالى» جاڭا زاڭ جوباسىن تانىستىرۋ بارىسىندا ايتتى.
«قازىرگى ۋاقىتتا كينەماتوگرافياداعى بارلىق پروتسەستەر «مادەنيەت تۋرالى» زاڭنىڭ بىرنەشە باپتارىمەن عانا رەتتەلىپ وتىر. ارينە، بۇل كينو سەكىلدى اۋقىمدى سالانى تولىق رەتتەۋگە مۇمكىندىك بەرمەيدى. ا ق ش، فرانتسيا، گەرمانيا، رەسەي، ۇلىبريتانيا، قىتاي سەكىلدى جەتەكشى ەلدەردىڭ تاجىريبەسىنە سۇيەنە وتىرىپ، ماڭىزدى ماسەلەنى زاڭنامالىق دەڭگەيدە رەتتەۋدى ۇسىنىپ وتىرمىز» ، - دەدى م س م زاڭ قىزمەتى دەپارتامەنتىنىڭ ديرەكتورى كۇمىس سەيىتوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
دەپارتامەنت ديرەكتورىنىڭ ايتۋىنشا، اتالعان زاڭ جوباسىندا ءبىرقاتار سالىقتىق جەڭىلدىكتەر قاراستىرىلعان.
«زاڭ جوباسىندا قازاقستان رەسپۋبليكاسىندا تۇسىرىلگەن فيلمدەر ءوندىرىسىن قوسىمشا قۇن سالىعىنان بوساتۋ ۇسىنىلدى. سونداي- اق، ۇلتتىق فيلم كورسەتۋ بارىسىندا كينوتەاترلاردى كورپوراتيۆتىك تابىس سالىعىنان بوساتۋ دا قاراستىرىلدى. اتالعان جوبا قازىر ق ر پارلامەنتى ماجىلىسىندە قارالىپ جاتىر» ، - دەدى كۇمىس سەيىتوۆا.
سونداي- اق، باسپا ءسوز ءماسليحاتىنا قاتىسقان رەجيسسەر جانە پروديۋسەر احات يبرايەۆ قازاقستاندا تۇسىرىلەتىن شەتەلدىك جوبالارعا سالىقتىق جەڭىلدىك جاساپ، ونداعى ءتۇسىرىلىم توبىنىڭ 50 پروتسەنتىن قازاقستاندىقتاردان قۇراۋدى مىندەتتەۋ قاجەتتىگىن ايتتى.
«كوپتەگەن شەتەلدىك ستۋديالار قازاقستانعا ءتۇسىرىلىم جاساۋعا قىزىعۋشىلىق تانىتىپ وتىر. ولاردى قازاقستانعا شاقىرىپ، وسىدان 4 جىل بۇرىن تۇسىرىلگەن «ماركو پولو» سەكىلدى جوبالاردى كوبەيتۋ ءۇشىن سالىقتىق جەڭىلدىكتەر جاساۋ كەرەك. ءبىراق، مۇنداي جەڭىلدىكتەر ءتۇسىرىلىم توبىنىڭ كەم دەگەندە 50 پروتسەنتى قازاقستاندىقتار بولسا عانا جاسالۋى ءتيىس. مۇنداي جوبالاردا جۇمىس ىستەۋ ارقىلى بىلىكتىلىكتى كوتەرۋگە، جەرگىلىكتى شىعارماشىلىق مامانداردىڭ دەڭگەيىن ارتتىرۋعا بولادى» ، - دەيدى احات يبرايەۆ.