قازاقستاندا كورسەتىلەتىن فيلمدەردى قازاق تىلىنە اۋدارۋ مىندەتتەمەسى وزگەرتىلدى

 استانا. قازاقپارات - مادەنيەت جانە سپورت مينيسترلىگى پارلامەنت قاراۋىندا جاتقان «كينەماتوگرافيا تۋرالى» زاڭ جوباسىندا فيلمدەردى قازاق تىلىنە دۋبلياجاۋ مىندەتتەمەسىنە وزگەرىس ەنگىزدى، دەپ حابارلايدى قازاقپارات ءتىلشىسى.

ايتا كەتەيىك، قولدانىستاعى 2006 -جىلعى 15 - جەلتوقسانداعى ق ر مادەنيەت تۋرالى زاڭىنىڭ 28-4 - بابىندا «شەتەل تەلەارنالارىنان رەترانسلياتسيالانعان فيلمدەردى قوسپاعاندا، پروكاتتاۋ ماقساتىندا ق ر اۋماعىنا اكەلىنەتىن بارلىق فيلمدەرگە قازاق تىلىندە دۋبلياج جاسالۋى تيىس» دەپ كورسەتىلگەن.

«وزدەرىڭىزگە ءمالىم، مادەنيەت تۋرالى زاڭدا كورسەتىلگەن قازاقستان اۋماعىندا بارلىق فيلمدەر قازاق تىلىندە دۋبلياجدالۋى ءتيىس دەگەن نورما جۇمىس ىستەمەيدى. بۇل نورمانى ءبىز وزگەرتىپ وتىرمىز. قازاقستانعا ورتاشا ەسەپپەن العاندا، جالپى 300 گە جۋىق فيلم جەتكزىلەدى، ولاردىڭ باسىم بولىگى - ماڭىزى زور، تاربيەلەۋگە باعىتتالعان، ينتەللەكتۋالدى نەمەسە الەۋمەتتىك ماڭىزى بار فيلمدەر قاتارىنا جاتپايتىن شەتەلدىك فيلمدەر. سوندىقتان ولاردى مىندەتتى دۋبلياجداۋ بۇگىنگى كۇنگە قاجەت ەمەس» ، - دەدى م س م زاڭ قىزمەتى دەپارتامەنتىنىڭ ديرەكتورى كۇمىس سەيىتوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ ايتۋىنشا، اتالعان نورماعا بالاما رەتىندە قازاق تىلىندە سۋبتيترلاۋ نەمەسە كادردان تىس اۋدارما قوسىلادى.

«ناتيجەسىندە، زاڭ جوباسى اياسىندا قازاقستاندا شىعارىلعان نەمەسە ق ر اۋماعىندا پروكاتتاۋ ماقساتىمەن اكەلىنگەن فيلمدەردى قازاق تىلىنە دۋبلياجداۋ نەمەسە سۋبتيترلەۋ نەمەسە كادردان تىس اۋدارۋ قاجەتتىگى قاراستىرىلىپ وتىر. بۇل بارلىق جاعىنان ءتيىمدى نورما دەپ ەسەپتەيمىز» ، - دەپ ءوز ءسوزىن تۇيىندەدى ك. سەيىتوۆا.

فوتو: top-master.biz