19:09, 10 - مامىر 2018 | GMT +6
استانادا كوز تۇرتسە كورگىسىز قاراڭعىلىقتا ەرەكشە كونسەرت وتەدى
استانا. قازاقپارات - 16 - مامىردا «استانا وپەرا» تەاترىنىڭ كامەرالىق زالىندا «قاراڭعىدا شىرقالاتىن مۋزىكا» اتتى بىرەگەي قايىرىمدىلىق جوباسىنىڭ تۇساۋى كەسىلەدى، دەپ حابارلايدى قازاقپارات استانا قالاسى اكىمدىگىنىڭ رەسمي سايتىنا سىلتەمە جاساپ.
ارتىستەر كوزگە تۇرتسە كورگىسىز قاراڭعىدا وتەتىن قىزىقتى مۋزىكالىق- پوەزيالىق باعدارلاما ۇسىنادى.
«قاراڭعىدا وتەتىن كونسەرتتەر مۋزىكانى، قورشاعان ورتانى، تانىس ادامدار مەن ءوزىڭدى قابىلداۋداعى قالىپتاسقان تۇيسىكتەردى وزگەرتەدى. قاراڭعىلىق قيالداۋ مەن ەلەستەتۋدى جەدەلدەتەدى. كورەرمەن مۋزىكانى ەستىپ قانا قويماي، سونداي- اق ونى «كورە الادى».
جوباعا «استانا وپەرا» تەاترىنىڭ وپەرا سوليستەرى مەن وركەستر ارتىستەرى، سونىمەن بىرگە زاعيپ كاسىبي مۋزىكانتتار قاتىسىپ، كلاسسيك كومپوزيتورلار مەن ۇلتتىق اۆتورلاردىڭ تۋىندىلارىن ورىندايدى. كونسەرتتە ولەڭدەر دە وقىلادى.
جوبانىڭ ماقساتى - مۇمكىندىگى شەكتەۋلى جاستاردىڭ ماسەلەلەرىنە كوڭىل ءبولۋ.