ۇلىتاۋدا قازاقتىڭ داستۇرلەرى ۇلىقتالدى
«وتكەن جىلى وتكىزىلگەن «ۇلىتاۋ قىمىزى» جانە بيىلعى «كوكمايسا» فەستيۆالدەرى ءوڭىردىڭ تۋريستىك الەۋەتىن ارتتىرۋعا باعىتتالعان. فەستيۆال اياسىندا قازاقتىڭ ۇلتتىق سالت-داستۇرلەرى سالتانات قۇرىپ، قازاقتىڭ ماتەريالدىق ەمەس قۇندىلىقتارى ناسيحاتتالادى»، - دەدى ۇلىتاۋ اۋدانى اكىمىنىڭ ورىنباسارى باعدات بايجانتايەۆ.
«كوكمايسا» فەستيۆالىنە كيىز ۇيلەر تىگىلىپ، شاعىن جارمەڭكە ۇيىمداستىرىلدى. وندا جەرگىلىكتى تۇرعىندار قىمىز، ايران، ماي، قايماق سىندى ونىمدەرىن كەلگەن قوناقتارعا ۇسىندى.
فەستيۆال قوناقتارى مەن قاتىسۋشىلارى اتقا ءمىنىپ، ۆەلوسيپەد تەبۋىپ، ۇلىتاۋعا شىعىپ دەمالۋعا، سونداي-اق ولار جوشى حان مەن الاشا حان مازارلارىنا بارۋعا مۇمكىندىك الدى.
ۇيىمداستىرۋشىلاردىڭ سوزىنە قاراعاندا، ەندى «كوكمايسا» فەستيۆالى جىل سايىن وتكىزىلمەك. ولار بۇل شارانى «تەرىساققان كوكتەمى» ەتنوفەستيۆالىنىڭ ءبىر بولىگى دەپ وتىر.
ەسكە سالا كەتەيىك، «تەرىساققان كوكتەمى» ەتنوفەستيۆالى - بىرەگەي مەرەكە، سەبەبى قازاق جىلقى وسىرۋشىلەرىنىڭ مەرەكەلىك راسىمدەرى تەرىساققان اۋىلىندا عانا ساقتالعان.
مەرەكە شەتەلدىكتەر اراسىندا زور تانىمالدىققا يە بولعان ەدى. «تەرىساققان كوكتەمىنە» پولشا، رەسەي، ۋكراينا، وزبەكستان، قىرعىزستاننان قوناقتار، «National geographic»، قازاقستان ۇلتتىق گەوگرافيا قوعامىنىڭ وكىلدەرى، عالىمدار كەلگەن.