رەسەيدە قازاقستاندىق جاۋىنگەرلەردىڭ ەسكەرتكىشى جاڭارتىلدى
كۇردەلى جوندەۋ جۇمىستارى كەزىندە مەموريالدىق كەشەن جاڭارتىلىپ، اۋماعى كەڭەيدى، دەپ حابارلايدى قازاقپارات ءتىلشىسى اكىمدىكتىڭ باسپا ءسوز قىزمەتىنە سىلتەمە جاساپ.
بۇگىن رەسەيدىڭ تۆەر وبلىسى، رجيەۆ قالاسىندا 100 جانە 100 اتقىشتار بريگاداسىنىڭ مەموريالدىق كەشەنى اشىلدى. شاراعا ءوڭىر باسشىسى بەردىبەك ساپاربايەۆ باستاعان اقتوبە وبلىسىنىڭ دەلەگاتسياسى قاتىستى.
ونىڭ قۇرامىنا اۋعان سوعىسىنىڭ جاۋىنگەر-ينتەرناتسيوناليستەرى قوعامدىق بىرلەستىگىنىڭ ءتوراعاسى، رجيەۆ شايقاسىنىڭ قاتىسۋشىسى بالقاسىن كەنجەعاريننىڭ نەمەرەسى اسلان بالقاسىنوۆ، رجيەۆ شايقاسىنىڭ قاتىسۋشىسى ەرماك كۋجيەۆتىڭ قىزى ءاليما كۋجيەۆا، ءاليا مەن مانشۇك اتىنداعى «قوس شىنار» قوعامدىق بىرلەستىگىنىڭ ءتوراعاسى ع. بايدەربەس، جازىۋشى مەيىرحان اقداۋلەت ۇلى بار. سونىمەن قاتار، قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆ، تۆەر وبلىسىنىڭ گۋبەرناتورى يگور رۋدەنيا، ارداگەرلەر، تىل ەڭبەككەرلەرى، قازاقستاندىق ستۋدەنتتەر مەن قالا تۇرعىندارى قاتىستى.
«جەڭىس كۇنى - ەڭ ماڭىزدى مەرەكەلەردىڭ ءبىرى. حالىقتىڭ بىرلىگى، سوعىس الاڭدارىنداعى جاپپاي ەرلىك پەن تىلداعى ءتوزىمدى ەڭبەكتىڭ ارقاسىندا جەڭىسكە قول جەتكىزدى. سوعىس جىلدارىندا اقتوبە وبلىسىنىڭ 122 مىڭنان استام تۇرعىنى مايدانعا اتتاندى، ونىڭ ىشىندە 36 مىڭ ادام قازا تاپتى. ءبىز ەلىمىزدى قورعاپ، الەمدى قۇتقارعان اعا بۋىننىڭ ەرلىكتەرىن ەشقاشان ۇمىتپايمىز. قۇرمەتتى سوعىس ارداگەرلەرى جانە تىل ەڭبەككەرلەرى! وسى جارقىن كۇنى سىزدەردىڭ ۇلى ەرلىكتەرىڭىزگە، باتىلدىقتارىڭىز بەن تاباندىلىقتارىڭىز ءۇشىن شىنايى قۇتتىقتاۋلار مەن العىس سوزدەردى قابىل الىڭىزدار»، - دەدى وبلىس باسشىسى بەردىبەك ساپاربايەۆ.
شاراعا قاتىسقان يمانعالي تاسماعامبەتوۆ قۇرىلىس جۇمىستارىن جۇرگىزىپ، ەسكەرتكىشتى قالپىنا كەلتىرگەن اقتوبە وبلىسىنىڭ اكىمدىگىنە العىسىن ءبىلدىردى.
«بۇگىن ءبىز ادامزات تاريحىنداعى ەڭ قاندى رجيەۆ شايقاسىنا قاتىسقان ەكى اتقىشتار بريگاداسىنىڭ جاۋىنگەرلەرىنە قۇرمەت كورسەتەمىز. شايقاستىڭ اياقتالعانىنا 73 جىل بولدى، ال شىعىندارى اياعىنا دەيىن سانالماعان. ءبىزدىڭ مىندەتىمىز - بالالارىمىز بەن نەمەرەلەرىمىزگە، اتا-بابالارىمىز ايتقان سوعىس تۋرالى شىندىقتى جەتكىزۋ»، - دەدى ديپلوماتيالىق ميسسيا باسشىسى ي. تاسماعامبەتوۆ.
رەسەيدە قازاقستاندىق جاۋىنگەرلەردىڭ ەسكەرتكىشى جاڭارتىلدىسونىمەن قاتار، تۆەر وبلىسىنىڭ گۋبەرناتورى ي. رۋدەنيا اقتوبە وبلىسىنىڭ تۇرعىندارىنا اتقارعان جۇمىستارى ءۇشىن العىسىن ءبىلدىردى. كەيىن اقتوبە جانە تۆەر وبلىستارىنىڭ شىعارماشىلىق ۇجىمدارى كونتسەرتتىك باعدارلاما ۇسىندى. ولار سوعىس جىلدارىنداعى تانىمال اندەردى ورىندادى. كەشەنگە ۇنەمى كۇتىم جاسالاتىن بولدى. سەبەبى، مەموريالدىق كەشەندى رجيەۆ قالاسىنىڭ كوممۋنالدىق مەنشىگىنە بەرۋ تۋرالى كەلىسىمگە قول قويىلدى.
ايتا كەتەيىك، 1942-جىلدىڭ جەلتوقسانىندا الماتى مەن اقتوبە قالالارىندا 100 جانە 101 اتقىشتار بريگاداسى قۇرىلدى. جاۋىنگەرلىك وپەراتسيا كەزىندە قازاقستاندىق بريگادا ءوز اسكەرىنىڭ 80 پايىزعا جۋىعىن جوعالتقانىمەن وزدەرىنە جۇكتەلگەن ميسسيانى ورىندادى. اقتوبە وبلىسى اكىمىنىڭ باسپا ءسوز قىزمەتىنىڭ حابارلاۋىنشا، 2010-جىلى مەملەكەت باسشىسىنىڭ تاپسىرماسى بويىنشا ۇلى جەڭىستىڭ 65 جىلدىعىنا وراي قازاقستان ەلشىلىگى اقتوبە وبلىسىنىڭ اكىمدىگىمەن بىرلەسىپ، رجيەۆ قالاسىندا قازاقستاندىق جاۋىنگەرلەرگە ارنالعان مەموريالدىق كەشەن سالدى. بيىل مەموريالدىق كەشەن قايتا قالپىنا كەلتىرىلدى، كەڭەيتىلىپ، گرانيت پليتكاسى اۋىستىرىلدى. «تۋعان جەر» تۇعىرى قايتا جاڭارتىلىپ، كوگالداندىرۋ، اباتتاندىرۋ جۇمىسى جۇرگىزىلدى.
اۆتور: التىناي ساعىندىقوۆا