الماتىدا «حالىق بارىسىنىڭ» جەڭىمپازدارى انىقتالدى

استانا. قازاقپارات - الماتىدا العاش رەت ۇلتتىق سپورت ءتۇرى بەلدەسۋدەن اشىق رەسپۋبليكالىق «حالىق بارىسى» تۋرنيرى ءوتتى.

بايراقتى باسەكەنىڭ جۇلدە قورى 20 ميلليون تەڭگەنى قۇرادى، دەپ حابارلايدى اقپاراتتىق جانە سپورتتىق حاب.

قازاقستاننىڭ ءار ايماعىنان كەلگەن بالۋاندار «سۇڭقار» حالىقارالىق شاڭعى ترامپليندەر كەشەنىندە جارىس جولىنا شىقتى. جەكپە-جەكتەر جاسىل ءشوپ توسەلگەن ارنايى كىلەمدەردە ۇيىمداستىرىلدى.

سپورتتىق شارانىڭ سالتاناتتى اشىلۋ ءراسىمى ءبىر كۇن بۇرىن وتان قورعاۋشى كۇنى «حالىق بارىسى» تۋرنيرىنە ارنالعان گالا-كونسەرتپەن باستالدى. سونىمەن قاتار، الماتى قالاسىنىڭ اكىمى باۋىرجان بايبەك، حالىقارالىق قازاق كۇرەسى فەدەراتسياسىنىڭ باسشىسى، ەنەرگەتيكا ءمينيسترى قانات بوزىمبايەۆ، «قازاقستان بارىسى» يدەياسىنىڭ اۆتورى ارمان شورايەۆ قۇتتىقتاۋلارىن جەتكىزىپ، قاتىسۋشىلارعا ساتتىلىك تىلەدى.

«كونە كۇرەسىمىزدى جاڭعىرتۋ ماقساتىندا بەلدەسۋدەن وسىنداي تۋرنيردى العاش رەت وتكىزدىك. بەلدەسۋ قازاق كۇرەسىنىڭ ءبىر تارماعى بولعانىمەن، كيىم ۇلگىسىمەن، جەڭىل ەرەجەلەرىمەن ەرەكشەلەنەدى. جاپونيادا دزيۋدومەن قاتار سۋمو بار، ءدال سولاي بىزدە دە قازاق كۇرەسىمەن قاتار بەلدەسۋ بولادى. وسى باسەكەنى ۇيىمداستىرىپ جاتقان قالا اكىمدىگى مەن الماتى قالاسى دەنە شىنىقتىرۋ جانە سپورت باسقارماسىنا شەكسىز العىسىمدى بىلدىرەمىن. بەلدەسۋ حالىقتىڭ كوڭىلىنەن شىعىپ، ەل قىزىعىپ، تاماشالايتىن سپورت تۇرىنە اينالاتىنىنا سەنىمدىمىن. «حالىق بارىسى» جىل سايىن وتكىزىلىپ، ەلىمىزدىڭ يگى داستۇرىنە اينالادى دەگەن ويدامىن»، - دەدى ارمان شورايەۆ.

بەلدەسۋ بالۋاننىڭ جاسى مەن سالماعىنا شەكتەۋ قويىلمايتىن ناعىز حالىقتىق سپورت. وسى تۋرنيردىڭ بىردەن-ءبىر ەرەكشەلىگى دە سول، جارىسقا 18-50 جاس ارالىعىنداعى بارلىق قالاۋشىلار قاتىسا الادى.

الامان دودانىڭ ناتيجەسىندە، بالۋانداردىڭ ىشىنەن جۇزدەن جۇيرىگى، مىڭنان تۇلپارى انىقتالدى. قىزىقتى دا تارتىستى فينالدىق جەكپە-جەكتىڭ جەڭىمپازى «الماتى بارىسى-2015» چەمپيونى ماقسات قيقيموۆ اتاندى. «كۇش اتاسىن تانىماس» دەمەكشى، 80 كەلى سالماقتاعى ماقسات قيقيموۆ 100 كەلى سالماقتاعى قارسىلاسىن تالعات جيەنتايەۆتى تىزە بۇكتىردى. ال قولا جۇلدەنى ايتۋار ابدۋلوۆ ولجالاسا، ءتورتىنشى ورىندى ادىلەت داۋلانبايەۆ قاناعات تۇتتى.

«جەڭىس وڭاي بەرىلگەن جوق. جارىسقا مىقتى پالۋاندار، كۇرەستىڭ بارلىق تۇرلەرىنىڭ سپورت شەبەرلەرى قاتىستى. ەلباسىمىزعا ۇلتتىق سپورت تۇرلەرىن دامىتىپ جاتقانى ءۇشىن العىس بىلدىرەمىن. سونىمەن قاتار، جانكۇيەرلەر مەن ۇيىمداستىرۋشىلارعا ريزاشىلىعىم شەكسىز»، - دەپ ءبولىستى ماقسات قيقيموۆ.

«حالىق بارىسى» جەڭىمپازى التىن بەلبەۋ مەن 10 ميلليون تەڭگە اقشالاي سىيلىققا يە بولدى. ال ەكىنشى، ءۇشىنشى جانە ءتورتىنشى ورىن يەگەرلەرىنە 5,3 جانە 2 ميلليون تەڭگە كولەمىندە اقشالاي ۇتىستار تابىستالدى.

سونىمەن قاتار، بارلىق پالۋاندارعا لاۋازىمدى تۇلعالار اتىنان شاپان جابىلدى.

ايتا كەتەيىك، بۇل كۇرەس ءتۇرى الەم بويىنشا وليمپيادا ويىندارىنا كىرمەيتىن سپورت تۇرلەرى قاتارىنا رەسمي تۇردە ەنىپ، يۋنەسكونىڭ قولداۋىنا الىنعان.