سۋعا باتىپ كەتە جازداعان بالىقشى اعاشقا ورمەلەپ، امان قالدى

 پاۆلودار. قازاقپارات - ەرتىس وزەنىنىڭ بىسترۋشكا اعىسىندا بالىق اۋلاپ وتىرعان اقسۋ قالاسىنا قاراستى ەڭبەك اۋىلدىق ايماعىنىڭ تۇرعىنى زارداپ شەكتى.

5 - مامىر كۇنى ساعات 21.40-تا پاۆلودار قالاسىنىڭ «112» نومىرىنە وقىس جاعداي ورىن العانى تۋرالى حابارلاما تۇسكەن، دەپ حابارلايدى pavlodarnews.kz وبلىستىق توتەنشە جاعدايلار دەپارتامەنتىنە سىلتەمە جاساپ.

«كەشكى ۋاقىتتا بالىق اۋلاعان ازامات سۋ دەڭگەيىنىڭ كوتەرىلگەنىن بايقاماي قالعان. ءجۇزۋ قۇرالدارى بولماعاندىقتان، اعاشقا ورمەلەپ شىعۋىنا تۋرا كەلگەن. بىردەن شۇعىل تۇردە وقيعا ورنىنا اقسۋ قالاسى توتەنشە جاعدايلار ءبولىمىنىڭ جاۋاپتى تۇلعاسى مەن №7 قۇتقارۋ ءبولىمىنىڭ قۇتقارۋشىسى ءجۇزۋ قۇرالىمەن شىقتى. الايدا قۇتقارۋشىلار جەتكەنگە دەيىن سول ماڭايدا ءجۇزۋ قۇرالىمەن بالىق اۋلاپ وتىرعان جەرگىلىكتى تۇرعىندار ەر ادامدى اعاشتان ءتۇسىرىپ، قاۋىپسىز جەرگە جەتكىزگەن» ، - دەيدى دەپارتامەنتتە.

قۇتقارۋشىلار قازىرگى تاڭدا ءشۇلبى گەس- ىنەن تابيعاتتى قورعاۋ ماقساتىندا سۋ جىبەرۋدىڭ ناتيجەسىندە ەرتىس وزەنى جاعادان شىعىپ، جايىلىم جەرلەردى سۋ باساتىنىن ەسكە سالادى. وسىعان بايلانىستى اۋەسقوي بالىقشىلارعا جانە سۋ ايدىندارى ماڭىندا دەمالۋدى ۇناتاتىن ازاماتتارعا تاۋلىكتىڭ قاراڭعى كەزىنە دەيىن بوگەلمەۋدى جانە سۋداعى قاراپايىم قاۋىپسىزدىك ەرەجەلەرىن ساقتاۋدى سۇرايدى.