قازاقستان اسكەرىنىڭ «مەن قازاقپىن!» اتتى ءانى الەۋمەتتىك جەلىلەردە كەڭىنەن تاراپ كەتتى

 استانا. قازاقپارات - قازاقستان اسكەرىنىڭ «مەن قازاقپىن!» اتتى ءانى الەۋمەتتىك جەلىلەردە كەڭىنەن تاراپ كەتتى. اتالعان شىعارمانى قارۋلى كۇشتەر ساربازدارى كەشەگى جاۋىنگەرلىك پاراد كەزىندە ورىنداپ شىقتى، دەپ حابارلايدى قازاقپارات ءتىلشىسى.

جەلى قولدانۋشىلارى رۋحتى كوتەرەتىن وسىنداي اندەر كوبىرەك بولسا ەكەن دەگەن تىلەكتى ءجيى ءبىلدىرىپ جاتىر. «رۋحتى كوتەرەتىن وسىنداي جۇرەككە جاقىن جاقسى اندەر ءبىزدىڭ اسكەرگە وتە قاجەت. كەزىندە جاۋگەرشىلىك جورىقتاردا ءبىزدىڭ باتىر اتا- بابالارىمىز ءۇش ءجۇزدىڭ ءبىر عانا سوزدەن تۇراتىن ۇرانىن ەستىگەندە اتويلاپ جاۋعا شاپقان عوي. رۋحتى كوتەرەتىن، ۇلتىمىزدىڭ ءقادىر- قاسيەتىن دارىپتەيتىن پاتريوتتىق ونەر شىعارمالارى كوپ بولسا ەكەن» ، - دەيدى حانىم ەسىمدى ءبىر وقىرمان.

 كەشەگى پارادتان كەيىن «قازاقستان» ر ت ر ك باسشىسى ەرلان قارين دە «مەن قازاقپىن!» اتتى شىعارمانى ءوزىنىڭ پاراقشاسىنا جۇكتەدى. وسى ۋاقىتقا دەيىن ونى 19 مىڭ ادام قاراپ شىقتى. ە. قاريننىڭ پاراقشاسىنان مىڭعا جۋىق ادام پەرەپوست ءبولىستى.

ق ر قورعانىس مينيسترلىگىنىڭ اقپاراتىنا سايكەس، «مەن قازاقپىن» اتتى شىعارما قازاقستان قارۋلى كۇشتەرىندە جاۋىنگەرلەردىڭ رۋحىن وياتاتىن ءان رەتىندە كەڭىنەن تانىمال. بۇل ءاندى جاۋىنگەرلەر ساپتا، مارشتار مەن جورىقتاردا، دەمالىس ۋاقىتتارىندا ورىندايدى. اسكەري بولىمدەردە كوركەمونەرپازدار ۇيىمدارى مەن اسكەري وركەسترلەر ول ءاندى ءوز رەپەرتۋارلارىنا قوسقان. ونىڭ باسقا مۋزىكالىق شىعارمالاردان باستى ەرەكشەلىگى سول، بۇل ءان ازاماتتاردىڭ پاتريوتتىق سەزىمدەرىن وياتىپ، كوكەيلەرىنە ءوز حالقىنا، ءوز ەلىنە دەگەن سۇيىسپەنشىلىكتى ۇيالاتادى.