تۇركىمەنستاندا ايەلدەرگە دۇرىس كيىنبەگەنى ءۇشىن ايىپپۇل سالادى

  استانا. قازاقپارات - تۇركىمەنستاندا ايەلدەردىڭ سىرتقى كيىمىنە بايلانىستى جاڭا تالاپتارعا ساي جەرگىلىكتى تۇرعىنداردى جاۋاپ الۋعا شاقىرىپ، بيلىك وكىلدەرى ولاردى جازالاي باستادى، دەپ حابارلادى ورتالىق ازيانىڭ جاڭالىقتار قىزمەتى.

ءساۋىر ايىنىڭ سوڭىندا تۇركىمەنستاندا مەملەكەتتىك مەكەمەلەردە ىستەيتىن ايەلدەردەن بويانباۋىن تالاپ ەتە باستاعان. بۇعان قوسا، ايەلدەر ۇزىن ءارى كەڭ كويلەك كيىپ ءجۇرۋى ءتيىس.

اشحاباد تۇرعىنى شەمشات استانالىق "التىن اسىر" بازارىنا كىرە بەرىستە پوليتسيا قىزمەتكەرىنىڭ جاۋاپ الۋىنا تاپ بولعان. ايەلدىڭ ايتۋىنشا، پوليتسيا قىزمەتكەرى ونىڭ شاشى، قاسى مەن تىرناعى نەگە بويالعانىن سۇراپ، ونى پوليتسيا بولىمشەسىنە الىپ بارعان. كيگەن كولەگى تىم تار، قولى شولاق ەكەنى ايتىلعان.

پوليتسيا قىزمەتكەرى ايەلدىڭ ايىپپۇل تولەۋىن تالاپ ەتكەن. اشحاباد تۇرعىنى مۇنداي تىيىمدى ءبىرىنشى مارتە ەستىپ تۇرعانىن ايتىپ، ەندى مۇنداي كويلەك كيمەۋگە ۋادە بەرگەن.

«ءبىراق پوليتسيا قىزمەتكەرلەرى ايىپپۇلسىز بوساتپايتىنىن ەسكەرتتى. سول سەبەپتى مەن 150 مانات (شامامەن 40 دوللار) ۇستەل ۇستىنە قويۋىما تۋرا كەلدى. ايىپپۇل تولەنگەنى تۋرالى كۆيتانتسيا بەرگەن جوق. ءبىراق مەن سولاي قۇتىلعانىنا دا قۋاندىم، ايتپەسە ولار حاتتاما تولتىرعىسى كەلگەن»، - دەدى شەمشات.

بۇعان دەيىن حابارلانعانداي، جاڭادان ەنگىزىلگەن ءتارتىپتى ەڭ اۋەلى مەملەكەتتىك مەكەمە قىزمەتكەرلەرى مەن ستۋدەنتتەر ساقتاۋى ءتيىس.
turkystan.kz