تانىمال تارباعاتايلىق توكپە اقىن سەرىكحان جاقيانوۆ ومىردەن ءوتتى

وسكەمەن. قازاقپارات - ايتىس الەمىنە سەكسەنىنشى جىلداردىڭ سوڭىندا تانىلىپ، «قاراقاسقا» اتانعان تارباعاتايلىق توكپە اقىن سەرىكحان جاقيانوۆ ۇزاق ناۋقاستان قايتىس بولدى،

 دەپ حابارلايدى قازاقپارات ءتىلشىسى.

بىرنەشە رەسپۋبليكالىق ايتىستاردىڭ جەڭىمپازى، ايتىس ونەرىنىڭ ابىزى ماناپ كوكەنوۆتىڭ ءوزى دومبىراسىن سىيلاعان سەرىكحان جاقيانوۆ 58 جاسىندا ومىردەن ءوتتى.

 ايتىس اقىنى 1959 -جىلى 18 - تامىزدا شىعىس قازاقستان وبلىسى تارباعاتاي اۋدانى قابانباي اۋىلىندا دۇنيەگە كەلگەن. كولباي توگىسوۆ مەكتەبىندە 8 - سىنىپتى بىتىرگەن (1966-1974).

1977-1979 -جىلدارى اسكەر قاتارىندا بولعان. جەرگىلىكتى كەڭشاردا ءتۇرلى لاۋازىمدار اتقارا ءجۇرىپ، 1984 -جىلى شىعىس قازاقستان وبلىسىنىڭ باس اقىنى اتاعىن الادى.

بىرنەشە وبلىستىق، رەسپۋبليكالىق ايتىستاردىڭ جۇلدەگەرى بولدى. قىزىلوردا وبلىسى جاڭاقورعان اۋدانىندا اقىن ماناپ كوكەنوۆپەن ايتىسىپ باتاسىن العان (1988). ونىڭ اقىندىعىنا ريزا بوپ، بولاشاق ونەرىنە سەنىم ارتقان ماناپ اقىن باسىنداعى تاقياسىن كيگىزىپ، 18 جىل ۇستاپ كەلە جاتقان دومبىراسىن ءوز قولىمەن ۇسىنعان.

تالدىقورعان قالاسىندا وتكەن «ءبىرجاننىڭ ىنىلەرى، سارانىڭ سىڭلىلەرى» اتتى رەسپۋبليكالىق اقىندار ايتىسىندا جەڭىس تۇعىرىنان كورىنگەن. اقتوبە وبلىسىنىڭ 120 جىلدىق تويى مەن قۇدايبەرگەن جۇبانوۆتىڭ 90 جىلدىق مەرەيتويىنا ارنالعان ايتىستا جۇلدەگەر اتاندى.

تورعاي وبلىسىندا «ءۇش ارىس» دەپ اتالعان رەسپۋبليكالىق ايتىستىڭ باس جۇلدەسىن، قوستاناي قالاسىندا وتكەن ى. التىنسارين اتىنداعى ايتىستىڭ 1 - ورىنىن، سەمەي قالاسىندا جەلتوقسانعا ارنالعان رەسپۋبليكالىق ايتىستىڭ باس جۇلدەسىن، تارباعاتاي اۋدانىندا قابانباي باتىردىڭ 300 جىلدىق مەرەيتويىنا ارنالعان رەسپۋبليكالىق ايتىستىڭ 1 - ورىنىن (1992) يەلەنگەن. الماتى قالاسىندا وتكەن حالىقارالىق اقىندار ايتىسىنىڭ جۇلدەگەرى.

فوتو: aitysker.org

اۆتور: ەسىمجان ناقتىباي