ەلباسى: قارۋلى كۇشتەرىمىز حالقىمىزدىڭ سەنىمدى تىرەگى، مەملەكەتتىڭ بەرىك قالقانى

 الماتى. قازاقپارات - جامبىل وبلىسىنداعى «وتار» اسكەري بازاسىندا ەلباسى - ق ر ق ك جوعارعى باس قولباسشىسى نۇرسۇلتان نازاربايەۆ قاتىسۋىمەن جاۋىنگەرلىك پاراد باستالادى، دەپ حابارلايدى قازاقپارات.

«قىمباتتى قازاقستاندىقتار، ساردارلار مەن ساربازدار! قادىرلى ارداگەرلەر! بارشاڭىزدى وتان قورعاۋشى كۇنى مەرەكەسىمەن شىن جۇرەكتەن قۇتتىقتايمىن. باھادۇر بابالار ۇلى دالامىزدى اق بىلەكتىڭ كۇشىمەن، اق نايزانىڭ ۇشىمەن قورعاپ، بىزگە امانات ەتىپ قالدىردى. «ۇراندى ەلدىڭ ۇرپاعى ايبارلى كەلەدى» دەگەن دانا حالقىمىز. بۇگىنگى ايبىندى ارميامىز ءۇشىن ەلدىڭ تىنىشتىعىن ساقتاپ، تاۋەلسىزدىكتىڭ قورعانى بولۋ مارتەبەلى زور مىندەت. جاۋجۇرەك جاۋىنگەرلەردىڭ كوتەرەتىن جۇگى اۋىر. ءبىراق ول ابىرويلى بورىش، قاستەرلى پارىز. قارۋلى كۇشتەرىمىز حالقىمىزدىڭ سەنىمدى تىرەگى، مەملەكەتتىڭ بەرىك قالقانى»، - دەپ اتاپ ءوتتى ەلباسى.

 بۇدان بۇرىن حابارلانعانداي، 3 مىڭنان استام سارباز پارادقا ءجىتى دايىندىقتان ءوتتى.

 اسكەري بازا اۋماعىندا جاۋىنگەرلىك تەحنيكانىڭ ارنايى كورمەسى كوپشىلىك نازارىنا ۇسىنىلعان. پارادتى تاماشالاۋعا كەلگەندەر وسى كورمەدەگى سوڭعى ۇلگىدەگى اسكەري تەحنولوگيالاردى تاماشالاۋدا. ءداستۇرلى تۇردە جەكە قۇرام سالتاناتتى مارشپەن ءجۇرىپ وتەدى. پارادقا 300-دەن استام اسكەري تەحنيكا، 40-قا جۋىق اۆياتسيا تەحنيكاسى قاتىسادى. ارميالىق بولىمشەلەر اسكەري تەحنيكانىڭ زاماناۋي ۇلگىلەرىن ءىس جۇزىندە قولدانۋ تاسىلدەرىن كورسەتەدى دەپ كۇتىلۋدە.

اۆتور: رۋسلان عابباسوۆ