ەڭبەك سىڭىرگەن باپكەر تۇرسىنعالي ەدىلوۆ: مارتيروسيان بارىنشا تىرىسىپ باقتى

استانا. قازاقپارات - سيدنەيدەگى وليمپيادا ويىندارىندا قازاقستاننىڭ ءتورت وكىلىن فينالعا شىعارعان ق ر ەڭبەك سىڭىرگەن باپكەرى تۇرسىنعالي ەدىلوۆ گەننادي گولوۆكيننىڭ ۆانەس مارتيروسياندى جەڭۋىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«گەننادي گولوۆكين ءوز كۇشى مەن مىقتىلىعىن قايتا دالەلدەدى. قازىرگى تاڭدا ول ورتا سالماقتاعى ەڭ قايسار جانە ەڭ مىقتى بوكسشى. ارينە، ءبارىمىز بۇگىن ونى ءوزىنىڭ مىقتى قارسىلاستارىنىڭ ءبىرى - «كانەلومەن» ايقاسادى دەپ كۇتتىك. ءبىراق، دوپينگ داۋى مەن الۆارەستىڭ بوكستان شەتتەتىلۋىنە بايلانىستى بۇل جەكپە- جەك بولماي قالعانى بارشامىزعا بەلگىلى. سوندىقتان، وعان قارسىلاستى شۇعىل ىزدەۋ كەرەك بولدى»، - دەدى ول.

تاجىريبەلى باپكەر GGG قارسىلاسىنىڭ ارەكەتىنە دە باعا بەردى.

«مارتيروسيان - گولوۆكيننىڭ دەڭگەيىندەگى بوكسشى ەمەس، بىرنەشە سوققىدان كەيىن-اق ول السىرەپ قالدى. ءبىراق ول كەرەك دۇنيەنى بەرۋى ءتيىس: ول شەبەرلىگى جاعىنان GGG-دان تومەن ەكەندىگىن بىلە وتىرىپ، GGG- مەن ايقاسۋعا كەلىستى. ءبارى نوكاۋتپەن اياقتالاتىنىن ءبىلدى. ايقاستىڭ ەكىنشى راۋندتا اياقتالاتىنىن كوپ ادام كۇتپەدى، دەگەنمەن بۇل جەكپە- جەكتىڭ سوڭعى راۋندقا دەيىن جالعاسپايتىنىنا سەنىمدى بولدىم. مارتيروسياننىڭ باتىل ءارى اشىق ارەكەتى تاڭعالدىردى، ءوزى دە شابۋىلداعىسى كەلدى. مۇمكىن، ول ونىڭ قارسىلاسىنىڭ ورتا سالماقتاعى چەمپيون، ۇلى GGG ەكەندىگىن ۇمىتىپ كەتكەن سياقتى»، - دەپ اتاپ ءوتتى ت. ەدىلوۆ.

سونداي-اق، ول گولوۆكيننىڭ بيللي دجو سوندەرس پەن ساۋل «كانەلو» الۆارەستى جەڭەتىنىنە سەنىمدى ەكەندىگىن ايتتى.

«بۇل گەناعا جاقسى جاتتىعۋ بولدى، ەندى ءبىز ونىڭ الۆارەس جانە سوندەرسپەن ايقاسىن كۇتەمىز. بۇل جەڭىس وعان جاڭا سەرپىن مەن سەنىمدىلىك بەرەدى. مەن گەنانىڭ بارلىق چەمپيوندىق بەلبەۋلەردى يەمدەنەتىنىنە كۇماندانبايمىن. گەننادييدىڭ سوندەرستەن بەلبەۋدى الىپ، «كانەلومەن» جەكپە- جەكتە بارلىق بەلبەۋلەرىن قورعايتىنىن كۇتەمىز. سودان كەيىن كەلەسى سالماق دارەجەسىنە كوشۋ تۋرالى ويلانۋعا بولادى»، - دەپ اتاپ ءوتتى باپكەر.

سونداي-اق، ت. ەدىلوۆ بارلىق وتانداستارىن گولوۆكيننىڭ جەڭىسىمەن قۇتتىقتادى.

ەسكە سالايىق، بۇگىن GGG ۇلتى ارميان امەريكالىق بوكسشى ۆانەس مارتيروسيانمەن ايقاسىپ، 38- جەڭىسىنە قول جەتكىزدى. جەكپە-جەك تەحنيكالىق نوكاۋتپەن ەكىنشى راۋندتا اياقتالدى.

«ۆانەس - تالاپتى بوكسشى، شارشى الاڭدا بىرنەشە جاقسى سوققىلارىن دارىتا الدى. الايدا جەكپە-جەكتى ەكىنشى راۋندتا اياقتاۋعا قاۋقارلى بولدىم (...) مەن كەز كەلگەن قارسىلاسقا دايىنمىن. ەگەر دە «كانەلو» جەكپە-جەككە دايىن بولسا، مەن دە دايىنمىن. مەن كوپ جىلدار بويى چەمپيوندىعىمدى ساقتاپ كەلەمىن. مەنىڭ بەلدىكتەرىمدى العىلارىڭ كەلە مە؟ وندا جەكپە-جەككە شىعىپ، تىرىسىپ كورىڭىزدەر»، - دەدى گولوۆكين.