بريتاندىق سوندەرس رينگتە گولوۆكيننەن قاشۋمەن بولادى - باقتيار ارتايەۆ

استانا. قازاقپارات - وليمپيادا چەمپيونى باقتيار ارتايەۆ قازاقستاندىق بوكسشى گەننادي گولوۆكيننىڭ كەلەسى قارسىلاسى كىم بولۋى مۇمكىن ەكەنىن ايتتى، دەپ حابارلايدى قازاقپارات.

«وسىنداي سپورتقا كەلگەن ادامدار، كوبىنەسە قاراپايىم وتباسىنىڭ بالالارى. الەۋمەتتىك جاعدايى جوعارى وتباسىنىڭ بالالارى سپورتقا بارمايدى. قازىرگى كەزدە سپورتتىڭ ارقاسىندا ۇلكەن جەتىستىككە جەتىپ، اتا-اناسىنا ءۇي الىپ بەرىپ، ءوزىنىڭ جاعدايىن جاساۋعا تىرىساتىن قاراپايىم وتباسىلاردان شىققان بالالار كوپ. ال ەندى بريتاندىق بوكسشى بيللي دجو سوندەرس تە قاراپايىم وتباسىدان شىققان جىگىت. سوندەرس قارسىلاس رەتىندە گولوۆكيندى كورگىسى كەلەدى، ياعني ول ءبىرىنشى كەزەكتە اقشا تاپقىسى كەلەدى. بۇل جەردە قاراجات ماسەلەسىندە كەلىسپەۋشىلىك بولۋى مۇمكىن. سپورتتا جۇرگەننەن كەيىن، ەر ازامات بولعان سوڭ، ولاردىڭ بارلىعى جەكپە- جەككە دايىن، الايدا بيزنەس جاعىنان كەلىسە المايتىن جاعدايلار تۋىندايدى»، - دەپ توقتالدى وليمپيادا چەمپيونى «Qazsport» تەلەارناسىندا ايتقان پىكىرىندە.

ونىڭ پايىمىنشا، بيللي دجو سوندەرس گەننادي گولوۆكينمەن كەزدەسكەن جاعدايدا، بريتاندىق بوكسشى قازاقستاندىق بىلعارى قولعاپ شەبەرىنە اسا اۋىر قارسىلاس بولمايدى.

«ويتكەنى سوندەرستىڭ ايتارلىقتاي جويقىن سوققىسى جوق. سوندىقتان ول رينگتىڭ «بەسىنشى بۇرىشىن» ىزدەپ، قاشۋمەن بولادى. ونىڭ جەڭىسكە جەتۋگە مۇمكىندىگى بولا قويماس. جەكپە-جەك ۇزاققا سوزىلۋى ىقتيمال، ياعني ول ءوزىنىڭ شيراقتىعى ارقاسىندا كوپ سوققىنى دارىتپاۋى مۇمكىن. بۇل جەكپە-جەك تەك وسىنىسىمەن عانا قىزىق بولادى دەگەن ويدامىن»، - دەدى ب. ارتايەۆ.

ونىڭ سوزىنە قاراعاندا، ەگەر گەننادي گولوۆكين ۋكراينالىق سەرگەي دەرەۆيانچەنكومەن نەمەسە ساۋل «كانەلو» الۆارەسپەن كەزدەسسە، بۇل جەكپە-جەكتەر وتە تارتىستى وتەر ەدى.

«ال ەگەر سوندەرسپەن بولاتىن جەكپە-جەك ەلدىڭ كوڭىلىنەن شىقپاۋى ىقتيمال. سەبەبى ءبىز بارلىعىمىز تارتىستى كەزدەسۋدى كۇتىپ وتىرمىز»، - دەپ ءتۇيدى باقتيار ارتايەۆ.

ايتا كەتەيىك، قازاقستاندىق كاسىپقوي بوكسشى گەننادي گولوۆكين كارسونداعى (ا ق ش، كاليفورنيا شتاتى) StubHub Center ارەناسىندا قارسىلاسى ۆانەس مارتيروسياندى جەڭىپ، ءوز تيتۋلدارىن قورعادى.

 

فوتو: kfb.kz