گولوۆكين قازاقستاندىق بوكس مەكتەبىنىڭ ەڭ مىقتى ەكەنىن دالەلدەدى - ارىستانبەك مۇحامەدي ۇلى

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى گەننادي گولوۆكيندى كەزەكتى جەڭىسىمەن قۇتتىقتادى، حابارلايدى قازاقپارات.

«ءبىزدىڭ گەنا ناعىز باتىر! قورجىندا تاعى ءبىر جەڭىس. شىن جۇرەكتەن GGG كومانداسى مەن بارلىق بوكس جانكۇيەرلەرىن جارقىن جەڭىسپەن قۇتتىقتايمىن! قۇرمەتتى گەننادي گەنناديەۆيچ قازاقستاندىقتار ءسىزدىڭ جەڭىسكە سەندى. امەريكالىق ۆانەس مارتيروتسيانمەن بولعان كەزدەسۋدە ءسىز ءوزىڭىزدىڭ مىقتى قاسيەتتەرىڭىزدى بايقاتىپ، قازاقستاندىق بوكس مەكتەبىنىڭ الەمدە ەڭ مىقتى ەكەنىن دالەلدەدىڭىز. ال، ءسىزدى الەم الدەقاشان مويىنداپ قويعان»، - دەپ جازدى مينيستر فەسبۋكتەگى پاراقشاسىندا.

وسى ورايدا ا. مۇحامەدي ۇلى قازاقستاندىق سپورتشى گ. گلوۆكيننىڭ جەڭىستەرى الەمدىك بوكس تاريحىندا ماڭگىلىككە ساقتالىپ قالاتىنىن اتاپ ءوتتى.

«جاستار سىزگە قاراپ بوي تۇزەيدى. ءسىز سپورتشى جاستار ءۇشىن ۇلگىسىز. تاعى دا، جەڭىسىڭىزبەن قۇتتىقتاي كەلە، مىقتى دەنساۋلىق، وتباسىڭىزعا اماندىق، رينگتە جارقىن جەڭىستەر تىلەيمىن!»، - دەدى مينيستر.

ايتا كەتەيىك، قازاقستاندىق گەننادي قارسىلاسى ۆانەس مارتيروتسياندى جەڭىپ، ءوز تيتۋلدارىن قورعادى.

سونىمەن قاتار، كارسونداعى (ا ق ش، كاليفورنيا شتاتى) StubHub Center ارەناسىندا گەننادي گولوۆكين قارسىلاسى ۆانەس مارتيروتسياندى جەڭگەننەن كەيىنگى اسەرىمەن ءبولىستى.