اقتوبە وبلىسىنىڭ اكىمى ب ۇ ۇ دامۋ باعدارلاماسىنا شالقار كولىن تازارتۋ جوباسىن ۇسىندى

اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ ب ۇ ۇ دامۋ باعدارلاماسىنىڭ قازاقستانداعى تۇراقتى وكىلى نوريماس شيمومۋرۋمەن كەزدەستى.

كەزدەسۋ كەزىندە قارعالى سۋ قويماسىن جاڭعىرتۋ، شالقار كولىن قۇتقارۋ، اۋىل شارۋاشىلىعىنداعى جاسىل تەحنولوگيانى دامىتۋ جوبالارى ۇسىنىلدى، دەپ حابارلايدى قازاقپارات ءتىلشىسى.

ب ۇ ۇ دامۋ باعدارلاماسى اقتوبە ءۇشىن ماڭىزدى جوبالاردى قولعا الىپ، ىسكە اسىردى. ماسەلەن، 2016 -جىلدىڭ ناۋرىز ايىندا بەردىبەك ساپاربايەۆ پەن نوريماس شيمومۋرا كەزدەسۋىنەن سوڭ اقتوبە سۋ قويماسىن جاڭعىرتۋ ءۇشىن 147,4 ميلليون تەڭگە ءبولىندى. ءىرى تابيعي اپات بولعان جاعدايدا تۇرعىنداردى دەر كەزىندە حابارلاۋعا مۇمكىندىك بەرەتىن قۇرىلعى قوندىرىلىپ، ەسكەرتۋ جۇيەسى ورناتىلدى.

«2018 -جىل قازاقستان مەن ب ۇ ۇ دب ءۇشىن ايتۋلى جىل بولىپ تۇر. ويتكەنى ب ۇ ۇ دامۋ باعدارلاماسىنىڭ قازاقستانداعى قىزمەتىنىڭ باستالعانىنا 25 جىل تولادى. وسى ۋاقىتتىڭ ىشىندە ۇيىم ەلىمىزدە، اتاپ ايتقاندا اقتوبە وبلىسىندا كوپ جۇمىس اتقاردى. ءبىز ىنتىماقتاستىقتى ءارى قاراي دامىتۋعا، جاڭا جوبالاردى جۇزەگە اسىرۋعا مۇددەلىمىز»، - دەدى وبلىس اكىمى بەردىبەك ساپاربايەۆ.

كەزدەسۋ كەزىندە ءوڭىر باسشىسى قارعالى سۋ قويماسىن رەكونسترۋكسيالاۋ، شالقار كولىن قۇتقارۋ، اۋىل شارۋاشىلىعىنداعى جاسىل تەحنولوگيانى دامىتۋ جوبالارىن جۇزەگە اسىرۋدى جالعاستىرۋدى ۇسىندى. وبلىس اكىمىنىڭ باسپا ءسوز قىزمەتىنىڭ حابارلاۋىنشا، ءوڭىر باسشىسى نوريماس شيمومۋرۋدى 1 -ماۋسىمدا وتەتىن بالالاردىڭ حالىقارالىق فەستيۆالىنە قاتىسۋعا شاقىردى.

«جوبالار قىزىقتى ءارى نازار اۋدارۋعا تۇرارلىق. ب ۇ ۇ دامۋ باعدارلاماسىنىڭ ولارعا قالاي قاتىسا الاتىنى تۋرالى ويلانۋىمىز كەرەك. ال 1 -ماۋسىمداعى مەرەكەلىك شاراعا قاتىسامىن. كۇنى بۇرىن بۇل كۇندى بەلگىلەپ، جوسپارلاپ قويدىم»، - دەدى ب ۇ ۇ دب تۇراقتى وكىلى.