مەملەكەت باسشىسى جاڭادان سالىنعان «ەيس» تەننيس ورتالىعىنا باردى
كورتتار سانى ءتورت ەسە ءوسىپ، 60-تان 244-كە جەتتى، سونداي- اق تەننيسپەن اينالىساتىن سپورتشىلار سانى جىل سايىن ارتىپ كەلە جاتىر.
«تەننيس سپورتى ءتيىستى ينفراقۇرىلىم بولعاندا عانا داميدى. ءار وڭىردە بالالار سپورتپەن شۇعىلدانىپ، بيىكتەردى باعىندىرۋى ءۇشىن الەمدىك ستاندارتقا ساي تەننيس ورتالىقتارى سالىنۋعا ءتيىس. وسى تەننيس ورتالىعىندا جاتتىعاتىن سپورتشىلار الەمدىك دەڭگەيدەگى جۇلدىزدارعا اينالادى دەپ ۇمىتتەنەمىن»، - دەدى نۇرسۇلتان نازاربايەۆ.
ەلباسى جاس تەننيسشىلەرمەن اڭگىمەلەسۋ بارىسىندا ءاردايىم جەڭىسكە دەگەن سەنىمدەرىنىڭ بەرىك بولۋىنا، جىگەرلىلىك پەن سپورتتىق شەبەرلىك ارقىلى العا قويعان ماقساتتارىنا جەتۋلەرىنە نيەتتەستىك ءبىلدىردى. جالپى كولەمى 8100 شارشى مەتر بولاتىن «ەيس» تەننيس ورتالىعىندا «حارد» قاتتى جابىندىسى توسەلگەن 4 جابىق جانە 6 اشىق كورت بار. سونداي- اق مۇندا 2 ترەناجەر زالى، مەديتسينالىق پۋنكت، كيىم اۋىستىراتىن بولمەلەر، نۇسقاۋشىلار كابينەتتەرى، كونفەرەنس- زال، تاماقتانۋ ورىندارى ورنالاسقان. بارلىق كورت حالىقارالىق تالاپتارعا ساي كەلەتىن جارىق بەرۋ جۇيەسىمەن قامتاماسىز ەتىلگەن. بۇل - جاز مەزگىلىندە «ATP Challenger» دەڭگەيىندەگى تۋرنيرلەردى وتكىزە الاتىن الماتىداعى بىردەن- ءبىر تەننيس ورتالىعى. سپورت نىسانى جەكە ينۆەستورلاردىڭ قارجىسىنا سالىندى.
www.24.kz