حالىقارالىق كانن كينوفەستيۆالىندە «قازاقستاننىڭ ۇلتتىق پاۆيلونى» اشىلادى
اتالعان ءىس- شارالار قازاق ۇلتتىق ونەر ۋنيۆەرسيتەتى مەن استانانىڭ 20 جىلدىعىنا وراي جاسالعالى وتىر، دەپ حابارلايدى قازاقپارات ءتىلشىسى.
ق ر مادەنيەت جانە سپورت مينيسترلىگىڭ باسپا ءسوز قىزمەتىنەن حابارلاعانداي، پاۆيلوندا حالىقارالىق «ەۋرازيا» كينوفەستيۆالىنىڭ تۇساۋكەسەرى وتەدى. اتاپ ايتقاندا، «ەۋرازيا» كينوفەستيۆالىنىڭ اكىمشىلىك باسقارۋ توبىن، باعدارلاماسىن، قازىلار القاسى مۇشەلەرىن تانىستىرۋ، ەۋرازيالىق كينوجوبالاردىڭ نارىعىن وتكىزۋ، وتاندىق فيلمدەردى تاراتۋ بويىنشا ديستريبيۋتەرلىك كومپانيالارمەن كەزدەسۋ، قازاقستان كينومەكتەپتەرىن تانىستىرۋ، «ەۋرازيا» حكف كارتينالاردى ىرىكتەۋ، قر كينەماتوگرافيستەرىنىڭ قاتىسۋىمەن پرەسس- بريفينگتەردى ۇيىمداستىرۋ جۇمىستارى جۇرگىزىلمەك.
«وڭتۇستىك- شىعىس جەرورتا تەڭىزى جاعالاۋىندا وتەتىن بەدەلدى كينوفورۋمداعى قازاقستاننىڭ پاۆيلونى بيىل ەكىنشى رەت اشىلماق. بۇل جىلى قازاقستاننىڭ جاس ءارى تالانتتى رەجيسسەرلەرىنىڭ كوپتەگەن فيلمى بىرنەشە كونكۋرستىق باعدارلامالارعا قاتىسىپ وتىر. بيىل كانن كينوفەستيۆالىنىڭ «ەرەكشە كوزقاراس» باعدارلاماسىندا ەلىمىزدىڭ اتىنان ءادىلحان ەرجانوۆتىڭ «لاسكوۆوە بەزرازليچيە ميرا» فيلمى، جاننات الشانوۆانىڭ «كونەتس سەزونا» فيلمى سينەفونداسون باعدارلاماسىندا، ACID باعدارلاماسىندا ولگا كوروتكونىڭ «تاك سەبە زيما» فيلمى قاتىسادى. سونداي- اق، رەجيسسەرلەرى ۆەنەرا قايىرجانوۆا مەن بەرىك جاحانوۆتىڭ قىسقامەتراجدى «تىعىلماق» جانە «اسان» فيلمدەرى Marchedufilm كينورىنوگى اياسىنداعى «ShortFilmCorner» («قىسقامەتراجدى فيلمدەردىڭ بۇرىشىندا» ) كورسەتىلەتىن بولادى»، - دەلىنگەن حابارلامادا.
دەلەگاتسيا قۇرامىندا مەملەكەتتىك ۇيىمداردىڭ وكىلدەرى، شىعارماشىلىق ينتەللەگەنتسيا، قازاقستان كينوسى مەن تەلەۆيزياسىنىڭ بەلدى ازاماتتارى جانە قازاق ۇلتتىق ونەر ۋنيۆەرسيتەتىنىڭ ستۋدەنتتەرى بار.
2018 -جىلدىڭ 8 - مامىر كۇنى «Hôtel Barrière Le Majestic Cannes» قوناقۇيىندە ۇلتتىق پاۆيلوننىڭ اشىلۋىنا وراي «كاننداعى قازاق كەشى» اتتى رەسمي جيىن وتەدى. بۇل ايتۋلى كەشكە مەملەكەتتىك «سوليستەر اكادەمياسى» وركەسترىنىڭ سۇيەمەلدەۋىمەن ق ر حالىق ءارتيسى ايمان مۇساقوجايەۆا مەن ەلىمىزدىڭ تانىمال ءانشىسى ديماش قۇدايبەرگەن جانە باسقا دا انشىلەر ونەر كورسەتەدى.
«قازاقستاننىڭ ۇلتتىق پاۆيلونى» كانن حالىقارالىق كينوفەستيۆالى اياقتالعانعا دەيىن ءوز جۇمىسىن اتقارىپ، شەتەلدىك كينوكومپانيالارمەن بىرلەسىپ كينو وندىرۋگە قاجەتتى سەرىكتەستەردى تارتۋمەن اينالىساتىن بولادى.
«قازاقستاننىڭ ۇلتتىق پاۆيلونى» ق ر مادەنيەت جانە سپورت مينيسترلىگى مەن ق ر فرانسياداعى ەلشىلىگىنىڭ قولداۋىمەن اشىلادى.
اۋدارما: ايان بەكەن ۇلى