تۇركيادا قازاق اقىنى رافاەل نيازبەككە حالىقارالىق سىيلىق تابىس ەتىلدى
ەلشىلىكتىڭ حابارلاۋىنشا، ماراپاتتاۋ ءراسىمى اياسىندا تۇرىك تىلىنە اۋدارىلعان «ءبىز وسىنداي ەلمىز» اتتى جىر جيناعىنىڭ تۇساۋكەسەر ءراسىمى ءوتتى.
تۇركى الەمى جازۋشىلار جانە ونەرپازدار قورىنىڭ پرەزيدەنتى ياحيا اكەنگين جينالعاندار الدىندا قالامگەردى تانىستىرا كەلە، «تۇركىتىلدەس ەلدەر ادەبيەتىنىڭ ءىرى وكىلى، كورنەكتى اقىن رافاەل نيازبەك - قازىرگى قازاق پوەزياسىنداعى ايتۋلى ەسىمدەردىڭ ءبىرى. تۋىستاس تۇركى جۇرتىنىڭ ماڭدايىنا بىتكەن اقىن ماعجان جۇمابايەۆ پوەزياسىنىڭ، شىعارماشىلىق ءومىر جولىنىڭ جالعاسى. اقىننىڭ ولەڭدەرىندە تۇركى حالىقتارىنىڭ ورتاق يدەياسى ساقتالعان. بىزدەر - تۇركىتىلدەس مەملەكەتتەر ۇزاق جانە تامىرلاس ورتاق تاريحىمىزدا ءارتۇرلى ايماقتارعا ءبولىنىپ، ءتۇرلى ساياسي وزگەرىستەردىڭ جەتەگىندە جۇردىك. ءبىراق سوعان قاراماستان ءتۇبىمىزدىڭ ءبىر، ءتىلىمىزدىڭ ءبىر، ءدىلىمىزدىڭ ءبىر ەكەندىگىن ەش ۋاقىتتا ۇمىتقان ەمەسپىز»، - دەپ اتاپ ءوتتى.
قازاقستاننىڭ تۇركياداعى ەلشىلىگىنىڭ قولداۋىمەن، تۇركى الەمى جازۋشىلار جانە ونەرپازدار قورىنىڭ دەمەۋشىلىگىمەن جارىق كورگەن «ءبىز وسىنداي ەلمىز» جىر جيناعىنىڭ تۇساۋىن توكات پروۆينسياسى نيكسار مۋنيسيپاليتەتىنىڭ گۋبەرناتورى سەلامي كاپانكايا، نيكسار مۋنيسيپاليتەتىنىڭ مەرى وزديلەك ءوزجان، تۇركى الەمى جازۋشىلار جانە ونەرپازدار قورىنىڭ پرەزيدەنتى ياحيا اكەنگين كەستى. ولەڭدەردى تۇرىك تىلىنە اۋدارعان جازۋشى- ديپلومات مالىك وتاربايەۆ. كىتاپتىڭ العى ءسوزىن قازاقستاننىڭ تۇركياداعى ەلشىسى ابزال ساپاربەك ۇلى جانە ەۋرازيا جازۋشىلار قاۋىمداستىعىنىڭ ءتوراعاسى ياكۋپ وماروعلى جازعان.
رافاەل نيازبەك ءوز كەزەگىندە سەنات ءتوراعاسى قاسىمجومارت توقايەۆتىڭ وسى شاراعا ارنايى جىبەرگەن قۇتتىقتاۋىن جەتكىزە وتىرىپ، «اتاتۇرىك ەلىندە» ولەڭىن وقىدى. سونداي-اق وسىعان دەيىن شەشەنستان مەملەكەتتىك سىيلىعى تاپسىرىلعانىن ايتا كەلە، «تۇركى الەمىنەن العان ماراپات ەرەكشە ىستىق ءارى بارىنەن قىمبات. قازاق ادەبيەتى ءۇشىن ۇلكەن مارتەبە»، - دەپ ريزاشىلىعىن ءبىلدىردى.
ەستەرىڭىزگە سالا كەتسەك، 1996 - جىلى قۇرىلعان تۇركى الەمى جازۋشىلار جانە ونەرپازدار قورىنىڭ (TـRKSAV) «تۇركى الەمىنە قىزمەتى ءۇشىن» حالىقارالىق سىيلىعى رافاەل نيازبەكپەن قاتار، ازەربايجاندىق جازۋشى سونا ۆاليەۆا، نەمىس مادەنيەت قايراتكەرى مۇسا سەردار چەلەبي، نيدەرلاندىق مادەنيەت قايراتكەرى مەحمەت ءتۇتىنجۇ، تۇرىك تاريحشىسى احمەت تاشاعىل، رەفيك تۇران، ادەبيەتتانۋشى رامازان كوركماز، جۋرناليست تۇران شاحينباش، «ت ر ت» مۋزىكالىق تەلەارناسى، «ايلا» تاريحي فيلمىنە دە بەرىلدى.
فوتو: alashainasy.kz