الماتى زووباعىندا قار بارىستارى مەن قاسقىرلاردىڭ ۆولەرى قايتا جاسالادى

الماتى. قازاقپارات - الماتى زووباعىنىڭ بولاشاقتا قالاي تۇرلەنەتىنى جايلى باسپا ءسوز ءماسليحاتى بارىسىندا زووباق باسشىسى ايگۇل تولەيەۆا ايتىپ بەردى، دەپ حابارلايدى قازاقپارات ءتىلشىسى.

بيىل 12 عيماراتتى جوندەۋگە 236 ميلليون تەڭگە بولىنگەن. قۇرىلىس- مونتاج جۇمىستارى جاقىن ارادا باستالىپ، جىل سوڭىنا دەيىن جالعاسپاق.

«جوندەۋ جۇمىستارى بارىسىندا ءبىز جەلدەتۋ جۇيەسىن دە جوندەيتىن بولامىز. قازىر زووباقتىڭ ىشىنەن جاعىمسىز ءيىس شىعاتىنى راس. ەندى پىلدەردىڭ، لەوپاردتاردىڭ، كەنگۋرۋ، مەن ءبىرقازانداردىڭ قىسقى ۇيلەرىندەگى جەلدەتكىش جۇيەسى تولىق جاسالاتىن بولادى»، - دەدى ايگۇل تولەيەۆا.

قازىر قۇرىلىس جۇمىستارى الماتى زووباعىن قايتا جاڭعىرتۋ جوباسىنا ساي جۇرگىزىلىپ كەلەدى.

نەمىس ساۋلەتشىسى پيتەر رازباحتىڭ جوباسى بويىنشا الماتى زووباعى توكسونوميالىق تيپتەن كونتينەنتالدى تيپكە تۇرلەنبەك.

اتاپ ايتقاندا، پىلدەر، زەبرالار مەن كەرىكتەر ءبىر ارەالدا ءومىر سۇرەتىن بولادى.

قازىر قار بارىستارى مەن ايۋ- قاسقىر كەشەندەرى بويىنشا جوبالىق سمەتالىق قۇجاتتاما دايىن تۇر.

«قار بارىسى ەكسپوزيتسياسىندا ەكى ەرەسەك بارىس پەن كۇشىكتەرى تۇراتىن بولادى. اۋماعى  3773 شارشى مەتر، ۆولەر اۋماعى 618 شارشى مەتر، سۋات كولەمى 8,9 شارشى مەتر بولماق. ايۋ- قاسقىر ەكسپوزيتسياسىندا 4 ەرەسەك قارا ايۋ، 4 ەرەسەك گيمالاي ايۋى، 8 قاسقىر ءومىر سۇرەتىن بولادى.

ولاردىڭ تۇرعىن جايىنىڭ كولەمى  8932 شارشى مەتر بولماق»، - دەدى ايگۇل تولەيەۆا.

ونىڭ ايتۋىنشا، ۆەتەرينارلىق ەمحانانىڭ جوبالىق سمەتالىق قۇجاتتاماسى دايىندالىپ جاتىر.

وسى ۋاقىتقا دەيىن گيمالاي ايۋلارى مەن اق ايۋلاردىڭ، جولبارىستاردىڭ، تاپيرلەردىڭ ەكسپوزيتسيالارى قايتا جوندەلدى. زووباقتىڭ ەكزوتاريۋمى قايتا جاسالدى.

«بيىل 29 - ناۋرىزدا اكۆاريۋم اشىلدى. العاش رەت اكاريۋمدا 25 توننالىق باسسەين پايدا بولدى. قۇستار ءۇيى قايتا جاسالدى»، - دەدى زووباق باسشىسى.

فوتو: static.ngs.ru

اۆتور: گۇلميرا عوسمانالي