بۋرابايدى يۋنەسكو- نىڭ عالامدىق گەوپاركتەرى تىزىمىنە ەنگىزۋ ماسەلەسى تالقىلاندى

كوكشەتاۋ. قازاقپارات - اقمولا وبلىسىنىڭ اكىمى مالىك مىرزالين مەن يۋنەسكو- نىڭ عالامدىق گەوپاركتەرى بويىنشا قازاقستاننىڭ ۇلتتىق كوميتەتى باسشىلارى «بۋراباي» مەملەكەتتىك ۇلتتىق تابيعي پاركىن يۋنەسكو- نىڭ عالامدىق گەوپاركتەرى تىزىمىنە ەنگىزۋ ماسەلەلەرىن تالقىلادى.

بۇل تۋرالى ايماق باسشىسىنىڭ تۋريزم جونىندەگى كەڭەسشىسى مارات يعالي فەيسبۋك الەۋمەتتىك جەلىسىندەگى ءوزىنىڭ پاراقشاسىندا جازدى، دەپ حابارلايدى قازاقپارات ءتىلشىسى.

 يۋنەسكو- نىڭ عالامدىق گەوپاركتەرى بويىنشا قازاقستاننىڭ ۇلتتىق كوميتەتىنىڭ ءتورايىمى ديليارا ۆۋدۆوردتىڭ ايتۋىنشا، گەوپاركتەر تۇجىرىمداماسى 90- جىلداردىڭ ورتاسىندا دۇنيەگە كەلگەن. ونىڭ ماقساتى جەر تاريحىنداعى گەولوگيالىق ماڭىزى زور اۋداندارداعى قۇندىلىقتاردى ارتتىرۋ جانە قورعاۋ بولىپ تابىلادى. 2004 -جىلى يۋنەسكو تاراپىنان جاسالعان قولداۋدىڭ ارقاسىندا ەۋروپانىڭ 17 جانە قىتايدىڭ 8 گەوپاركى بىرىكتىرىلىپ، عالامدىق گەوپاركتەر جەلەسى قۇرىلدى. 2014 -جىلى اتالمىش جەلى 100-دەن استام عالامدىق گەوپاركتەردى بىرىكتىرىپ، زاڭدى مارتەبە الدى.

 «وتكەن جىلى اقمولا وبلىسىنداعى «بۋراباي» مەملەكەتتىك ۇلتتىق تابيعي پاركىنىڭ يۋنەسكو- نىڭ عالامدىق گەوپاركتەرى تىزىمىنە ەنگىزۋ تۋرالى ماسەلە كوتەرىلدى. وسىعان وراي يۋنەسكو- نىڭ ارنايى ساراپشىسى كەلىپ، زەرتتەۋ جۇمىستارىن جۇرگىزدى. جالپى، «بۋراباي» مەملەكەتتىك ۇلتتىق تابيعي پاركىنىڭ عالامدىق گەوپاركتەر تىزىمىنەن كورىنۋ مۇمكىندىگى زور. ءبىز وسى ماقساتتا حالىقارالىق ۇيىمنىڭ تالاپتارىنا ساي جەرگىلىكتى بيلىكپەن قۇجاتتاردى راسىمدەۋ جۇمىستارىن قولعا الۋدى كوزدەپ وتىرمىز. ەگەر وسى تىزىمگە ەنەتىن بولسا، وندا كۋرورتتى ايماق تۋرالى اقپاراتتار حالىقارالىق سايتتار مەن انىقتامالاردا جاريالاناتىن بولادى. بۇل ءوز كەزەگىندە تۋريستەر اعىنىن ارتتىرادى. ەڭ باستىسى سول جەردە تۇراتىن جەرگىلىكتى تۇرعىندار ءۇشىن ءتيىمدى قادام. ءبىر سوزبەن ايتقاندا تۋريزم ارقىلى ءوڭىردىڭ ءال- اۋقاتىن كوتەرۋگە بولادى»، - دەدى ديليارا ۆۋدۆورد.

ال اتالمىش پاركتىڭ ديرەكتورى ءالىبي عازيزدىڭ سوزىنشە، قازىرگى كەزدە پاركتىڭ اۋماعىندا ورنالاسقا 43 ەلدى مەكەندە 70 مىڭعا جۋىق ادام تۇرادى. بۇل ەلدى مەكەندەردىڭ ينفراقۇرىلىمىن جاقسارتۋ، اباتتاندىرۋ، اعاش وتىرعىزۋ جانە جەرگىلىكتى تۇرعىندارعا ءتۇسىندىرۋ شارالارى جۇرگىزىلۋدە جانە جاقىن كۇندەرى جەر قويناۋىن زەرتتەۋ مەن شەكاراسىن ناقتىلاۋ جۇمىستارى قولعا الىنباقشى.

وبلىس اكىمى بۇل كوتەرىلىپ وتىرعان ماسەلەنىڭ شۋچينسك - بۋراباي كۋرورتتى ايماعىن دامىتۋدا ماڭىزى زور ەكەنىن اتاپ ءوتتى. وسى ماقساتتا وبلىس اكىمدىگى تاراپىنان جۇمىس توبىن قۇرىپ، قۇجاتتاردى راسىمدەۋ شارالارىن شيراتۋدى تاپسىردى.

ەسكە سالا كەتەيىك، قازىرگى كەزدە، اتالعان حالىقارالىق ۇيىمنىڭ قۇرامىنا 33 ەلدەگى 120 گەوپارك ەنىپ وتىر. حالىقارالىق تاجىريبە كورسەتىپ وتىرعانداي، تىزىمگە ەنگەن ءبىرقاتار گەوپاركتەردىڭ جەدەل دامىعانىن بايقاۋعا بولادى.

اۆتور: اسلان وسپانوۆ