قازاقستان مەن رەسەيدىڭ اراسىندا كەلىسپەۋشىلىكتەر بار ما

استانا. قازاقپارات - رەسەي فەدەراتسياسى قازاقستان ارقىلى تاسىمالداناتىن كەيبىر تاۋارلارعا شەكتەۋ ەنگىزۋدى سۇرادى. ول تاۋارلاردىڭ ىشىندە يراننىڭ سەمەنتى مەن قىتايدىڭ كولىكتەرى بار،

 دەپ حابارلايدى قازاقپارات ءتىلشىسى.

«قازىرگى كەزدە يران سەمەنتى بويىنشا ءبىر ماسەلە تۋىنداپ وتىر. رەسەي جاعى اتالعان تاۋاردى قازاقستان ارقىلى تاسىمالداۋعا بولمايدى دەپ سانايدى. سەبەبى ەۋرازيالىق ەكونوميكالىق وداقتىڭ تەحنيكالىق رەگلامەنتتەرىنە سايكەس كەلمەيدى. ءبىز بىرنەشە تەكسەرىس وتكىزدىك. سونىڭ ناتيجەسى بويىنشا ول سەمەنتتىڭ رۇقسات قاعازدارىن بەرۋ كەزىندە ءتارتىپ بۇزۋشىلىقتاردىڭ بولعانىن انىقتادىق. وداقتىڭ تەحنيكالىق تالاپتارى بۇزىلىپ وتىر»، - دەدى ۇلتتىق اككرەديتتەۋ ورتالىعى باس ديرەكتورىنىڭ ءبىرىنشى ورىنباسارى سەرىك قۇرمانعاليەۆ قازاقپارات تىلشىسىنە بەرگەن سۇحباتىندا. اتالعان ورتالىق ق ر ينۆەستيتسيالار جانە دامۋ مينيسترلىگىنىڭ تەحنيكالىق رەتتەۋ جانە مەترولوگيا كوميتەتىنە قارايدى.

 س. قۇرمانعاليەۆتىڭ ايتۋىنشا، ە ا ە و- نىڭ 018-تەحنيكالىق رەگلامەنتى - «كولىك قۇرالدارىنىڭ قاۋىپسىزدىگى» بويىنشا ءبىرقاتار ماسەلەلەر بار. «رەسەي تاراپىنان وسىعان قاتىستى تالاپتار بولدى. ويتكەنى قازاقستان ارقىلى رەسەيگە قىتايلىق كولىك قۇرالدارى تاسىمالدانىپ وتىرعان. وسى ماسەلەگە قاتىستى تاعى تەكسەرىستەر ۇيىمداستىرىلدى. قىتايدا شىعارىلعان كولىك قۇرالدارىنىڭ قاۋىپسىزدىگى بويىنشا رۇقسات قاعازداردى ارنايى زەرتحانا بەرىپ وتىرادى. ءبىز ونىڭ حاتتامالارىن كەرى قايتاردىق. قازىر تەرگەۋ شارالارى ءجۇرىپ جاتىر. قىتايلىق كولىكتەردىڭ تاسىمالىنا شەكتەۋ قويىلدى»، - دەپ اتاپ كورسەتتى س. قۇرمانعاليەۆ.

فوتو: materialyinfo.ru

اۆتور: ارمان اسقاروۆ