ارحيمەد مۇحامبەتوۆ ماڭعىستاۋلىقتاردى قوستانايعا قونىس اۋدارۋعا شاقىردى

None
None
ماڭعىستاۋ. قازاقپارات - تۇرعىندار تىعىز ورنالاسقان ايماقتان جۇمىس كۇشى از وڭىرلەرگە ازاماتتاردى كوشىرۋ جۇمىستارى بويىنشا بيىل قوستاناي وبلىسىنا 1118 ادام قونىس اۋدارادى، دەپ حابارلايدى قازاقپارات وبلىس اكىمىنىڭ باسپا ءسوز حاتشىسى جىگەر سارسەنوۆكە سىلتەمە جاساپ.

بۇگىن قوستاناي وبلىسىنىڭ اكىمى ارحيمەد مۇحامبەتوۆ باستاعان دەلەگاتسيا ماڭعىستاۋ وبلىسىنىڭ مۇنايلى اۋدانىندا بوس ورىندار جارمەڭكەسىن وتكىزدى.

قوستانايلىق دەلەگاتسيا ماڭعىستاۋلىقتارعا بوس جۇمىس ورىندارىن ۇسىندى. ماسەلەن، وبلىسقا مۇعالىم، مەحانيزاتور، دارىگەر، كولىك جۇرگىزۋشىلەرى سياقتى ماماندار جەتىسپەيدى.

وڭتۇستىك ايماقتاردان كوشىپ كەلۋشىلەر ءۇشىن قوستاناي وبلىسى 962 جۇمىس ورنىن دايىنداپ قويدى. وبلىس اكىمى ارحيمەد مۇحامبەتوۆ كوشىپ كەلۋشىلەرگە بارلىق جاعدايدىڭ جاسالاتىنىن ايتتى. ءتىپتى، مەملەكەت كومەگىنەن تىس، قوستاناي اۋدانىنىڭ ميچۋرين جانە گلازۋنوۆ اۋىلدارىنداعى كاسىپكەرلەر تۇراقتى جۇمىس پەن ءۇي ۇسىنىپ وتىر.

«ءبىزدىڭ وبلىسىمىزدا  1700-دەن استام جۇمىس بوس ورنى بار. سونىڭ % 20 اۋىل شارۋاشىلىعى، % 17 قۇرىلىس، % 13- دان استامى ونەركاسىپ سالالارىنا تيەسىلى. سول سەبەپتى، ءبىزدىڭ وبلىسقا كەلىڭىزدەر. سىزدەردى شاقىرۋ ءۇشىن ءوزىم دەلەگاتسيانى باستاپ كەلىپ وتىرمىن. باسپانا ماسەلەسىنەن قيىندىق تۋمايدى. مەن اقتوبە وبلىسىندا جۇمىس ىستەدىم. باتىس وڭىرلەرمەن سالىستىرىپ قاراعاندا ءۇيدىڭ باعاسى قوستانايدا ارزان. ناتيجەلى جۇمىسپەن قامتۋ باعدارلاماسىنا قاتىسىپ، كاسىپ باستايمىن دەسەڭىزدەر، ونى دا قولدايمىز. شاعىن نەسيە بەرۋ كولەمى دە ارتادى. نەگىزىنەن، اعىمداعى جىلى وبلىس بويىنشا ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلامالارىنا 1 ميلليارد تەڭگەدەن استام قاراجات قاراستىرىلدى»، - دەدى ارحيمەد مۇحامبەتوۆ.

جالپى، سولتۇستىك ايماقتارعا كوشۋ ءۇشىن وتباسىنىڭ ءاربىر مۇشەسىنە مەملەكەت تاراپىنان  84175 تەڭگە مولشەرىندە قارجىلاي كومەك بەرىلەدى. ءبىر جىل بويى ءۇيدى جالعا الۋ جانە كوممۋنالدىق قىزمەتتەرگە اقى تولەۋ ءۇشىن  72150 تەڭگەگە دەيىن قارجى تولەنەدى. سونداي- اق، جاڭا جۇمىس ورنىن اشىپ، قونىس اۋدارۋشىلاردى تۇراقتى جۇمىسپەن قامتىعاندارعا ءاربىر جۇمىسكەر ءۇشىن 450 اەك كولەمىندە سۋبسيديا قارالعان.

دەلەگاتسيا قۇرامىندا وبلىس اكىمىنىڭ ورىنباسارى مارات جۇندىبايەۆ، وبلىس اكىمى اپپاراتىنىڭ باسشىسى ارمان ابەنوۆ، جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى گۇلنار ابەنوۆالار بار.

 ايتا كەتەرلىگى، 2016 -جىلى قوستانايعا باسقا وبلىستاردان - 19، 2017 -جىلى - 30 عانا وتباسى قونىس اۋدارعان. 2018 -جىلى بۇل كورسەتكىش 10 ەسەگە ۇلعايدى. بيىل قوستاناي وبلىسى 272 وتباسىن قابىلداۋعا دايىن. ونىڭ ىشىندە 35 وتباسى قوستاناي قالاسىنا قونىس اۋدارماق.

اۆتور: قاسقىرباي قويشىمانوۆ

سوڭعى جاڭالىقتار