دونالد ترامپتى نوبەل سىيلىعىنا ۇسىندى

استانا. قازاقپارات - ا ق ش- تا ءبىر توپ رەسپۋبليكاشىل كونگرەسمەن پرەزيدەنت دونالد ترامپتى بەيبىتشىلىك سالاسىنداعى نوبەل سىيلىعىنا ۇمىتكەر ەتىپ ۇسىندى.

كونگرەسمەندەردىڭ نوبەل سىيلىعىن تاعايىنداۋ كوميتەتىنە جازعان حاتىندا دونالد ترامپتىڭ «سولتۇستىك كورەياعا بارىنشا قىسىم كورسەتىپ، ونى زاڭسىز اسكەري كامپانياسىن توقتاتۋعا ماجبۇرلەۋدە جانە ايماقتا بەيبىتشىلىك ورناتۋدا ايانباي ەڭبەك ەتكەنى» ايتىلادى. حات جولداعان 18 كونگرەسمەن ترامپ اكىمشىلىگىنىڭ حالىقارالىق قاۋىمداستىقتى بىرىكتىرە العانىن، سونىڭ ارقاسىندا سولتۇستىك كورەياعا ەكونوميكاسىن السىرەتىپ، پحەنياندى كەلىسسوزگە كەلۋگە ماجبۇرلەيتىندەي جاڭا سانكسيالار ەنگىزىلگەنىن ايتادى.

دونالد ترامپتىڭ جاقتاستارى سوڭعى كەزدە ونى نوبەل سىيلىعىنا ۇسىنۋ يدەياسىن كەڭىنەن تالقىلاپ جاتىر. بۇعان وڭتۇستىك كورەيا پرەزيدەنتى مۋن چجە يننىڭ ۇكىمەت مۇشەلەرىمەن وتكىزگەن جيىندا ترامپتى نوبەل سىيلىعىنا ۇسىنۋدى قولداعانى تۋرالى اقپارات تۇرتكى بولعان. وتكەن اپتانىڭ سوڭىندا ميچيگاندا پرەزيدەنت ترامپ قاتىسقان ميتينگىدە وعان قاتىسۋشىلار «نوبەل، نوبەل!» دەپ ۇرانداعان.

ا ق ش- تا دونالدتى ترامپتى سىنايتىندار كونگرەسمەندەردىڭ نوبەل كوميتەتىنە جازعان حاتىن ساياسي ايلا- شارعى، كونگرەسكە ارالىق سايلاۋعا از ۋاقىت قالعاندا كونسەرۆاتيۆتىك ەلەكتوراتتىڭ الدىندا ساياسي ۇپاي جيناۋ ارەكەتى دەپ اتادى.

نيۋ- يوركتەن سايلانعان كونگرەسسمەن ادريانو ەسپايا دونالد ترامپ اق ۇيگە كەلگەن ءبىر جىلدان استام ۋاقىتتان بەرى الەمدە قاۋىپ ازايماعانىن مالىمدەدى. «مۇنداي مارتەبەلى سىيلىققا ۇسىنۋ ساياسي ويىنعا تۇرتكى بولماۋى ءتيىس» دەدى ول.

سىيلىققا ۇمىتكەر ۇسىنۋ قۇقىعىنا مەملەكەت باسشىلارى، ۇكىمەت پەن پارلامەنت مۇشەلەرى يە. وسىعان دەيىن ا ق ش- تىڭ ءتورت پرەزيدەنتى - تەودور رۋزۆەلت، ۆۋدرو ۆيلسون، دجيممي كارتەر جانە باراك وباما بەيبىتشىلىك سالاسىنداعى نوبەل سىيلىعىن يەلەنگەن.

www.azattyq.org