قايرات نۇرتاس تۋعان ىنىسىمەن بىرگە بەينەكليپ ءتۇسىردى

 استانا. قازاقپارات - جۋىردا وتباسىلىق كونسەرتىمەن ەلىمىزدىڭ تۇكپىر- تۇكپىرىن ارالاعان قايرات نۇرتاس تۋعان ىنىسىمەن بىرگە جازدىرعان جاڭا دۋەتتىڭ تۇساۋىن كەسكەن ەدى.

 اعىلشىن تىلىندە جازىلعان ءاندى تىڭدارمانداردىڭ ءبىر بولىگى وڭدى قابىلداعانىمەن، سىناپ العاندار دا تابىلدى، دەپ حابارلايدى Stan.kz اقپاراتتىق اگەنتتىگى.

الايدا ايداربەكوۆتەردىڭ كەنجە ۇلى زاڭعار ەلدىڭ سوزىنەن ساباق الىپ، ءارى قاراي دا تاباندىلىقپەن جۇمىس ىستەيتىنىن ايتقان بولاتىن. نۇرتاستىڭ ءسۇت كەنجەسى سوزىندە تۇردى. قازىرگى تاڭدا ول جەكەلەگەن اندەر جازدىرىپ، شوۋ- بيزنەسكە جاڭادان قادام باسىپ جاتىر.

اعامنىڭ جولىن بەرسىن دەگەنى شىعار، زاڭعار نۇرتاس العاشقى بەينەبايانىن قايرات نۇرتاسپەن بىرگە تاسپالاۋدى ءجون كورگەن. My Universe اتتى تۋىندى جاقىن كۇندەرى كورەرمەنگە جول تارتادى. بۇل جايىندا قايرات نۇرتاس:

«زاڭعار ىنىممەن بىرگە ورىنداعان، جاڭا "My universe"  انىنە بەينەبايان ءوز مارەسىنە جەتتى. جاقىن ارادا گاككۋ ارناسىنان كورە الاسىزدار. بەينەباياننىڭ جاقسى شىعۋىنا ات سالىسقان بارلىق مىقتى ماماندارعا العىسىمدى بىلدىرەمىن»، - دەدى.

ايتپاقشى، قايرات نۇرتاس ىنىلەرى مەن بالالارىنىڭ ءانشى بولعانىن قالامايدى. بۇل تۋرالى حيتمەن سايتىمىزدىڭ تىلشىسىنە بەرگەن سۇحباتىندا ايتقان بولاتىن. سوعان قاراعاندا، زاڭعاردان «جۇلدىز» جاساۋ يدەياسى - ايداربەكوۆتەر اۋلەتىنىڭ «باس پروديۋسەرى» گۇلزيرا حانىمعا تيەسىلى.