ماعاۋيننىڭ اسقار سۇلەيمەنوۆ تۋرالى ەستەلىگى

 استانا. قازاقپارات - اسقار ەكەۋمىزدىڭ تانىس- بىلىستىگىمىز وسى «جۇلدىزدا»، مەنىڭ اتالمىش ماقالامنان باستالىپتى.

العاشقى كەزدەسۋدە ەكى ارامىزدا ءماندى ءسوز بولا قويماعان. تەك «ون كۇننەن كەيىن» دەگەن سالقاۋ، بەيتاراپ اۋەزى عانا ەستە قالىپتى. رەداكسيا اتاۋلىنىڭ قالىپتى مىنەزىن بىلەم، ۋاقىتىنان اسىرىپ باردىم. بۇل جولى دا سىناي قاراپ، ايتسە دە جىلى قاباقپەن قارسىلادى. العاشقى لەپەسى - حەمينگۋەي تۋرالى بولعان. ونىڭ جازۋ مانەرى، توسىن جاڭالىقتارى. جانە بايقاماپپىن، ءوزى اشىلىپ ايتپاي، مەنى سويلەتتى. سۇراق- جاۋاپ بولماسا دا، وسىعان جاقىن. مەنىڭ ماقالاما جەتپەدىك. ءوزى ايتپاعان سوڭ، قوزعامادىم. اۋەلگىشە، سالعىرت قالىپتا: «ون كۇننەن سوڭ.. .» - دەگەن. بۇل جولى اپتا وزدىرماي باردىم. تاعى دا ويقاستاپ، ءسوز تارتا باستادى. ورىستان ءوتىپ، باتىسقا شىقتىق. مەن وسى كەزدە عانا سەكەم العان ەدىم. ارتىنان انىق اڭدادىم، اسقاردىڭ جالپى جۇرتتى قاپىسىز ىقتىرىپ وتىراتىن نەگىزگى قارۋى دا وسى- الەم ادەبيەتىنەن اتاۋسىز سىناق ەكەن. ءبىزدىڭ الدىڭعى بۋىن، ارىداعى مۇحتار اۋەزوۆ پەن ونىڭ ازىرشە جابىق جاتقان زامانداستارىنان سوڭ ادەبيەتكە كەلگەن ۇلكەن توپتىڭ جالپى ءبىلىم دەڭگەيى ونشا جوعارى ەمەس ەكەن.

زەينوللا قابدولوۆتى بىلمەيمىن، ءابدىجامىل نۇرپەيىسوۆ پەن تاحاۋي احتانوۆ، سافۋان شايمەردەنوۆتەر، باسقاسىن ايتپاعاندا، سول كەزدە الەمدى دابىلداتىپ تۇرعان حەمينگۋەي مەن فولكنەردىڭ شىعارمالارى تۇرىپتى، اتى- ءجونىن العاش رەت وسى اسقار سۇلەيمەنوۆتەن ەستىگەن سياقتى. ءبىزدىڭ ىلكى الدىمىزداعى جانە تۇستاس جازارماندار دا جەتىسىپ جاتقان جوق، بۇلاردىڭ ىشىندە جاسىنان اتاققا شىققان ساكەن ءجۇنىسوۆ «اباي جولىنىڭ» ءبىرىنشى كىتابىنان اسپاي كەتتى، ال بىزبەن بىرگە وقىعان، ەندى اياق استىنان داۋىرلەي باستاعان ورازبەك سارسەنبايەۆتىڭ كىتاپ بەتىن اشقانىن كورمەگەن ەدىم. سوندىقتان دا ءبىزدىڭ قالىپتى ادەبي ورتادا اسقار بىردەن دارالانىپ، بويى وزعىنداپ شىقتى. ال مەن جيىرما جاسىمدا بۇتكىل الەمدىك كلاسسيكانى وقىپ تاۋىسقام، اسقاردىڭ سىننان وتكەن، قاتەسىز ءتاسىلى ماعان جۇرمەيتىن. اسقار قانشا وقىمىستى بولسا دا، ەسكىلىكتى ادەبي جۋرنالدار مەن ارىداعى باسىلىمداردى اقتارماعان...

Massaget.kz