گيننەس رەكوردتار كىتابىنا ەنگەن سىربويىلىق زەينەتكەر

 استانا. قازاقپارات - ەڭبەك جولىن مەملەكەتتىك قىزمەتكە ارناپ، وسى سالادان زەينەت دەمالىسىنا شىققان سىربويىلىق سەرىك قۇلمىرزايەۆ كوپشىلىككە ادەمى قارتايۋدىڭ ۇلگىسىن كورسەتىپ كەلەدى.

 اسقارالى الپىستىڭ اسۋىندا بيىك بەلەستەردى باعىندىرعان ارداگەر سپورتشى گىر تاسىن كوتەرۋدى زەينەت جاسىنا كەلگەننەن كەيىن داعدىعا اينالدىرا باستاعان. 65 جاستاعى زەينەتكەردىڭ سپورتپەن شۇعىلداناتىن ورنى دا قاراپايىم. تابيعات اياسىندا جاتتىعۋدى قولعا العان جاننىڭ وسى ءبىر ءحوببيى ونى الەم چەمپيونى ەتتى.

 سەرىك قوجان ۇلى بۇگىندە  قىزىلوردا وبلىسىنىڭ قارماقشى اۋدانىندا تۇرادى. ول 2013 -جىلى ءتورت دۇركىن الەم بىرىنشىلىگىنىڭ، ەۋروپا، ازيا، ەۋرازيا، بەلورۋس جانە رەسەي چەمپيوناتتارىندا، ف. ۋشاكوۆ جانە م. لومونوسوۆ اتىنداعى حالىقارالىق جارىستاردا جەڭىمپاز اتانىپ، ءبىر ەمەس، 11 التىن مەدالدى يەمدەندى. ال، ءۇش جارىم جىل بۇرىن بەلارۋس ەلىنىڭ ۆيتەبسك قالاسىندا گىر ترياتلونى بويىنشا وتكەن ەكىنشى دۇنيەجۇزىلىك وليمپيادادا 16 كەلىلىك گىر تاسىن 2 مينۋت ىشىندە 78 رەت جۇلقا، 94 رەت سەرپە كوتەرۋ ارقىلى ۇزدىك دەپ تانىلعان بولاتىن. سول جارىس بارىسىندا «310 سپارتاندىقتار» جوباسى بويىنشا گيننەس كىتابىنا ەنۋ ءۇشىن 400 گە جۋىق سپورتشى جارتى ساعات بويى گىر كوتەرۋ جاتتىعۋلارىن جاساعان. ناتيجەسىندە قازاقستاندىق سپورتشىنىڭ ەسىمى گيننەس رەكوردتار كىتابىنا جازىلدى. سونىمەن قاتار، ب ۇ ۇ جانە يۋنەسكو جانىنداعى ادام قۇقىعى حالىقارالىق فەدەراتسياسى مەن عىلىمي ينستيتۋتتارى ەۋروپالىق قاۋىمداستىعىنىڭ جانە حالىقارالىق اتتەستاتسيالىق كەڭەسىنىڭ حالىقارالىق «قاناتتى ارىستان» وردەنى تابىستالدى.

وتكەن جىلدىڭ جازىندا پەتروپاۆل قالاسىندا وتكەن الەمدىك بىرىنشىلىكتە سەرىك قوجان ۇلى رەسەي، بەلارۋس، ۋكراينا جانە ەلىمىزدىڭ مىقتىلارىمەن سىنعا ءتۇستى. سايىستا گىر ترياتلونىنان الەم چەمپيوناتى، ەۋرازيا چەمپيوناتى جانە قازاقستاننىڭ ءبىرىنشى اشىق چەمپيوناتى قاتار ءوتىپ، بىرنەشە كەزەڭ بويىنشا سپورتشىلاردىڭ شەبەرلىكتەرى سىنالدى. ءدۇبىرلى دودادا باق سىناعان سىر ءوڭىرىنىڭ ارداگەر سپورتشىسى جۇلقا كوتەرۋ سايىسى بويىنشا 10 كەلىلىك گىر تاسىن 5 مينۋت ىشىندە 190 رەت كوتەرىپ، جەتىنشى رەت الەم چەمپيونى اتاعىنا لايىق دەپ تانىلدى. سونىمەن بىرگە، 2 مينۋت ىشىندە 89 مارتە جۇلقا كوتەرۋ ارقىلى قازاقستان چەمپيونى دەگەن اتاققا يە بولدى. چەمپيونات قورىتىندىسى بويىنشا ارداگەر سپورتشى «التىن گىر كوتەرۋشى» وردەنىمەن ماراپاتتالىپ، حالىقارالىق دارەجەدەگى سپورت شەبەرى اتاعىنا يە بولدى.

 - مەن بۇعان دەيىن كاسىبي تۇرعىدا سپورتپەن اينالىسقان ەمەسپىن. مەنىڭ قىزمەتتىك جولىم مەملەكەتتىك جۇمىسپەن تىعىز بايلانىستى بولدى. زەينەت جاسىنا جاقىنداعان ساتتەرىمدە الداعى ۋاقىتتى قالاي ءتيىمدى وتكىزۋ كەرەكتىگى تۋرالى ءجيى ويلاناتىنمىن. ءسويتىپ، كوكەيدەگى ويدى سپورتپەن بايلانىستىرامىن دەگەن شەشىمگە كەلدىم. حالىقتىڭ دەنساۋلىعىن جاقسارتىپ، سالاۋاتتى ءومىر سالتىن قالىپتاستىرۋدىڭ نەگىزگى شارتى بۇقارالىق سپورتتى دامىتۋمەن بايلانىستى ەكەنى بەلگىلى. وسى ورايدا سپورتتى جانىما سەرىك ەتە وتىرىپ، وسكەلەڭ ۇرپاققا ۇلگى كورسەتسەم دەيمىن. جالپى، ادامزات بالاسى ۇنەمى ىزدەنىس ۇستىندە ءجۇرۋى كەرەك. سوندىقتان دەنە شىنىقتىرىپ، سپورتپەن شۇعىلدانۋمەن قاتار رۋحاني الەمىمىزدى بايىتۋ جولىنداعى ىزدەنىسكە باسىمدىق بەرۋدى دە ءجون سانايمىن. ويتكەنى، ادامنىڭ رۋحاني دۇنيەسى باي بولسا، ونىڭ الا المايتىن قامالى بولمايدى. الەمدىك دودالاردا ۇنەمى جەڭىمپاز اتانۋىمنىڭ بىردەن- ءبىر سەبەبى دە سودان بولار، - دەيدى گىر تاسىن كوتەرۋدەن الەم چەمپيونى، ارداگەر سپورتشى سەرىك قۇلمىرزايەۆ.

كوكسەگەنى ەل بىرلىگى بولىپ، ۇرپاق تاربيەسىنە الاڭداعان، پايدالى ءىس، ونەگەلى اڭگىمەسىن ايتا بىلگەن قازىنالى قارتتارعا «ادەمى قارتايدى» دەگەن تەڭەۋ جاراسادى. قارتتىققا اياق باسقان شاعىندا زىلدەي تەمىرلەردى ەشبىر قينالىسسىز كوتەرىپ، سالماقتى بولمىسىمەن جان- جاعىنا ونەگە نۇرىن توگە بىلگەن سەرىك قۇلمىرزايەۆتىڭ عيبراتتى جولى دا ادەمى قارتايۋعا باستاسا كەرەكتى.

 

ساعيرا ءۋالي

alimsak.kz