ساپاسىز تاۋار ساتاتىندارعا «سەنبەيمىز» دەگەن ايدار تاعۋ قاجەت - ۇكىمەت باسشىسى

استانا. قازاقپارات - ۇكىمەتتىڭ بۇگىنگى وتىرىسىندا تۇتىنۋشىلار قۇقىقتارىن قورعاۋ ماسەلەسى قارالدى، دەپ حابارلايدى قازاقپارات ءتىلشىسى.

نەگىزگى باياندامالاردان كەيىن باقىتجان ساعىنتايەۆ مەملەكەتتىك ورگانداردىڭ باسشىلارىنا ەسكەرتۋ جاسادى. «نەگىزى، بۇگىنگى ءبىزدىڭ وتىرىسىمىزعا تۇتىنۋشىلاردىڭ قۇقىقتارىن قورعاۋ سالاسىنداعى ۇيىمداردىڭ وكىلدەرىن شاقىرۋ كەرەك ەدى. اتقارىلىپ جاتقان شارالاردى ءوزىمىز عانا تالقىلاپ قويماي، ولاردى دا تىڭداپ شىققان دۇرىس»، - دەدى ب. ساعىنتايەۆ.

پرەمەر- ءمينيسترىنىڭ ايتۋىنشا، وسى سالادا ءتيىستى شارالار اتقارىلسا دا، قۇقىقبۇزۋشىلىق فاكتىلەرى ازاياتىن ەمەس. «جاڭا ءوزىڭىز ايتىپ وتىرسىز عوي، ءبىزدىڭ تاراپىمىزدان قاجەتتى شارالار قولعا الىنعانمەن كەيبىر ساۋدا ورىندارى مەن باسقا دا مەكەمەلەر ستاندارتقا ساي كەلمەيتىن ازىق- تۇلىكتى جانە باسقا دا ونىمدەردى ساتىپ جاتىر. بالكىم، تالدىقورعاننىڭ تاجىريبەسىن كەڭىنەن تاراتامىز؟ ول جاقتا بىرەۋ ساپاسىز تاۋاردى ساتىپ، زاڭدى بۇزسا، وندا عيماراتتىڭ شەكەسىنە «سەنبەيمىز!» دەگەن ۇلكەن بيلبوردتى ءىلىپ قويادى. تۋرا سولاي زاڭدى ءجيى بۇزاتىن ساۋدا ۇيلەرى مەن كومپانيالار جايىندا اشىق ايتۋ قاجەت. ولارعا «سەنبەيمىز!» دەگەن ايدار تاعۋ قاجەت. مەنىڭشە، حالىق ول باستامانى قولدايدى. ءبىز ءوز تاراپىمىزدان قانشا جۇمىس اتقارساق تا، بيزنەستىڭ بەتبۇرىسى وزگەرمەسە، وسى قالپىندا قالا بەرەمىز»، - دەپ اتاپ كورسەتتى ب. ساعىنتايەۆ.

اۆتور: ارمان اسقاروۆ