ەلجان ءبىرتانوۆ ساپاسىز مايدىڭ قاي ەلدەردەن كەلەتىنىن ايتتى

 استانا. قازاقپارات - ۇكىمەتتىڭ بۇگىنگى وتىرىسىندا ق ر دەنساۋلىق ساقتاۋ ءمينيسترى ەلجان ءبىرتانوۆ تۇتىنۋشىلار قۇقىقتارىن قورعاۋ ماسەلەسى بويىنشا ەسەپ بەردى، دەپ حابارلايدى قازاقپارات ءتىلشىسى.

«جالعان ءونىمنىڭ باسىم بولىگى ءسۇت جانە ماي ونىمدەرىنە تيەسىلى. وسى سالادا وسىمدىك مايى بار ونىمدەر تابيعي ءونىم رەتىندە ساتىلعان. مىسالى، ەكى مىڭ ءسۇت جانە ماي ونىمدەرىنىڭ 29 پروتسەنتى ساپاسىز دەپ تانىلعان. نەگىزى، اتالعان تاۋارلاردىڭ كوبىسى رەسەي، بەلارۋس، ۋكراينا، قىرعىزستان مەن فرانسيادان كەلەدى» ، - دەيدى ە. ءبىرتانوۆ.

ءمينيستردىڭ سوزىنە قاراعاندا، وسى ۋاقىتقا دەيىن حالىق ءجيى تۇتىناتىن 42 مىڭنان استام تاۋاردىڭ ءتۇرى سانيتارلىق- ەپيدەميولوگيالىق تەكسەرىستەن ءوتتى. سونىڭ 10,3 پروتسەنتى ستاندارتقا ساي ەمەس بولىپ شىقتى. «تاماق ونىمدەرىنىڭ 34 مىڭنان استام سىناماسى زەرتتەلدى. 224 سىناما تالاپقا ساي كەلمەيدى. بىرىنشىدەن، وندىرۋشىلەر تاڭبالاۋ ەرەجەلەرىن بۇزادى. ەكىنشىدەن، تاۋارلار قاۋىپسىزدىك تالاپتارىنا ساي ەمەس. سوسىن ءونىمنىڭ قۇرامىنا قاتىستى سان الۋان ءتارتىپ بۇزۋشىلىقتار بار» ، - دەپ اتاپ كورسەتتى ە. ءبىرتانوۆ.

رەسمي مالىمەتكە سايكەس، تەكسەرىستەردىڭ ناتيجەسىندە 20 توننا كونديتەرلىك ونىمدەر، 11,2 توننا ەت، 2,5 توننا ءسۇت ونىمدەرى، 1,2 توننا كونسەرۆىلەنگەن جەمىس- جيدەك جانە 160 پارتيا الكوگولدىك ونىمدەر تاركىلەندى. توننادان اساتىن ساپاسىز ويىنشىقتار دا انىقتالدى. ول ويىنشىقتاردىڭ باسىم بولىگى قىتاي مەن تۇركيادان جەتكىزىلگەن