قازاقستاننىڭ ەكسپورتى ارتتى - مينيستر قاسىمبەك
«بيىل ەكسپورتتىڭ وڭ ءۇردىسى ساقتالىپ كەلەدى. 2018 -جىلدىڭ ەكى ايى بويىنشا ەكسپورت 8,8 ميلليارد دوللاردان استى. بۇل وتكەن جىلدىڭ اتالعان كەزەڭىمەن سالىستىرعاندا 27,4 پروتسەنتكە، ياعني 6,9 ميلليارد دوللارعا ارتىق»، - دەدى ج. قاسىمبەك.
ءمينيستردىڭ ايتۋىنشا، ەكسپورتتىق ستراتەگيا اياسىندا 2022 -جىلعا دەيىن شيكىزاتتىق ەمەس ەكسپورتتىڭ كولەمىن 1,5 ەسەگە ۇلعايتۋ قاجەت. سوڭعى بەس جىلدىڭ ىشىندە جالپى ەكسپورت كولەمىندەگى وڭدەۋ ونەركاسىبىنىڭ ۇلەسى 23 پروتسەنتتەن 32-گە دەيىن ءوستى. قازاقستاننىڭ سىرتقى ساۋدا اينالىمى 25 پروتسەنتكە ارتىپ، 69,5 ميلليارد دوللارعا جەتتى.
ايتا كەتەيىك، ۇكىمەتتىڭ وتىرىسىندا ق ر ينۆەستيتسيالار جانە دامۋ ءمينيسترى جەڭىس قاسىمبەك وتاندىق تاۋارلاردى شەتەلگە ەكسپورتتاۋدىڭ نەگىزگى پروبلەمالارىن دا اتادى.
ءمينيستردىڭ سوزىنە قاراعاندا، بۇگىندە مەملەكەتتىك ورگاندار دا، بيزنەسمەندەر دە ساۋدا- ەكونوميكالىق كەلىسىمدەردىڭ نەگىزگى ەرەجەلەرىن دۇرىس پايدالانباي ءجۇر. سول سەبەپتى باسىمدى باعىتتار بويىنشا راسىمدەلگەن قۇجاتتاردى جان- جاقتى ءتۇسىندىرىپ، بارلىق پروبلەمالاردى ۇكىمەتارالىق كوميسسيانىڭ قاراۋىنا دەر كەزىندە شىعارۋ قاجەت.
«ەكىنشى ماسەلە، شەت ەلدەردە ءبىزدىڭ ەكسپورتتىق- پروموۋتەرلىك قولداۋ جۇيەسى دۇرىس دامىماعان. سونىڭ سالدارىنان جاڭا نارىقتارعا كىرە الماي وتىرمىز. بۇگىندە دامىعان مەملەكەتتەردىڭ كوبىسى ساۋدا وكىلدىلىكتەر جەلىسىن اشىپ العان. مىسالى، وڭتۇستىك كورەيا، اۋستراليا، رەسەي جانە تاعى باسقا ەلدەر وسى باعىتتا جاقسى جۇمىس ىستەپ كەلەدى. سول سەبەپتى ەكسپورتتىق ستراتەگيامىزدىڭ اياسىندا شەت ەلدەردە وكىلدىكتەر اشۋ شارالارىن جالعاستىرۋ قاجەت. بىرىنشىدەن، ەكسپورتتىق قىزىعۋشىلىعى باسىم ەلدەر، ول - رەسەي، قىتاي، ءۇندىستان، يران، قىرعىزستان، تۇركيا، وزبەكستان، بەلارۋس، ۋكراينا، وسى ەلدەردە. سونىمەن بىرگە شەت ەلدەردە جاڭا ەكسپورتتىق ينفراقۇرىلىمدى قولداۋ قۇرالدارىن قولعا الۋ قاجەت»، - دەدى ج. قاسىمبەك ۇكىمەتتىڭ بۇگىنگى وتىرىسىندا.
ونىڭ ايتۋىنشا، ەكسپورت ساياساتىن قالىپتاستىرۋ مەن ءبىرىڭعاي ۇيلەستىرۋدى ىسكە اسىرۋ ءۇشىن ينستيتۋتسيونالدى تاسىلدەردى دە كۇشەيتۋ كەرەك. سونداي- اق، الەمدىك نارىققا ۇلتتىق برەندتەردى تەزدەتىپ شىعارعان ءجون.
اۆتور: ارمان اسقاروۆ