بوكس: اتىراۋدا وتكەن حالىقارالىق تۋرنيردە موڭعوليالىق قازاق چەمپيون اتاندى

 اتىراۋ. قازاقپارات - اتىراۋدا بەس كۇنگە سوزىلعان يساتاي تايمان ۇلى مەن ماحامبەت وتەمىس ۇلىن ەسكە الۋعا ارنالعان بوكستان ەرەسەكتەر اراسىنداعى حالىقارالىق تۋرنير مارەسىنە جەتتى، دەپ حابارلايدى قازاقپارات ءتىلشىسى.

ءداستۇرلى تۋرنيرگە بيىل يران، رەسەي، وزبەكستان، قىرعىزستان، ازەربايجان، موڭعوليا جانە قازاقستان مەملەكەتتەرىنەن 100 گە جۋىق بىلعارى قولعاپ شەبەرى قاتىستى.

«ءبىرىنشى كەزەكتە بۇنداي حالىقارالىق دەڭگەيدەگى جارىستىڭ اتىراۋ جەرىندە ونىنشى مارتە ۇيىمداستىرىلىپ جاتقانىن ەرەكشە ايتا كەتكەن ءجون. يساتاي تايمان ۇلى مەن ماحامبەت وتەمىس ۇلىنىڭ ەلىمىزدىڭ تاريحىندا الار ورنى ەرەكشە. باتىر بابالارىمىزدىڭ ەرلىك ىستەرى كوپكە ۇلگى. جىلما- جىل جارىسىمىزدى ءادىل تۇردە جوعارى دەڭگەيدە وتكىزۋگە تىرىسامىز. مىسالى، بيىل سپورتشىلاردى ماراپاتتاۋ ءۇشىن وليمپيادا چەمپيونى الەكساندر ۆينوكۋروۆ پەن ايگىلى اۋىر اتلەتىمىز يليا يلين كەلدى» ، - دەيدى اتىراۋ وبلىسى بوكس فەدەراتسياسىنىڭ اتقارۋشى ديرەكتورى دىنمۇحامەد شارىپبايەۆ.

بەيرەسمي كوماندالىق ەسەپتە اتىراۋ وبلىسىنىڭ كومانداسى 10 مەدال جەڭىپ الدى. ودان بولەك يران، موڭعوليا جانە رەسەي مەملەكەتتەرى ءبىر- بىردەن التىن مەدال يەلەندى. تۋرنيردىڭ ۇزدىك بوكسشىسى بولىپ اتىراۋلىق اسىلحان ۇزاقبايەۆ تانىلدى.

ايتا كەتۋ كەرەك، 56 كەلىدە جۇدىرىقتاسقان موڭعوليالىق نۇرلان اسقار - ەتنيكالىق قازاق. ول ءوز سالماعىندا قارسىلاس شىداتپاي، چەمپيون اتاندى.

 

اباي ابىلايەۆ