نۇرسۇلتان نازاربايەۆ: بارشامىزعا ورتاق باقىتتى قورعاي بىلەيىك
استاناداعى «قازاق ەلى» مونۋمەنتى الدىندا وتكەن مەرەكەلىك كونتسەرتتە حالىقتى بىرلىك كۇنىمەن قۇتتىقتاعان پرەزيدەنت بارشامىزعا ورتاق باقىتتى قورعاي ءبىلۋىمىز كەرەكتىگىن اتاپ ءوتتى.
«توتاليتارلىق رەجىم كەزىندە قازاقتىڭ دالاسىنا ءبىرسىپىرا حالىقتى تىقسىرىپ، قالاي بولسا سولاي بولسىن دەپ كوشىرىپ جىبەردى. 550 مىڭعا تارتا سولتۇستىك كاۆكازدىقتار، ميلليون نەمىس پەن ۇيعىر، كارىستەر، ۋكرايندىقتار - ءبارىن دە الىپ كەلدى. كونسەنتراتسيالىق لاگەرلەر تۋرالى ايتپاي- اق قويايىن. ولار وسى دالاعا كەلىپ، قۇرىپ كەتەدى دەپ ەسەپتەسە كەرەك. ولاي بولعان جوق. جەرگىلىكتى حالىقتىڭ - قازاقتاردىڭ تەرەڭ قۇرمەتىنىڭ ارقاسىندا ءبىز بۇگىنگە جەتىپ، ورنىمىزدان كوتەرىلىپ، مەملەكەت تۇرعىزدىق. دامۋدىڭ داڭعىلىنا تۇستىك» ، - دەدى ن. نازاربايەۆ.
ەسكە سالا كەتسەك، بۇگىن پرەزيدەنت نۇرسۇلتان نازاربايەۆ استانادا حالىقتىق سەرۋەنگە قاتىسقان بولاتىن. قۇتتىقتاۋ سوزىندە ەلباسى امەريكا پرەزيدەنتى دونالد ترامپپەن نە جونىندە اڭگىمە وربىتكەنىن ەسكە العان ەدى.