استاناداعى «دوستىق شەرۋى» ۆەلوشەرۋىنە مىڭنان استام ادام قاتىستى
اۋقىمدى شارانى قالا تۇرعىندارىن بەلسەندى جانە سالاۋاتتى ءومىر سالتىنا باۋلۋ، سونداي- اق كۇندەلىكتى ومىردە ۆەلوسيپەدپەن ءجۇرۋدى دارىپتەۋ ماقساتىندا استانا قالاسىنىڭ مادەنيەت جانە سپورت باسقارماسى ۇيىمداستىرعان، دەپ حابارلايدى قازاقپارات ءتىلشىسى.
جارىس ساعات 13:00 دە «بايتەرەك» مونۋمەنتىنىڭ الدىنداعى الاڭدا باستالدى. مارشرۋتتىڭ ۇزىندىعى - 4100 م. ۆەلوشەرۋگە قاتىسۋشىلار استانانىڭ سول جاعالاۋىمەن ءجۇرىپ ءوتتى. سپورتتىق ءىس- شارا استانانىڭ 20 جىلدىعى جانە «رۋحاني جاڭعىرۋ» باعدارلاماسى اياسىندا جۇزەگە اسىرىلىپ وتىر.
«قازاقستان حالقىنىڭ بىرلىگى كۇنى مەرەكەسىمەن استانا قالاسى اتىنان قۇتتىقتاۋعا رۇقسات ەتىڭىزدەر. مىناۋ بۇگىنگى ۆەلوشەرۋىمىزگە ءبىرشاما ادام قاتىسقالى وتىر. ەلباسىمىزدىڭ ەلوردانىڭ الدىنا قويىپ وتىرعان كوپ تالاپتارى بار. سونىڭ ءبىرى - سپورتپەن اينالىساتىن استانالىقتاردىڭ سانىن كوبەيتۋ. بۇقارالىق سپورت تۇرلەرىن كەڭىرەك دامىتۋدىڭ ناعىز ايعاعى رەتىندە سىزدەر كەلىپ وتىرسىزدار. ءارقايسىسىڭىزدى بۇگىنگى مەرەكەمەن قۇتتىقتايمىن. ارنايى دايىندالىپ، كەلىپ تىركەلگەندەرىڭىز ءۇشىن سىزدەرگە راحمەت. «رۋحاني جاڭعىرۋ» دەگەن مىنە وسى - جاڭا داستۇرلەردىڭ پايدا بولۋى» ، - دەپ قۇتتىقتادى جينالعانداردى قالا اكىمىنىڭ ورىنباسارى ەرمەك امانشايەۆ.
شاراعا الەمدىك دەڭگەيدە ەل نامىسىن قورعاپ جۇرگەن تانىمال ۆەلوشاباندوزدار، بەلگىلى سپورتشىلار، ەتنو- مادەني بىرلەستىكتەردىڭ وكىلدەرى، سونداي- اق، 12-دەن اسقان ەلوردا تۇرعىندارى مەن قوناقتارى قاتىستى. مۇنىمەن قوسا، ۆەلوشەرۋگە «استانا» پرەزيدەنتتىك كلۋبىنىڭ «Astana Pro Team» كاسىپقوي كومانداسىنىڭ وكىلى دميتريي گرۋزديەۆ تە شاقىرىلعان. بۇل سپورتشى - قازاقستاننىڭ ءۇش دۇركىن چەمپيونى، سونداي- اق جەكە جارىستا ازيانىڭ ەكى دۇركىن چەمپيونى.
ۇيىمداستىرۋشىلاردىڭ ايتۋىنشا، «دوستىق شەرۋىنە» 1100 دەن استام ادام قاتىسقان. الاڭدا شەرۋگە قاتىسۋعا نيەت بىلدىرگەندەر ۆەلوسيپەدتى جالعا الدى. جارىس الدىندا كونسەرتتىك باعدارلاما وتكىزىلدىپ، ۆەلوشەرۋ اياقتالعان سوڭ تىركەلگەن قاتىسۋشىلار اراسىندا ۆەلوسيپەدتەر مەن باسقا دا باعالى سىيلىقتار ويناتىلدى.