ساعات اشىمبايەۆتىڭ قاناتتى سوزدەرى
44 جىل ومىرىندە ساعات اشىمبايەۆ ارتىنا «سىن مۇراتى» ، «تالانتقا تاعزىم» ، «پاراساتقا قۇشتارلىق» ، «شىندىققا سۇيىسپەنشىلىك» ، «اقيقاتقا ىڭكارلىك» ، «ازاماتتىققا ادالدىق» سىندى كىتاپتار قالدىرىپ كەتتى. سونىمەن قاتار ابايتانۋشى رەتىندە دە تانىمال بولعان ساعات ءاشىمباي ۇلى كەيىنگى جۋرناليست ۇرپاقتىڭ ەسىندە توعىشارلىق اتتى «ىندەتپەن» كۇرەسۋشى كۇرەسكەر رەتىندە ساقتالىپ قالدى. «سىننىڭ تۋۋى - ادامزات كوركەمدىك وي- ساناسىنىڭ ءبىر ادىم ىلگەرىلەگەندىگىنىڭ ايعاعى» ، - دەپ ساعات اشىمبايەۆتىڭ ءوزى ايتقانداي، ونىڭ نەگىزگى تاقىرىبى - سىن جانرى بولدى. ونىڭ قالامىنان تۋعان زەرتتەۋ- تالداۋ تۇجىرىمى، كوڭىلگە قونىمدى سىن ماقالالارى مەرزىمدى باسپا ءسوز بەتىندە جۇيەلى جاريالانىپ، قازاق تەليەۆيزياسىن جاڭا بيىككە كوتەردى جانە ارتىنا مول مۇرا قالدىرىپ كەتتى. تاعىلىمدى تاعدىرىمەن تالاي شاكىرتىن جاقسىلىققا تاربيەلەدى. يگى ىستەرگە جەتەلەدى. ۇلتتىق سانانىڭ وسۋىنە ۇلەس قوسقان تالانتتىڭ ۇلتىنا دەگەن سۇيىسپەنشىلىگى ەرەكشە. «ساعات - اقىنجاندى سىنشى. ادەبيەت الەمىن ءتۇپنۇسقاسىنان تاني بىلەر قىراعىلىعىنا كۇمان- كۇدىگىڭىز بولماسىن! ادەبيەتشى اشىمبايەۆ، سىنشى ساعات قاشانعى داعدىسىنداي وزىنە سەنىمدى ءھام سەرگەك» . اشىربەك سىعاي.
* ءبىر ادامدى باقىتتى ەتىپ، جۇزىنە - مۇڭ كولەڭكەسىن، جانىنا - قايعى ءىزىن تۇسىرمەۋ اركىمنىڭ قولىنان كەلەدى.
* وسەكتىڭ ورتىنەن گورى - قولقاڭدى قاۋىپ، دەمىڭدى تارىلتاتىن دەرتى جامان.
* تاۋ سۋىنداي تۇنىق تا ءمولدىر ار.
* ادامشىلىقتىڭ سۇلتانى.
* كۇي استارىندا تەرەڭ فيلوسوفيالىق ويلار جاتادى.
* ادەبيەتتەگى شارتتىلىق - قاۋىز ىسپەتتەس: ول - جازۋشىنىڭ ءتۇرلى نيەتىن تانىتۋدىڭ ءبىر ءتاسىلى.
* شىعارما مايەگىن ءتۇيسىنۋ - جازۋشى پافوسىن ءتۇسىنۋ دەگەن ءسوز.
* ولەڭنىڭ جانى - سۇلۋلىق.
* ولەڭ - ءومىردىڭ ءۇزىلىپ تۇسكەن ءمولدىر تامشىسى.
* ۇيرەنۋ مەن جاتتىعۋ دا - ەڭبەك.
* شىن مانىندەگى سۇلۋ پوەزيادا ونەردىڭ باسقا سالالارىنىڭ دا ەلەمەنتتەرى قويىنداسىپ جۇرەدى. * سۇلۋلىق پەن وبراز - ەگىز ۇعىمدار: ءبىرى جوق جەردە - ەكىنشىسى دە بولمايدى.
* وبرازدىلىق الەم پوەزياسىنا ءتان قاسيەت بولعانىمەن، سىرتقى ءتۇر جاعىنان دا، ىشكى مازمۇن تۇرعىسىنان دا ۇلتتىق ەرەكشەلىكتەرى بولادى.
* ولەڭ سۇلۋلىعىنىڭ باستى ولشەمى (كريتەريي) - مازمۇن مەن ءتۇر اراسىنداعى جاندى جاراسىم (پروپورتسيا) ساقتالىپ، ديالەكتيكالىق بايلانىستىڭ ۇزىلمەۋى.
* ولەڭدە وي مەن سەزىم بولعانىمەن، ولار لايىقتى فورمادا ء(تۇر) كورىنىس تاپپاعان بولسا - ۇستىندە لىپا جوق، كيىمسىز ادامداي رابايسىز كورىنەدى. كەرىسىنشە، ءتۇرى (فورما) كەلىسىپ، ءبىراق وي مەن سەزىم پاراساتتىلىعى جەتپەي جاتسا - ولەڭ ولەڭ ەمەس، قۇر ايعاي بولىپ شىقپاق.
* تۋعان حالقىڭا دەگەن ۇلى ماحاببات - تۋعان جەرگە دەگەن سۇيىسپەنشىلىكتەن باستالادى.
* تۋعان جەرگە دەگەن ماحابباتتان دا ادامنىڭ مورالدىك بەت- بەينەسى كورىنەدى.
* تۋعان بوساعاسىن ساعىنباعان - تۋعان جەرىن دە ساعىنبايدى.
* كىتاپ - بەلگىلى ءبىر ءداۋىردىڭ، ۋاقىتتىڭ العا قويىپ وتىرعان كوكەيتەستى ماسەلەلەرى تۋرالى پاراساتتى جۇرەكتىڭ رۋحاني تولعانىسى، اڭدىزداعان ويى، اقشاڭقان سەزىمى، ەرۋديتسياسى، دۇنيەگە كوزقاراسى.
* اڭگىمە - شەبەرلىك مەكتەبى، شەبەرلىكتانۋ الىپپەسى.
* ادام - ۋاقىت تۋىندىسى، ءداۋىردىڭ جاندى بولشەگى.
* تۆورچەستۆو تاۋەكەلگە كونبەيدى.
* ناعىز جازۋشى ءوز زامانىنداعى الەۋمەتتىك- ساياسي، فيلوسوفيالىق، ەستەتيكالىق وي- سانانىڭ، ءبىلىمنىڭ، تانىمنىڭ، يدەيالاردىڭ بيىگىندە تۇرۋعا ءتيىس.
* وڭتايلى دەگەن - وڭاي دەگەن ءسوز ەمەس.
* اقىندىق ينتۋيتسيا - تابيعاتتىڭ سيى، ال اقىندىق مادەنيەت - وقۋ، ورتا، ىزدەنىس ارقىلى قالىپتاسادى.
* ولەڭ - وي مەن سەزىمنىڭ وبرازعا اينالعان كوركەمدىك جاراسىمى.
* ولەڭ وقۋ ءۇشىن دە ورە كەرەك.
* ويلى ادەبيەت بيىك پاراساتتان، تەرەڭ بىلىمنەن تۋادى.
* ونەر تۋىندىسى - ءومىردى ءتۇسىنۋدىڭ كىلتى.
* تەاتر - كۇردەلى ينتەللەكتۋالدىق گارمونيادان تۇراتىن، ءۇش جاقتان بىردەي قيىننان قيىسقان ساحنالىق ونەر.
* قاي حالىقتىڭ دا ۇلىلىعى سانىنىڭ از- كوپتىگىمەن ەمەس، رۋحاني مادەنيەتىنىڭ جالپى ادام بالاسىنا ورتاقتىعىمەن، گۋمانيستىك جانە ينتەرناتسيونالدىق سيپاتىمەن ولشەنسە كەرەك.
* رۋحاني مادەنيەتىنىڭ ءورىسى باسقالارعا دا ورتاق بولۋ دارەجەسىنە جەتۋ - حالىقتىڭ جاسامپازدىعىنىڭ كەپىلدىگى.
* ادەبيەتتىڭ اتقاراتىن ورازان زور قىزمەتىمەن ەشتەڭە دە تەڭەسە المايدى.
Massaget.kz