بىرلىك كۇنى نۇرسۇلتان نازاربايەۆ ترامپپەن وربىتكەن اڭگىمەسىن ەسكە الدى

 استانا. قازاقپارات - قازاقستان پرەزيدەنتى نۇرسۇلتان نازاربايەۆ استاناداعى «قازاق ەلى» مونۋمەنتى الدىندا وتكەن مەرەكەلىك كونسەرتتە حالىقتى بىرلىك كۇنىمەن قۇتتىقتادى، دەپ حابارلايدى قازاقپارات ءتىلشىسى.

«قۇرمەتتى استانالىق اعايىن! بۇكىل قازاقستاندىقتار! بارشالارىڭىزدى بۇگىنگى ۇلىق مەرەكەمىز - قازاقستاننىڭ بىرلىك مەيرامىمەن شىن جۇرەكتەن قۇتتىقتايمىن! اتا- بابامىزدان «بىرلىك بار جەردە تىرلىك بار» دەگەن ءسوز قالعان. تىرلىك دەگەن ءسوز - ادامنىڭ امان بولۋى، تىرلىك دەگەن ءسوز - ەڭبەك، ەڭبەك ارقىلى بايىپ، سول ارقىلى مەملەكەتتى قولداپ، وركەندەپ، ءوسۋ دەگەن ءسوز. ءبىز تاعدىردىڭ تالقىسىنا تۇسكەن حالىقپىز. وسىلاي كەڭ بايتاق وتانىمىزدا كوپ ۇلت پەن ۇلىستىڭ ادامدارى جينالىپ، ءبىر قازاننىڭ ىشىندەگىدەي قايناپ، بىرلىك پەن ەڭبەكتىڭ ارقاسىندا وسىنداي دارەجەگە جەتتىك» ، - دەدى پرەزيدەنت.

 مەملەكەت باسشىسى بىرلىكتىڭ ارقاسىندا مەملەكەت قۇرعانىمىزدى اتاپ ءوتتى.

«بىرلىكتىڭ ارقاسىندا ءبىزدىڭ بىرلىگىمىزدەن بۇكىل دۇنيە ۇلگى الاتىنداي دارەجەگە جەتتىك. ءبىزدىڭ بىرلىگىمىزدىڭ ارقاسىندا مەملەكەتىمىزدى وركەندەتىپ، وسىردىك. ەكونوميكانى كوتەردىك. جىل سايىن حالىقتىڭ ءال- اۋقاتىن جاقسارتۋعا جۇمىس ىستەپ جاتىرمىز. كەشەگى مەنىڭ بەس باستامام بىرىنشىدەن حالىققا باسپانا بەرىپ، ەكىنشىدەن سالىقتى تومەندەتۋ، ۇشىنشىدەن جاستارعا جاتاقحانا، جاڭادان مەملەكەت ارقىلى مۇمكىنشىلىك بەرۋ، شاعىن بيزنەستى دامىتىپ، اۋىلدىڭ ادامدارىن كوتەرۋ. وسىنىڭ بارلىعى نەگە بولىپ جاتىر؟ بىرلىگىمىزدىڭ ارقاسىندا!» - دەدى ول.

«ءبىزدىڭ بىرلىگىمىزدىڭ ارقاسىندا بۇكىل دۇنيە ءبىزدى سىيلايدى. بارلىق دىندەر كەلىپ ءبىزدىڭ ەلىمىزدە عانا جينالادى. جانجالداسقانداردىڭ تابىسۋى بىزدە جۇزەگە اسادى. وزدەرىڭىز بىلەسىزدەر، وسى قاڭتاردا امەريكادا ساپارمەن بولدىم. ول ەلدىڭ پرەزيدەنتى دونالد ترامپ مەنەن سۇرادى. ترامپ مىرزا ءوزىنىڭ ارىپتەستەرىمەن ارى جاقتا وتىردى دا، ءبىز بەر جاقتا وتىرعاندا مەنەن: «سەندەردىڭ قاي ەلدەرمەن جانجالدارىڭ بار؟ » دەپ سۇرادى. مەن سوندا قازاقستاننىڭ ەشقانداي ەلمەن جانجالى جوقتىعىن ايتتىم. ءبىز بارلىعىن سىيلايمىز، ءبىزدى دە بارلىعى سىيلايدى. سوندا ترامپ: «قاراشى قازاقستاننىڭ ەشكىممەن جانجالى جوق. ال ءبىزدىڭ توڭىرەگىمىزدىڭ ءبارى جانجال» دەدى. سوندىقتان اللا ءبىزدى وسىدان ەشۋاقىتتا ايىرماسىن. بىرلىكتەن ايىرماسىن. وتىز ەلدىڭ قاتارىنا وسى بىرلىكتىڭ ارقاسىندا جەتەمىز. ۇرپاعىمىز بىزگە ريزا بولاتىن بولادى» ، - دەپ ءتۇيدى پرەزيدەنت.