ەلباسى قازاقستان حالقىنىڭ بىرلىگى كۇنىمەن قۇتتىقتادى
«قۇرمەتتى وتانداستار! بارشاڭىزدى 1 - مامىر - قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن! بۇل شىنايى جالپى حالىقتىق مەرەكە وتانشىلدىعىمىزدىڭ، تۋعان جەرگە دەگەن سۇيىسپەنشىلىگىمىز بەن ادالدىعىمىزدىڭ جارقىن سيمۆولى بولىپ سانالادى. بىرلىك پەن كەلىسىمنىڭ ارقاسىندا ءبىز تاۋەلسىز مەملەكەت قالىپتاستىرىپ، زور جەتىستىكتەرگە جەتتىك. الەمگە تانىلىپ، بيىك بەدەلگە يە بولدىق» دەلىنگەن حابارلامادا.
سونداي- اق، ەلباسى قۇتتىقتاۋىندا بىرلىك پەن كەلىسىمنىڭ ماڭىزدىلىعىن تولىق ۇعىنۋ - ەلىمىزدىڭ ۇيلەسىمدى ءارى ورنىقتى دامۋىنىڭ نەگىزگى فاكتورى ەكەندىگىن اتاپ ءوتتى.
«بىرلىك، دوستىق جانە ءوزارا سىيلاستىق بولعان كەزدە عانا ءبىزدىڭ كەڭ بايتاق ورتاق وتانىمىز - قازاقستان رەسپۋبليكاسى مول بايلىق پەن باق- بەرەكەگە كەنەلەدى. وسى ماڭىزدى قۇندىلىقتار قوعامىمىزدىڭ دۇنيەتانىمىن انىقتاپ، ونىڭ ودان ءارى بىرىگە جانە جۇمىلا ءتۇسۋىنىڭ ايقىن باعدارى بولادى» دەپ جازىلعان حابارلامادا.
ءسوز سوڭىندا ق ر پرەزيدەنتى مەملەكەت ءومىرىنىڭ بارلىق سالاسىنداعى اۋقىمدى جاڭارۋ جاڭا بەلەستەردى باعىندىرىپ، جەڭىسكە جەتۋ جولىندا بىرلىگىمىز بەن تۇراقتىلىعىمىزدى نىعايتۋعا سەپتىگىن تيگىزەتىنىنە سەنىم ءبىلدىردى.