گەننادي گولوۆكين قيىن جاعدايعا تاپ بولدى
ال GGG ءدىڭ باستى ماقساتى - بارلىق بەلبەۋلەردى بىرىكتىرىپ، ءابسوليۋتتى چەمپيون اتاعىنا جەتۋ. سوندا بيىل ساۋل الۆارەسكە قارسى ريەۆانشتى كورە المايمىز با؟ الدە، رەماتچ ءۇشىن ءبىر بەلبەۋدەن باس تارتۋعا تۋرا كەلە مە؟ گولوۆكيننىڭ كومانداسى نەنى تاڭدايدى؟ اتاق- داڭق پا؟ جوق، الدە جاقسى گونورار ما؟ قازاقپارات ءتىلشىسى وسى سۇراقتاردىڭ توڭىرەگىندە وي ءوربىتىپ كوردى.
شىنى كەرەك، ءدال قازىر GGG الداعى جەكپە- جەككە دايىندالىپ جاتسا دا، الداعى جوسپارىنا قاتىستى ويى ەكىگە ءبولىنىپ ءجۇر. ءبىر جاعىنان «كانەلوعا» قارسى ءبىرىنشى جەكپە- جەكتە بولعان ادىلەتسىزدىكتىڭ جۇگى اۋىر. گەننادي گولوۆكين ءوز باسىمدىعىن تەزدەتىپ دالەلدەۋدى كوزدەيدى. ونى تالاي رەت ايتقان. ارينە، گونوراردىڭ كولەمى دە از ەمەس. بارلىق بەلبەۋلەردى جيناپ العانعا دەيىن ءدال وسىنداي مايلى جەكپە- جەكتەردى وتكىزگەن ءتيىمدى. ارتىنان ابسوليۋتتى چەمپيون اتاعىن ءۇشىن تالاسۋعا دا بولادى. وسىنداي سەناريمەن جۇرگەنگە نە جەتسىن؟ ءبىراق ءبارى ءبىز ويلاعانداي بولا بەرمەيدى ەكەن.
حالىقارالىق بوكس فەدەراتسياسى (IBF) قازاقستاندىق بوكسشىعا ۋلتيماتۋم قويدى. گەننادي گولوۆكين 5 - مامىردا بولاتىن جەكپە- جەكتەن كەيىن IBF تيتۋلىنان ۇمىتكەر ۋكرايندىق بوكسشى سەرگەي دەريەۆيانچەنكومەن كەزدەسۋى ءتيىس. كەلىسسوزدەرگە 90 كۇن بەرىلەدى. دەمەك، تامىزدىڭ 3 ىنە دەيىن ەكى جاقتىڭ كوماندالارى ءبىر كەلىسىمگە كەلىپ، جەكپە- جەكتى وتكىزۋى شارت. ول ايقاستا گولوۆكين IBF تيتۋلىن قورعاۋى ءتيىس. نەگىزى، اتالعان ۇيىم مارتيروسيانعا قارسى شىعۋعا دا رۇقسات بەرگەن جوق. ءبىراق GGG ءدىڭ پروموۋتەرى توم لەففلەر IBF پەن اراداعى كەلىسىمشارتتىڭ «ەرەكشە جاعدايعا» قاتىستى تارماعىن پايدالانىپ، تيتۋلدى قورعاۋ مىندەتىن ءسال كەيىنگە شەگەردى. البەتتە، ونداي جەڭىلدىك تەگىن بەرىلمەيدى. ول ءۇشىن 20 مىڭ دوللارداي اقشا تولەۋگە تۋرا كەلدى. وعان قوسا، 5 - مامىر كۇنگى جەكپە- جەكتە اتالعان بەلبەۋ ساراپقا سالىنبايدى. گولوۆكيننىڭ قارسىلاسى تەك WBA، WBC مەن IBO تيتۋلدارىنان عانا دامەتە الادى. وسىلايشا، IBF سوڭعى رەت جەڭىلدىك بەرگەنىن كورسەتتى. مارتيروسياننان كەيىن سەرگەي دەريەۆيانچەنكومەن كەزدەسۋ كەرەك. ال وعان قارسى شىعاتىن بولساق، قىركۇيەك ايىندا ساۋل الۆارەسكە قارسى ريەۆانشتى وتكىزە المايمىز. سەبەبى دايىندىققا ۋاقىت قالمايدى. ونىڭ ۇستىنە ۋكرايندىق بوكسشى وسال ەمەس. وسى ۋاقىتقا دەيىن 12 جەكپە- جەك وتكىزىپ، 10 رەت نوكاۋتپەن جەڭىسكە جەتكەن.
«دەريەۆيانچەنكوعا قارسى جەكپە- جەك وڭايعا سوقپايدى. GGG جەڭگەن كۇننىڭ وزىندە قاتتى شارشايدى. ول كەزدەسۋدەن كەيىن بىردەن قىركۇيەكتە الۆارەسكە قارسى شىققان اۋىر بولادى. ول ءۇشىن ۋكرايندىق بوكسشىنى العاشقى راۋندتاردا نوكاۋتپەن جەڭۋ كەرەك. ءبىراق دەريەۆيانچەنكو ايلاكەر بوكسشى، كوپ قوزعالادى جانە دجەبتى ءجيى قولدانادى. وعان ءدال سوققى جاساۋ قيىنعا سوعادى. سوندىقتان GGG گە ناقتى شەشىم قابىلداۋ قاجەت. تيتۋلداردى ساقتاي ما؟ جوق، الدە «كانەلوعا» قارسى ريەۆانش وتكىزە مە؟ ەكەۋىن بىردەي ۇستاي المايدى. گولوۆكين 20 جاستا بولعاندا ءبىر ايدىڭ ىشىندە ەكى بوكسشىمەن كەزدەسە الاتىن ەدى. ءبىراق GGG جاس ەمەس» ، - دەپ جازدى Boxingnews24.com-نىڭ سپورت ساراپشىسى دجيم دوەۋر.
اشىعىن ايتۋ كەرەك، گولوۆكين قىسقا ۋاقىتتىڭ ىشىندە ەكى بىردەي مىقتى بوكسشىمەن بوكستاسپايدى. سوندىقتان IBF تيتۋلىن قورعايمىن دەسە، الۆارەسكە قارسى ريەۆانشتى كەيىنگە قالدىرۋعا تۋرا كەلەدى. ال مەكسيكالىق بوكسشى وسى مۇمكىندىكتى پايدالانىپ، وزىنە تاعى جارناما جاساي الادى. «GGG قاشىپ ءجۇر!» دەپ جەر- جاھانعا جار سالۋى ابدەن مۇمكىن. ءسويتىپ، دوپينگ داۋى دا ۇمىت بولادى. «كانەلو» بولسا، قالاي دايىندالامىن، نە ىشەمىن، نە جەيمىن دەسە دە، ءوز ەركى. سەبەبى نيەۆادانىڭ اتلەتيكالىق كوميسسياسى ونى التى ايعا شەتتەتسە دە، تۇراقتى تۇردە دوپينگ سىنامالارىن تاپسىرۋعا مىندەتتەگەن جوق. الۆارەس WBC ءدىڭ «تازا بوكس» باعدارلاماسىنان دا شىعىپ كەتتى. سەبەبى ءدال وسى باعدارلاما بويىنشا دۇنيەجۇزىلىك دوپينگكە قارسى اگەنتتىگى (WADA) بوكسشىنى كەز كەلگەن ۋاقىتتا ەشبىر ەسكەرتۋسىز تەكسەرە الادى. بۇگىندە وسكار دە لا حويا ءوز شاكىرتىن قورعاپ، جاقىن ارادا ارنايى جارنانى تولەپ، «تازا بوكس» باعدارلاماسىنا كىرەمىز دەسە، ول ۋادەنىڭ قاي ۋاقىتقا دەيىن سوزىلاتىنىن ەشكىم بىلمەيدى. ال تانىمال بوكسشىلار مەن سپورت ساراپشىلارى NSAC تىڭ شەشىمىنە اڭ- تاڭ. «بۇل ورىنسىز قالجىڭعا ۇقسايدى. التى ايعا ديسكۆاليفيكاتسيا، ءبىراق ايىپپۇل دا، تۇراقتى دوپينگ- تەستتەر دە جوق. ونى قالاي تۇسىنۋگە بولادى؟ ول ءدال قازىر ۇيىنە بارىپ، دوپينگ قابىلداۋدى جالعاستىرا بەرسە دە بولادى. بىلاي نەگە ىستەمەسكە: التى ايعا شەتتەتىپ، ونىڭ ۇستىنە ايىپپۇل سالسا، سوسىن ەكى جىل بويى ەسكەرتۋسىز تەكسەرىستەردى جاساسا؟ ەگەر ءبىر عانا تەست وڭ ناتيجە كورسەتسە، وندا ديسكۆاليفيكاتسيانى تاعى ءبىراز ۋاقىتقا سوزۋ قاجەت. ارينە، ولاي ىستەمەيدى. ولار ءۇشىن «كانەلونى» دوپينگپەن ۇستاعان ءتيىمسىز. ويتكەنى تاعى ۇستالسا، 2-3 -جىلعا شەتتەتۋگە تۋرا كەلەدى. وندايدا ءبىراز اقشادان قاعىلاتىنىن بىلەدى. ولاي ىستەۋگە باتىلدارى جەتپەيدى» ، - دەيدى ەكس- چەمپيون پول مالينيادجي.
ايتپاقشى، شەتەلدىك بۇقارالىق اقپارات قۇرالدارى شۋلاپ كەتكەننەن كەيىن اتلەتيكالىق كوميسسيانىڭ شەشىمىنە قاتىستى تاعى ءبىر اقپارات تارالا باستادى. وعان سايكەس، الۆارەستىڭ شاشىنا دەيىن زەرتحانادا تەكسەرىپ شىقتى. سەبەبى شاشتا دوپينگتىڭ ءىزى ۇزاق ساقتالادى ەكەن. ءبىراق ونىڭ شاشىنان «كلەنبۋتەرولدىڭ» ءىزى تابىلمادى. سوسىن تاعى ءبىر تالاپ بار. «كانەلو» كەلەسى جەكپە- جەكتەن 21 كۇن، 15 كۇن جانە 3 كۇن بۇرىن دوپينگ سىنامالارىن تاپسىرۋعا مىندەتتى. ءبىراق اتالعان شەشىم دە زاڭسىز زاتتاردى پايدالانۋعا توسقاۋل بولمايتىن ءتارىزدى. سەبەبى كەز كەلگەن بوكسشى سىناماعا دەيىنگى ۋاقىتىن ەسەپتەي الادى. «قازىر ولار شاشتى تاپسىرىپ، دوپينگتىڭ تابىلماعانى جايىندا ايتىپ جاتىر. ەندى، مىنا ءبىر ماسەلەگە نازار اۋدارىپ كورەيىكشى. ءسىز كىنالى بولماساڭىز، 15 ميلليون دوللار اكەلەتىن جەكپە- جەكتەن باس تارتاسىز با؟ ودان كەيىن تىزەگە وپەراتسيا جاساتاسىز. سودان بارىپ شاشتى اناليزگە تاپسىراسىز. ءويتىپ، ءبارىن قيىنداتۋدىڭ نە قاجەتى بار؟ » ، - دەيدى تانىمال باپكەر دەريك سانتوس- روساريو.
سونىمەن، «كانەلونىڭ» كومانداسى دوپينگ داۋىنان دا شەبەر شىعا ءبىلدى. ال، ەڭ باستىسى، ولار ۋاقىتتا سوزىپ الدى. قازىر گەننادي گولوۆكين 36 دا، ال ساۋل الۆارەس شىلدە ايىندا تەك 28 گە كەلەدى. دەمەك، وعان ريەۆانشتى كەيىنگە قالدىرعان ءتيىمدى. ءبىراق جەرلەسىمىز وزىنەن جاس ءارى مىقتى بوكسشىدان ۇتىلسا، الۆارەسكە تيتۋلدار ءۇشىن تالاسقان قيىنعا تۇسەدى. ونى دا Golden Boy Promotion ءنىڭ جىگىتتەرى جاقسى تۇسىنەدى. سول سەبەپتى ريەۆانشتى ءسوزبۇيداعا سالىپ، قاتتى «قاقتاۋعا» بولمايتىنىن بىلەدى.
دەگەنمەن، GGG بارلىق تيتۋلداردى ساقتامايىن دەسە، كەلەسى جەكپە- جەكتە سەرگەي دەريەۆيانچەنكومەن كەزدەسەدى. ودان كەيىن سوڭعى بەلبەۋدىڭ يەگەرى بيللي دجو سوندەرستى كوزدەۋگە بولادى. ايتپەسە، «كانەلونىڭ» ارتىنان جۇگىرە بەرسەك، ابدەن ءجۇنجىپ كەتەتىن ءتارىزدىمىز. حالىقارالىق بوكس داڭقى زالىنا كىرۋ ارمانىمىز دا ورىندالماي قالۋى ابدەن مۇمكىن.. .
ارمان اسقاروۆ